-ఇటు వినాయక గుడి, అటు కుమ్మరిపాలెం సెంటర్ మీదుగా ఎరుపెక్కిన ఇంద్రకీలాద్రి మార్గాలు
-అహర్నిశలు శ్రమిస్తున్న దేవస్థానం, పోలీస్ సిబ్బంది – అండగా నిలుస్తున్న దేవస్థానం అధికారులు
-సీతమ్మవారి పాదాలు, ఓం టర్నింగ్ వద్ద రద్దీని సమర్థవంతంగా అదుపులోకి తెచ్చిన అధికారులు
-క్షేత్రస్థాయిలో విస్తృతంగా పర్యవేక్షిస్తున్న చైర్మన్, ఈవో, బోర్డు సభ్యులు, ఏఈవోల బృందం
-సాయంత్రం 5 గంటల వరకు 1,39,000 మందికి దర్శనం – 10 రోజుల్లో 31 లక్షల వాటర్ బాటిళ్ల పంపిణీ
ఇంద్రకీలాద్రి, నేటి పత్రిక ప్రజావార్త :
శ్రీ దుర్గా మల్లేశ్వర స్వామి వార్ల దేవస్థానానికి అన్ని దారులూ దారితీస్తున్నాయి. శ్రీ కనకదుర్గ అమ్మవారి దర్శనార్థం తరలివస్తున్న భవానీ భక్తులు, సాధారణ భక్తుల రద్దీతో విజయవాడ నగరం భక్తి సాగరమైంది. ఇటు వన్ టౌన్ వినాయక గుడి నుండి, అటు కుమ్మరిపాలెం సెంటర్ మీదుగా భక్తుల ప్రవాహం పోటెత్తడంతో ఆలయ పరిసరాలు ఎరుపు వర్ణ శోభతో పులకించిపోతున్నాయి.
ఈరోజు సాయంత్రం 5:00 గంటల సమయానికి 1,39,000 మంది భక్తులు శ్రీ అమ్మవారిని దర్శించుకున్నారు.
ప్రస్తుతం ఘాట్ రోడ్డులోని వివిధ హోల్డింగ్ ఏరియాలు, స్నానాల రేవులలో మరో 35,000 మంది భక్తులు దర్శనార్థం వేచి ఉన్నారు. ఉత్తరాంధ్ర జిల్లాలతో పాటు ఉభయ గోదావరి జిల్లాల నుంచి భవానీ భక్తులు ఇప్పటికే ప్రత్యేక రైళ్లు, ఆర్టీసీ బస్సులు మరియు ప్రైవేటు వాహనాలలో భారీ ఎత్తున విజయవాడకు తరలివస్తున్నారు.
పోటెత్తిన భక్తజన ప్రవాహాన్ని నియంత్రించడంలో దేవస్థానం అధికారులు, సిబ్బంది, నగర పోలీస్ యంత్రాంగం అహర్నిశలు విశ్రాంతి లేకుండా శ్రమిస్తున్నారు. విధుల్లో తీవ్రంగా అలసి సొలసిన సిబ్బందికి దేవస్థానం ఈవో వి.కె. శీనా నాయక్ స్వయంగా బాసటగా నిలుస్తూ, వారికి తగిన సదుపాయాలు కల్పిస్తూ నిరంతరం వెన్నుతట్టి ప్రోత్సహిస్తున్నారు.
సీతమ్మవారి పాదాల నుండి వినాయక ఆలయం వైపు ప్రవాహంలా వస్తున్న భక్తులను, అటు కొండమీద ఓం టర్నింగ్ నుండి చిన్న రాజగోపురం వైపు సాగుతున్న భక్తజనాన్ని నియంత్రించడం సిబ్బందికి అత్యంత కష్టసాధ్యంగా మారినప్పటికీ, దేవస్థానం మరియు పోలీస్ సిబ్బంది వెంటనే సమన్వయంతో స్పందించి పరిస్థితిని వేగంగా అదుపులోకి తీసుకువచ్చారు.
అలాగే భక్తుల రద్దీ దృష్ట్యా లడ్డూ ప్రసాదం కౌంటర్ల వద్ద ప్రత్యేక నియంత్రణ చర్యలు చేపట్టి ఎటువంటి తొక్కిసలాట జరగకుండా ఏర్పాట్లు చేశారు.
ఆలయ చైర్మన్ బొర్రా రాధాకృష్ణ (గాంధీ), కార్యనిర్వహణాధికారి వి.కె. శీనా నాయక్, సభ్యులు శ్రీనివాసరావు నిరంతరం క్యూలైన్లు, ఘాట్ రోడ్డు ప్రాంగణాల్లో విస్తృతంగా పర్యటిస్తూ భక్తులకు ఎదురవుతున్న ఇబ్బందులను ఎప్పటికప్పుడు అక్కడికక్కడే పరిష్కరిస్తున్నారు.
ఆలయ ఈఈ రమాదేవి, సహాయ కార్యనిర్వహణాధికారులు చంద్రశేఖర్, రమేష్ బాబు, డాక్టర్ కె. గంగాధర్, సుధారాణి, లక్ష్మి ప్రసన్న క్షేత్రస్థాయిలో ఉంటూ అటు పోలీసు విభాగంతో, ఇటు దేవస్థాన సిబ్బందితో సమన్వయం చేసుకుంటూ అద్భుతమైన టీమ్ వర్క్‌తో దర్శనాలు సాఫీగా సాగేలా పర్యవేక్షిస్తున్నారు.
భక్తుల రద్దీని దృష్టిలో ఉంచుకుని భవానీ ఘాట్‌లో దేవస్థానం షవర్లతో జల్లు స్నానాల ఏర్పాట్లు చేసింది.
దేవస్థాన నిధులతో విజయవాడ మున్సిపల్ కార్పొరేషన్ సమన్వయంతో గత 10 రోజుల్లో రికార్డు స్థాయిలో 31 లక్షల మంచినీటి బాటిళ్లను ఉచితంగా పంపిణీ చేశారు.
కొండదిగువన ఉన్న అన్నప్రసాద భవనంలో భక్తులందరికీ నిరంతరాయంగా వేడివేడిగా అన్నప్రసాద వితరణ కొనసాగుతోంది.
రద్దీ మరింత పెరిగే అవకాశం ఉన్నందున అన్ని విభాగాల అధికారులు, సిబ్బంది అప్రమత్తంగా ఉంటూ భక్తులకు విశేష సేవలందిస్తున్నారు.
