వారాంతపు గ్రీవెన్స్ డే సందర్భంగా రైతుల నుంచి పిటిషన్లు స్వీకరించిన ఏపీ సీఆర్డీఏ కమిషనర్ కె. కన్నబాబు

అమరావతి, నేటి పత్రిక ప్రజావార్త :
అమరావతి రాజధాని ప్రాంత రైతులు ఎదుర్కొంటున్న సమస్యల పరిష్కారార్థం రాయపూడిలోని ఏపీ సీఆర్డీఏ ప్రాజెక్టు కార్యాలయంలో వారాంతపు గ్రీవెన్స్ డే కార్యక్రమం నిర్వహించబడింది.

గ్రీవెన్స్ డే కార్యక్రమానికి ముందు ఉదయం 9.00 గంటలకు ఏపీ సీఆర్డీఏ కమిషనర్ కె. కన్నబాబు, ఐఏఎస్, గ్రీవెన్స్ అధికారులతో మరియు క్వాలిటీ చెక్ కమిటీ సభ్యులతో సమీక్షా సమావేశం నిర్వహించారు. ఈ సందర్భంగా శాఖల వారీగా పరిష్కరించిన ఫిర్యాదుల నాణ్యతను పరిశీలించిన కమిషనర్, ఖచ్చితత్వం, వేగవంతమైన చర్యలు మరియు సరైన ఫిర్యాదుల పరిష్కారంపై ప్రత్యేక దృష్టి సారించాలని అధికారులకు ఆదేశాలు జారీ చేశారు.

అనంతరం రైతులు కమిషనర్‌ను కలసి రిటర్నబుల్ ప్లాట్లు, అసైన్‌డ్ భూములు, అన్యుటీ చెల్లింపులు, లంక భూములు, నైపుణ్యాభివృద్ధి తదితర అంశాలపై పిటిషన్లు సమర్పించారు. ఈ సందర్భంగా కమిషనర్ సంబంధిత అధికారులను తక్షణమే చర్యలు చేపట్టాలని ఆదేశిస్తూ, లంక భూములు, అసైన్‌డ్ భూములు సహా అన్ని సమస్యలను ప్రభుత్వ మార్గదర్శకాలకు అనుగుణంగా పరిష్కరిస్తామని రైతులకు హామీ ఇచ్చారు.

గ్రీవెన్స్ డే కార్యక్రమంలో ఏపీ సీఆర్డీఏకి చెందిన వివిధ శాఖల అధికారులు పాల్గొని ఎక్కువ శాతం ఫిర్యాదులను అక్కడికక్కడే పరిష్కరించారు. మిగిలిన ఫిర్యాదులపై త్వరితగతిన చర్యలు తీసుకొని పరిష్కారం అందిస్తామని అధికారులు భరోసా ఇచ్చారు.

ఈ గ్రీవెన్స్ డేలో మొత్తం 46 ఫిర్యాదులు అందగా, వాటి వివరాలు ఇలా ఉన్నాయి:

భూసంబంధిత సమస్యలు – 43

కార్యాలయ నిర్వహణ – 1

సామాజిక అభివృద్ధి – 1

సామాజిక అభివృద్ధి (ఇంజినీరింగ్) – 1

ఈ కార్యక్రమంలో డైరెక్టర్ (ల్యాండ్స్ – క్యాపిటల్ సిటీ) వసంత రాయుడు, చీఫ్ ఇంజినీర్ జి. వెంకటేశ్వర రావు, జీఆర్‌ఎం నోడల్ ఆఫీసర్ పి. జయశ్రీ, ప్రత్యేక డిప్యూటీ కలెక్టర్లు ఎం. శేషిరెడ్డి, కె.ఎస్. భాగ్యరేఖ, పి. పద్మావతి, ఏ.జి. చిన్నికృష్ణ, జి. రవీందర్, జాయింట్ డైరెక్టర్ (ఎస్టేట్స్ విభాగం) వి. డేవిడ్ రాజు, డిప్యూటీ ఇన్‌స్పెక్టర్ ఆఫ్ సర్వే (ఎల్.ఏ) ఎస్. రవీంద్ర ప్రసాద్, జోనల్ జాయింట్ డైరెక్టర్ (డెవలప్‌మెంట్ ప్రమోషన్) చ. మధుసూధన రావు, తహసీల్దార్ ఎస్. రవీంద్ర ప్రసాద్, ఏడి సర్వే (ఇన్‌చార్జ్), డిప్యూటీ ఇన్‌స్పెక్టర్ ఆఫ్ సర్వే (ఎల్.ఏ) తదితర అధికారులు పాల్గొన్నారు.

ప్రతి శనివారం ఉదయం 10.00 గంటల నుండి మధ్యాహ్నం 1.00 గంటల వరకు నిర్వహించబడే గ్రీవెన్స్ డే కార్యక్రమాన్ని రైతులు సద్వినియోగం చేసుకొని తమ సమస్యలను తెలియజేసి సకాలంలో పరిష్కారం పొందాలని ఏపీ సీఆర్డీఏ కోరుతోంది.