గృహస్థాయిలో సౌరశక్తి విస్తరణకు నాబార్డ్ ఆధ్వర్యంలో ప్రేరణాత్మక సమావేశం

విజయవాడ, నేటి పత్రిక ప్రజావార్త :
గ్రామీణ మరియు పట్టణ గృహాల్లో సోలార్ రూఫ్‌టాప్ వ్యవస్థలను విస్తృతంగా ప్రవేశపెట్టే దిశగా, నాబార్డ్ ఆధ్వర్యంలో విజయవాడలో ఒక జాతీయ స్థాయి అవగాహన మరియు పరస్పర అనుసంధాన సదస్సు నిర్వహించబడింది. ఈ కార్యక్రమంలో నాబార్డ్ ప్రధాన కార్యాలయం, ఆరు ప్రాంతీయ కార్యాలయాల అధికారులు, ప్రముఖ బ్యాంకులు, టాటా సోలార్, కేపిఎంజి, సౌర పరికర సరఫరాదారులు పాల్గొన్నారు.
ఈ సందర్భంగా నాబార్డ్ ఆంధ్రప్రదేశ్ ప్రాంతీయ కార్యాలయం చీఫ్ జనరల్ మేనేజర్ ఎం ఆర్ గోపాల్ మాట్లాడుతూ, సౌర రూఫ్‌టాప్ వ్యవస్థల గ్రామీణ స్థాయికి చొచ్చుకుపోయేలా చర్యలు తీసుకోవడం అత్యవసరం అని తెలిపారు. నాబార్డ్ ప్రధాన కార్యాలయం చీఫ్ జనరల్ మేనేజర్ డా. కె.ఎస్. మహేష్ మాట్లాడుతూ, ఈ కార్యక్రమాన్ని విజయవంతంగా అమలు చేయాలంటే సంస్థల మధ్య భాగస్వామ్యం మరియు డిమాండ్ ఆధారిత రుణ వసతులు కీలకం అని పేర్కొన్నారు. డా. శ్రీనాథ్ రెడ్డి, మేనేజింగ్ డైరెక్టర్, ఆప్కాబ్, మాట్లాడుతూ, జిల్లా సహకార బ్యాంకులు (DCCBs) ఈ కార్యక్రమానికి ముంగిటగా నిలవాలి అని సూచించారు. గ్రామీణ ప్రాంతాల్లో ఇప్పటికీ సరైన అవగాహన లేకపోవడంతో, ఇలాంటి అవగాహన కార్యక్రమాలు నిర్వహించాల్సిన అవసరం ఉన్నదని ఆయన స్పష్టం చేశారు.
ఈ సందర్భంగా న్యూఅండ్ రిన్యూవబుల్ ఎనర్జీ డెవలప్‌మెంట్ కార్పొరేషన్ ఆఫ్ ఆంధ్రప్రదేశ్ (న్రెడ్‌కాప్) మేనేజింగ్ డైరెక్టర్ డా. కమలాకర్ బాబు మాట్లాడుతూ – “రూఫ్‌టాప్ సోలార్ వ్యవస్థలు దేశం సాధించాలనుకునే క్లీన్ ఎనర్జీ లక్ష్యాలలో కీలకమైన భాగం. గ్రామీణ ప్రజలకు దీని ద్వారా విద్యుత్ లభ్యత పెరగడమే కాక, కుటుంబ ఖర్చులు తగ్గుతాయి. నాబార్డ్ ప్రవేశపెట్టిన ప్రత్యేక రీఫైనాన్స్ స్కీమ్ చాలా సమయానుకూలమైనది. దీనిని సమర్థవంతంగా అమలు చేయటానికి బ్యాంకులు, సాంకేతిక సంస్థలు, ప్రభుత్వ ఏజెన్సీలు కలిసి పనిచేయాలి” అని అన్నారు.
వీడియో కాన్ఫరెన్స్ ద్వారా కార్యక్రమంలో ఆసియా అభివృద్ధి బ్యాంకు కూడా పాల్గొని, సోలార్ రూఫ్‌టాప్ ఇన్వెస్ట్‌మెంట్ ప్రోగ్రాం (SRIP), PM సూర్యఘర్ మఫ్ట్ బిజ్లీ యోజన వివరాలను అందించింది. ప్రపంచస్థాయి అనుభవాలను ప్రస్తావిస్తూ, గృహ సౌర విద్యుత్ విస్తరణకు మెరుగైన మోడళ్ళను చర్చించింది.
నాబార్డ్ అధికారులు గృహ రూఫ్‌టాప్ సోలార్ రీఫైనాన్స్ పథకం వివరాలను సమగ్రంగా వివరించారు. ఈ పథకం కింద బ్యాంకులు, ప్రాంతీయ గ్రామీణ బ్యాంకులు తక్కువ వడ్డీకే వినియోగదారులకు రుణం అందించవచ్చు. ఆంధ్రప్రదేశ్ గ్రామీణ బ్యాంక్, టాటా సోలార్ ప్రదర్శనలు, నోడల్ ఏజెన్సీలు, విక్రేతలతో చర్చలు కూడా జరిగాయి.
ఈ సందర్భంలో నాబార్డ్ ఆంధ్రప్రదేశ్ ప్రాంతీయ కార్యాలయం “సన్షైన్ ఫర్ సస్టెయినబిలిటీ” అనే ప్రత్యేక ప్రచురణను విడుదల చేసింది.
ఈ సదస్సులో రీఫైనాన్స్ డ్రావల్ వ్యూహాలు, బ్యాంకులు-విక్రేతల అనుసంధానాలు, నాబార్డ్ ఇతర ప్రత్యేక పథకాలపై అవకాశాలను చర్చించారు.