శ్రీవారి నైవేద్యం కల్తీపై జగన్ బ్యాచ్ సమాధానం చెప్పాలి

– దోషులకు కఠిన శిక్ష తప్పదు
– ఎమ్మెల్యే ఆరాణి శ్రీనివాసులు, డా. పసుపులేటి హరిప్రసాద్

తిరుపతి, నేటి పత్రిక ప్రజావార్త :
శ్రీవారి నైవేద్యంలో నెయ్యి కల్తీ జరిగిందన్న అంశంపై తిరుపతిలో ఏర్పాటు చేసిన మీడియా సమావేశంలో ఎమ్మెల్యే ఆరాణి శ్రీనివాసులు, ఆంధ్రప్రదేశ్ హస్తకళా నైపుణ్యాభివృద్ధి సంస్థ చైర్మన్, జనసేన పార్టీ రాజకీయ వ్యవహారాల కమిటీ (PAC) సభ్యులు, ఉమ్మడి చిత్తూరు జిల్లా అధ్యక్షులు డా. పసుపులేటి హరిప్రసాద్ పాల్గొని తీవ్రంగా స్పందించారు.
తిరుపతి ఎమ్మెల్యే ఆరాణి శ్రీనివాసులు మాట్లాడుతూ — శ్రీవేంకటేశ్వర స్వామి ఆలయం కోట్లాది భక్తుల విశ్వాసానికి కేంద్రబిందువు అని పేర్కొన్నారు. అలాంటి పవిత్ర నైవేద్యంలో కల్తీ జరిగిందని ఎన్‌డీడీబీ నిర్ధారించడం అత్యంత తీవ్రమైన విషయం అన్నారు. ఇది కేవలం పరిపాలనా వైఫల్యం కాదు, భక్తుల ఆత్మగౌరవంపై జరిగిన దాడి అని మండిపడ్డారు.
ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్ కళ్యాణ్, బిజెపి రాష్ట్ర అధ్యక్షుడు మాధవ్ సంయుక్తంగా నిజాలను ప్రజల ముందుంచగానే జగన్ మోహన్ రెడ్డి బ్యాచ్‌లో భయం మొదలైందన్నారు. నిజాన్ని ఎదుర్కోలేక దారి మళ్లించే రాజకీయాలు చేస్తున్నారని విమర్శించారు.
మాజీ టిటిడి చైర్మన్ వైవీ సుబ్బారెడ్డి నెయ్యి కల్తీ జరిగిందని అంగీకరించగా, కరుణాకర్ రెడ్డి మాత్రం జరగలేదని చెప్పడం ప్రజలను తప్పుదోవ పట్టించే ప్రయత్నమన్నారు. ఒకే అంశంపై విరుద్ధ ప్రకటనలు రావడం వెనుక అసలు నిజాన్ని దాచిపెట్టే కుట్ర ఉందని ఆరోపించారు.
“శ్రీవారి నైవేద్యం రాజకీయ ప్రయోగాలకు వేదిక కాదు. పవిత్రతను కాపాడలేని వారికి ప్రజల ముందు మాట్లాడే నైతిక హక్కు లేదు” అని ఎమ్మెల్యే ఆరాణి శ్రీనివాసులు స్పష్టం చేశారు.
ఈ సందర్బంగా డా. పసుపులేటి హరిప్రసాద్ మాట్లాడుతూ — శ్రీవేంకటేశ్వర స్వామి సన్నిధి కోట్లాది హిందువుల ఆత్మగౌరవానికి ప్రతీక అని పేర్కొన్నారు. అలాంటి పవిత్ర నైవేద్యంలో ఉపయోగించే నెయ్యి విషయంలో కల్తీ జరిగిందని నిర్ధారణ కావడం సాధారణ విషయం కాదన్నారు. భక్తుల విశ్వాసాన్ని దెబ్బతీసిన వారికి చట్టపరమైన చర్యలు తప్పవని హెచ్చరించారు.
మూడున్నర సంవత్సరాలు టిటిడి చైర్మన్‌గా పనిచేసిన కరుణాకర్ రెడ్డి తన పదవీకాలంలో జరిగిన వ్యవహారాలపై స్పష్టత ఇవ్వాలని డిమాండ్ చేశారు. జనసేన అధ్యక్షులు పవన్ కళ్యాణ్ పై విమర్శలు చేసి అసలు విషయాన్ని మళ్లించే ప్రయత్నాలు ఫలించవని తెలిపారు.
వైసీపీ బ్యాచ్ చేసింది కేవలం కల్తీ కాదు — ఇది భక్తుల విశ్వాసాన్ని మోసం చేసిన చర్య అని తీవ్రంగా విమర్శించారు. శ్రీవారి పేరుతో రాజకీయ లాభం పొందాలని చూసిన ప్రతి ఒక్కరిపై చట్టపరంగా చర్యలు తప్పవని హెచ్చరించారు.
డిమాండ్లు:
• ఈ వ్యవహారంపై హై లెవల్ జ్యుడీషియల్ ఇన్క్వైరీ లేదా సీబీఐ విచారణ నియమించాలి.
• టిటిడి నెయ్యి కొనుగోలు, సరఫరా వ్యవస్థపై పూర్తి స్థాయి ఆడిట్ నిర్వహించాలి.
• బాధ్యుల పేర్లు బహిర్గతం చేసి తక్షణ చర్యలు తీసుకోవాలి.
• భక్తులకు పారదర్శక నివేదిక విడుదల చేయాలి.
ధర్మాన్ని కాపాడే పోరాటంలో ఎన్డీఏ కూటమి వెనక్కి తగ్గదని ఇద్దరు నేతలు స్పష్టం చేశారు.
ఈ సమావేశంలో తిరుపతి నగరానికి చెందిన పార్టీ నాయకులు, ప్రజా ప్రతినిధులు, కార్యకర్తలు తదితరులు పాల్గొన్నారు.