పునీత్ రాజ్ కుమార్ మరణం పట్ల ఏపీ ఎఫ్ డి సి చైర్మన్ టి.ఎస్.విజయ్ చందర్ దిగ్భ్రాంతి

విజయవాడ, నేటి పత్రిక ప్రజావార్త :
అత్యంత ప్రేక్షకాదరణ గల కన్నడ నటుడు పునీత్ రాజ్ కుమార్ మరణం పట్ల ఆంధ్రప్రదేశ్ చలనచిత్ర, టీవీ, నాటకరంగ అభివృద్ధి సంస్థ చైర్మన్ టి.ఎస్.విజయ్ చందర్ దిగ్భ్రాంతి వ్యక్తం చేశారు. చిన్న వయసులోనే గుండె పోటుతో మరణించిన పునీత్ మరణం సినీ పరిశ్రమకు తీరని లోటు అని ఆయన అన్నారు. కన్నడ కంఠీరవుడు రాజ్‌కుమార్‌ తనయుడు పునీత్‌ రాజ్‌కుమార్‌ మరణం సినీ పరిశ్రమను తీవ్రంగా కలచివేసిందని విజయ్ చందర్ అన్నారు. 46 ఏళ్ల వయసుకే విపరీతమైన క్రేజ్‌ తెచ్చుకున్న పునీత్ రాజ్ కుమార్ చాలా సౌమ్యుడుగా, అత్యంత గౌరవనీయ వ్యక్తిగా ఎంతో మంచి పేరున్న యువ హీరో అని, అటువంటి గొప్ప సినీ ప్రముఖుడిని కోల్పోవడం చాలా బాధాకరమని విజయ్ చందర్ ఆవేదన వ్యక్తం చేశారు. పునీత్ రాజ్ కుమార్ కుటుంబానికి ప్రగాఢ సంతాపాన్నివ్యక్తం చేశారు.