గుంతకల్లు & ఉరవకొండ నియోజకవర్గాలలో జనసేన ఉద్యమీ కార్యక్రమం

అనంతపురం, నేటి పత్రిక ప్రజావార్త :
అనంతపురం పార్లమెంట్ పరిధిలోని గుంతకల్లు మరియు ఉరవకొండ నియోజకవర్గాలలో జనసేన పార్టీ నిర్వహించిన “ఉద్యమి సభ్యత్వ కార్యక్రమాలు” అత్యంత ఉత్సాహభరిత వాతావరణంలో ఘనంగా జరిగాయి. ఈ రెండు కార్యక్రమాలకు ఆంధ్రప్రదేశ్ రాష్ట్ర హస్తకళల అభివృద్ధి సంస్థ చైర్మన్, జనసేన పార్టీ రాష్ట్ర పీఏసీ సభ్యులు, ఉమ్మడి చిత్తూరు జిల్లా జనసేన పార్టీ అధ్యక్షులు, అనంతపురం పార్లమెంట్ జనసేన ఉద్యమి సమన్వయకర్త డా. పసుపులేటి హరిప్రసాద్ ముఖ్య అతిథిగా హాజరై సభ్యత్వ నమోదు కార్యక్రమాలను ప్రారంభించి కార్యకర్తలకు విస్తృత మార్గదర్శకత్వం అందించారు. గుంతకల్ పట్టణంలోని స్థానిక మున్సిపల్ కార్యాలయం వద్ద గుంతకల్లు జనసేన పార్టీ ఇంచార్జ్ వాసగిరి మణికంఠ  ఆధ్వర్యంలో డా. హరిప్రసాద్ కి ఘన స్వాగతం పలికారు. పామిడి మండలం అధ్యక్షులు ధనుంజయ్, గుత్తి పట్టణ అధ్యక్షులు పాటిల్ సురేష్, గుత్తి మండల అధ్యక్షులు చిన్న వెంకటేశులు, గుంతకల్లు పట్టణ అధ్యక్షులు బండీ శేఖర్, గుంతకల్లు మండల అధ్యక్షులు కురువ పురుషోత్తం, అనంతపురం జిల్లా సీనియర్ నాయకులు కూరగాయల లక్ష్మీపతి, ఇతర పట్టణ మరియు మండల నాయకులు, జనసైనికులు, వీరమహిళలు భారీగా పాల్గొన్నారు. అనంతరం ఉరవకొండలోని ఒక ప్రముఖ కల్యాణ మండపంలో నిర్వహించిన సభ్యత్వ కార్యక్రమానికి కూడా డా. హరిప్రసాద్ ముఖ్య అతిథిగా విచ్చేసి కార్యక్రమాన్ని ప్రారంభించారు. ఉరవకొండ ఇంచార్జ్ గౌతమ్ ఆధ్వర్యంలో సుధీర్, చంద్ర, నగేష్, గోపాల్, రాజేష్, రవి నాయక్, రమేష్ తదితరులు పెద్ద సంఖ్యలో పాల్గొన్నారు. ఉరవకొండ నియోజకవర్గ కార్యకర్తలు విశేష ఉత్సాహంతో సభ్యత్వ నమోదు చేపట్టి పార్టీ పట్ల తమ నిబద్ధతను చాటుకున్నారు.
ఈ సందర్భంగా గుంతకల్లు మరియు ఉరవకొండ నియోజకవర్గాలను ఉద్దేశించి డా. పసుపులేటి హరిప్రసాద్ విస్తృతంగా మాట్లాడుతూ, “ఉద్యమి సభ్యత్వం ఒక ఫార్మాలిటీ కాదు, ఇది పార్టీ భవిష్యత్తుకు బలమైన పునాది. సభ్యత్వం తీసుకోవడం అంటే కేవలం ఒక కార్డు పొందడం కాదు; అది బాధ్యత, కట్టుబాటు, సిద్ధాంతాల పట్ల నిబద్ధతకు సంకేతం” అని పేర్కొన్నారు. “ప్రతి కార్యకర్త పార్టీ ముఖచిత్రం. గ్రామ స్థాయిలోనైనా, బూత్ స్థాయిలోనైనా పార్టీని ప్రజల మధ్య బలోపేతం చేయాలంటే సభ్యత్వం విస్తృతంగా నమోదు కావాలి. సభ్యత్వం ఉన్నవారికే భవిష్యత్తులో నాయకత్వ అవకాశాలు, కమిటీ బాధ్యతలు లభిస్తాయి. సభ్యత్వం నుండి నాయకత్వం వరకు ప్రయాణం క్రమశిక్షణతో సాగాలి” అని స్పష్టం చేశారు. అలాగే, యువతకు ప్రత్యేకంగా పిలుపునిస్తూ, “రాజకీయాల్లో మార్పు తీసుకురావాలంటే యువశక్తి ముందుకు రావాలి. జనసేన సిద్ధాంతాలు సామాజిక న్యాయం, పారదర్శక పాలన, అవినీతి రహిత వ్యవస్థ, బలహీన వర్గాల అభివృద్ధి కోసం కట్టుబడి ఉన్నాయి. ఈ ఆశయాలను ప్రతి ఇంటికి తీసుకెళ్లే బాధ్యత మీది” అని అన్నారు. మహిళలు, రైతులు, కార్మికులు కూడా పెద్ద ఎత్తున సభ్యత్వంలో చేరి ఉద్యమాన్ని బలోపేతం చేయాలని కోరారు. గుంతకల్లు మరియు ఉరవకొండ నియోజకవర్గాలను సభ్యత్వ నమోదు విషయంలో రాష్ట్రంలోనే ముందంజలో నిలపాలని లక్ష్యంగా పెట్టుకోవాలని సూచించారు. “ఐక్యత, క్రమశిక్షణ, సమన్వయం ఉంటే ఏ లక్ష్యాన్నైనా సాధించగలం. రెండు నియోజకవర్గాల్లో కనిపించిన ఉత్సాహం పార్టీ భవిష్యత్తుకు శుభసూచకం” అని విశ్వాసం వ్యక్తం చేశారు.
ఈ విధంగా గుంతకల్లు మరియు ఉరవకొండ నియోజకవర్గాలలో నిర్వహించిన జనసేన ఉద్యమి సభ్యత్వ కార్యక్రమాలు భారీ స్పందనతో విజయవంతంగా ముగిశాయి.