9, 10 తేదీలలో క్రెడాయ్ ప్రాపర్టీ షో

విజయవాడ, నేటి పత్రిక ప్రజావార్త :
ఈనెల 9,10 తేదీలలో క్రెడాయ్ విజయవాడ 7వ ప్రాపర్టీ షోను నగరంలోని ఎస్.ఎస్ కన్వెన్షన్ హాల్ నందు నిర్వహిస్తున్నామని క్రెడాయ్ విజయవాడ అధ్యక్షులు కే.రాజేంద్ర తెలిపారు.ఈ మేరకు గురువారం, పివిపి మాల్, గ్రాండ్ మినర్వా హోటల్ నందు క్రెడాయ్ విజయవాడ 7వ ప్రాపర్టీ షో కరపత్రమును ఆవిష్కరించారు. ఈ సందర్భంగా ఆయన మాట్లాడుతూ కరోనా తర్వాత నగరంలో అతిపెద్ద క్రెడాయ్ విజయవాడ ప్రోపర్టీ షో ను రెండు రోజుల పాటు నిర్వహిస్తున్నామని, దాదాపు గా 100 ప్రాజెక్టులు పైగా ప్రదర్సిస్తున్నామని ప్రఖ్యాత బిల్డర్స్, డెవలపర్స్ పాల్గొంటారని తెలియజేశారు. ప్రారంభానికి మంత్రి బొత్స సత్యనారాయణ ముఖ్యఅతిథిగా విచ్చేస్తారని తెలిపారు. విజయవాడ 7 వ ప్రోపర్టీ షో కోసం ఎంతో ఆసక్తిగా ఎదురుచూస్తున్న కర్టెన్ రైజర్ ఈవెంట్‌కి ప్రచురణ బృందాన్ని తాము స్వాగతిస్తున్నామన్నారు. క్రెడాయ్ విజయవాడ అనేది భారత రియల్ ఎస్టేట్ డెవలపర్స్ అసోసియేషన్స్ కాన్ఫెడరేషన్ యొక్క చాప్టర్ అని, రియల్ ఎస్టేట్ రంగంలో నాణ్యత, నమ్మకం లో తాము ముందంజలో ఉందన్నారు. అంతేకాక స్థానికేతర స్థాయితో పాటు రాష్ట్ర స్థాయి రియల్ ఎస్టేట్ మార్కెట్లకు నాణ్యతను, విశ్వసనీయతను ధృవీకరించే గృహ కొనుగోలుదారులలో విశ్వాసాన్ని పెంపొందిస్తుందన్నారు. ఇది రాష్ట్ర ఆర్థిక వ్యవస్థ కొత్త వృద్ధి మైలురాళ్లను చేరుకోవడానికి సహాయపడుతుందన్నారు. గృహ కొనుగోలుదారులకు అన్ని ఉత్పత్తులు ఒకే చోట ఉండేలా తగిన సౌకర్యాలు కల్పించే విధంగా నమ్మకమైన సేవలను అందిస్తున్నామన్నారు. గత ఆరు సంవత్సరాలుగా క్రెడాయ్ ప్రభుత్వంలో మరుగుదొడ్ల నిర్మాణం వంటి అనేక కార్పొరేట్ సామాజిక బాధ్యత (సి.యస్.ఆర్) ప్రాజెక్టులను పూర్తి చేసిందన్నారు. పాఠశాలలు, విజయవాడ నగరంలో గ్రీన్ ప్లాంటేషన్, టీటీడీ దేవస్థానానికి తాజా కూరగాయల ఉచిత పంపిణీ, కోవిడ్ కాలంలో ప్రజలకు అవసరమైన ఉచిత వైద్య శిబిరాలు, కోవిడ్ కాలంలో నిర్మాణ కార్మికులకు ఆహారం అందించడం మొదలైనవి అందజేశామని తెలిపారు. సమావేశంలో క్రెడాయ్ విజయవాడ ప్రధాన కార్యదర్శి కె రమేష్ అంకినీడు, ఉపాధ్యక్షులు కే వి వి రవి కుమార్, కె తేజేశ్వరరావు, కోశాధికారి వి. శ్రీధర్ తదితరులు పాల్గొన్నారు.