Prajavartha Online Telugu News
-బ్రెస్ట్ ఫీడింగ్‌పై పోస్టర్లను విడుదల చేసిన స్పెషల్ చీఫ్ సెక్రటరీ ఎం.టి కృష్ణబాబు
అమరావతి, నేటి పత్రిక ప్రజావార్త :
“తల్లి పాలివ్వడాన్ని మెరుగుపరిచే ప్రయత్నాలను బలోపేతం చేయడానికి, ప్రతి ఏడాది ఆగస్టు 1 నుండి 7వ తేదీ వరకు ప్రపంచ తల్లిపాల వారోత్సవాలను ప్రపంచ వ్యాప్తంగా నిర్వహిస్తారు. ఇందులో భాగంగా “అంతరాలు లేకుండా అందరికీ తల్లిపాల మద్దతు” అనే థీమ్‌తో నిర్వహిస్తున్నాం అని ఆరోగ్య, కుటుంబ సంక్షేమ శాఖ ప్రత్యేక ప్రధాన కార్యదర్శి ఎం.టి.కృష్ణబాబు తెలిపారు. బుధవారం వెలగపూడిలోని ఏపీ సెక్రటేరియట్‌లోని 5వ బ్లాక్ కాన్ఫరెన్స్ హాల్‌లో వైద్యఆరోగ్య శాఖ రూపొందించిన ఇన్ఫర్మేషన్ ఎడ్యుకేషన్ అండ్ కమ్యూనికేషన్ (ఐఇసి) మెటీరియల్‌ను కృష్ణబాబు ఆవిష్కరించారు. . వైద్య ఆరోగ్య శాఖ కార్యదర్శి డాక్టర్ మంజుల .డి.హోస్ మని , ఆరోగ్య కుటుంబ సంక్షేమ శాఖ కమీషనర్ సి.హరికిరణ్, సెకండరీ హెల్త్ డైరెక్టర్ అట్టాడ సిరి , ఎపిఎంఎస్ ఐడిసి మేనేజింగ్ డైరెక్టర్ డాక్టర్ జి.లక్ష్మీ షా , డిఎంఇ డాక్టర్ నరసింహం , జాయింట్ డైరెక్టర్ (చైల్డ్ హెల్త్ & ఇమ్యునైజేషన్) డాక్టర్ అర్జునరావు పాల్గొన్నారు. “తల్లులు మరియు కుటుంబ సభ్యులతో కూడిన ప్రాంతాలు, కమ్యూనిటీ స్థాయిలో రాష్ట్రంలో తల్లిపాల వారోత్సవాలు జరుపుకుంటామని ఈ సందర్భంగా కృష్ణబాబు తెలిపారు. “ప్రచార సమయంలో, పుట్టిన ఒక గంటలోపు తల్లిపాలను అందించడం, మొదటి ఆరు నెలలు ప్రత్యేకంగా తల్లిపాలు ఇవ్వడం, రెండేళ్ల వరకు తల్లిపాలను కొనసాగించడంతో పాటు సురక్షితమైన పోషకాహారాన్ని పరిచయం చేయడంపై అవగాహన కల్పించడానికి ప్రచార కార్యక్రమాలు నిర్వహిస్తున్నట్లు ఆయన వివరించారు. ఇన్‌ఫెక్షన్లు మరియు పోషకాహారలోపానికి వ్యతిరేకంగా ఒక శక్తివంతమైన రక్షణ కవచాన్ని అందించడానికి మరియు పిల్లలలో మెదడు అభివృద్ధిని పెంచడానికి ఏడాది వయస్సు లేదా అంతకంటే ఎక్కువ సంవత్సరాలు తల్లిపాల పోషణ అవసరమని ఆయన అన్నారు. ప్రపంచ తల్లిపాల వారోత్సవ కార్యక్రమాన్ని రాష్ట్రంలో శ్రీ సత్యసాయి జిల్లా ధర్మవరంలోని సాయి నగర్‌ యుపిహెచ్‌సి లో ఆరోగ్య కుటుంబ సంక్షేమ శాఖ మంత్రి శ్రీ సత్యకుమార్ యాదవ్ ఆగస్టు 1న ప్రారంభిస్తారన్నారు. దీనితోపాటే జిల్లా కలెక్టర్ల సమక్షంలో ఈ కార్యక్రమాన్ని అన్ని జిల్లాల్లో ఏకకాలంలో ప్రారంభించనున్నట్లు ఆయన తెలిపారు. అన్ని జిల్లాల డిఎం&హెచ్ఓలు వారం రోజుల పాటు తల్లిదండ్రులు , కుటుంబ సభ్యులకు అవగాహన పెంపొందించటం, వారితో సమావేశాన్ని నిర్వహించడం, తల్లి పాలివ్వడాన్ని ముందుగానే ప్రారంభించడం యొక్క ప్రాముఖ్యతపై వైద్య సిబ్బందికి అవగాహన కల్పిడం వంటి కార్యక్రమాల్ని నిర్వహిస్తారన్నారు. ఎఎన్సి క్లినిక్‌లలో కాబోయే తల్లులకు ముందుగా తల్లిపాలు పట్టడం గురించి అవగాహన కల్పించడం ఆయా కేంద్రాల స్థాయిలో కౌన్సెలింగ్ సెషన్‌లు నిర్వహిస్తారన్నారు. సాంఘిక సంక్షేమ శాఖ, ఐసిడిఎస్, పంచాయతీ రాజ్, గ్రామీణాభివృద్ధి, మునిసిపల్ తదితర శాఖలు మరియు యునిసెఫ్ & నూరాహెల్త్ ఆర్గనైజేషన్ వంటి భాగస్వాములతో కూడిన బృందాలు తల్లి పాలివ్వడాన్ని ప్రోత్సహించడానికి కన్వర్జెన్స్ కార్యకలాపాలపై దృష్టి సారిస్తాయన్నారు. తల్లిపాల ప్రాముఖ్యత యొక్క సందేశం అన్ని స్థాయిలకూ చేరేలా ఈ ఐఇసి మెటీరియల్‌ని అందిస్తున్నామని, ఇది అన్ని ప్రజారోగ్య కేంద్రాలలోని ప్రముఖ ప్రదేశాలలో ప్రదర్శిస్తారని కృష్ణబాబు వివరించారు
