Prajavartha Online Telugu News
విజయవాడ, నేటి పత్రిక ప్రజావార్త :
బ్రాహ్మణ సామాజికవర్గం ఎదుర్కొంటున్న ఆర్థిక, సామాజిక, రాజకీయ సమస్యలపై చర్చించి, వాటి పరిష్కారానికి ప్రభుత్వానికి తగు సూచనలు చేసేందుకు ఈనెల 7వ తేదీన విజయవాడలోని ఐలాపురం హోటల్లో రాష్ట్రస్థాయి సమావేశం నిర్వహించనున్నట్లు బ్రాహ్మణ వేద విజ్ఞాన పరిషత్ వెల్లడించింది. సోమవారం గాంధీనగర్ స్థానిక ప్రెస్ క్లబ్లో జరిగిన మీడియా సమావేశంలో పరిషత్ చైర్మన్ డి.వి. బాలసుబ్రమణ్యం, ప్రముఖ న్యాయవాది చుండూరు సుందర రామశర్మ ఈ వివరాలను వెల్లడించారు.
ఈ సమావేశానికి సంబంధించిన ముఖ్యాంశాలు…నిష్పాక్షిక వేదిక ఈ సమావేశానికి ఎటువంటి రాజకీయ పార్టీలతో సంబంధం లేదు, అందరూ కేవలం బ్రాహ్మణులుగా మాత్రమే హాజరై తమ అమూల్యమైన సలహాలు అందించాలని వారు కోరారు. ముఖ్యమైన చర్చాంశాలు ప్రధానంగా బ్రాహ్మణ సత్రాలు, ఈనాం భూములు, వ్యక్తిగత ఆస్తుల రక్షణతో పాటు వేద పాఠశాలలు, పండితులు, అర్చకుల సంక్షేమంపై ఈ సమావేశంలో విస్తృతంగా చర్చించనున్నారు. ప్రభుత్వానికి నివేదిక ప్రస్తుత బ్రాహ్మణ కార్పొరేషన్ చైర్మన్ బుచ్చిరామ ప్రసాద్ హయాంలో సంస్థను మరింత బలోపేతం చేసేందుకు, కొత్త పథకాల రూపకల్పనకు అవసరమైన ప్రతిపాదనలను నివేదిక రూపంలో ప్రభుత్వానికి అందజేయనున్నారు. రాజకీయ చైతన్యం ఇతర రాష్ట్రాల్లో బ్రాహ్మణులు రాజకీయంగా సాధిస్తున్న విజయాలను స్ఫూర్తిగా తీసుకుని, ఆంధ్రప్రదేశ్లోనూ అదే దిశగా అడుగులు వేయడమే తమ లక్ష్యమని పరిషత్ ప్రతినిధులు పేర్కొన్నారు. ఈ రాష్ట్రస్థాయి సమావేశానికి రిటైర్డ్ ఐఏఎస్, ఐపీఎస్ అధికారులు, వైద్యులు, న్యాయవాదులు, మరియు కళాకారులు హాజరుకానున్నారు. ఈ కార్యక్రమంలో బ్రాహ్మణ సేవా సంఘం గౌరవాధ్యక్షులు కె.బి.వి. బలరామకృష్ణమూర్తి, బ్రాహ్మణ శక్తి పీఠం కార్యదర్శి వేమూరి పల్లవి, కళ్యాణ్ కృష్ణ, టి.వి.రమణమూర్తి తదితరులు పాల్గొన్నారు.
