విజయవాడలో ఘనంగా ముగిసిన ‘ఆంధ్రనాట్య సంగమం’ – నవ జనార్ధన పారిజాత నృత్య ప్రదర్శన

విజయవాడ, నేటి పత్రిక ప్రజావార్త :
నగరంలోని గవర్నర్‌పేటలో మాకినేని బసవపున్నయ్య విజ్ఞాన కేంద్రంలో ‘స్వరనర్తన’ సంగీత నృత్య శిక్షణ సంస్థ ఆధ్వర్యంలో నిర్వహించిన “ఆంధ్రనాట్య సంగమం” కార్యక్రమం ఆదివారం రాత్రి కళాప్రియుల మధ్య అత్యంత వైభవంగా ముగిసింది. కీ.శే. పద్మశ్రీ డా. నటరాజ రామకృష్ణ ఆశీస్సులతో, కేంద్ర సంగీత నాటక అకాడమీ అవార్డు గ్రహీత గురు డా. కళాకృష్ణ గారి పర్యవేక్షణలో జరిగిన ఈ కార్యక్రమం ఆంధ్రనాట్య వైభవాన్ని చాటింది.

ఈ సందర్భంగా పద్మామోహన్ దెందులూరి ప్రత్యేక *“నవ జనార్ధన పారిజాత”* నృత్య ప్రదర్శన ప్రేక్షకులను విశేషంగా ఆకట్టుకుంది. ఈ ప్రదర్శనకు గురు డా. కళాకృష్ణ నట్టువాంగం మరియు నృత్య దర్శకత్వం వహించారు. గత సంవత్సరం డిసెంబర్ 13, 2025న నిర్వహించిన ఆంధ్రనాట్య సంగమం పోటీలలో విజేతలైన విద్యార్థులు తమ నృత్య ప్రతిభతో సభను మంత్రముగ్ధులను చేశారు.

కార్యక్రమానికి సభాధ్యక్షులుగా ఆంధ్రప్రదేశ్ పూర్వ ప్రధాన ముఖ్య అటవీ సంరక్షణాధికారి డా. దెందులూరి నళినీ మోహన్ IFS (R) హాజరయ్యారు. ముఖ్య అతిథులుగా శాసన సభ సభ్యులు మండలి బుద్ధప్రసాద్, ఏపీ సృజనాత్మకత మరియు సంస్కృతి కమిషన్ చైర్పర్సన్ తేజస్వి పొడపాటి, ఎన్టీఆర్ జిల్లా కలెక్టర్ లక్ష్మీశ, పొట్టి శ్రీరాములు తెలుగు విశ్వవిద్యాలయం ఉపాధ్యక్షులు ఆచార్య డి. మునిరత్నం నాయుడు, విశ్రాంత హైకోర్టు న్యాయమూర్తి ఏ.వి. శేషసాయి పాల్గొన్నారు. ఆత్మీయ అతిథులుగా పద్మశ్రీ ఉమామహేశ్వరి మరియు గురు డా. కళాకృష్ణ కార్యక్రమానికి ప్రత్యేక శోభను చేకూర్చారు.

కార్యక్రమం విజయవంతంగా నిర్వహించడంలో సహకరించిన కళాకారులు, గురువులు, అతిథులు, ప్రేక్షకులందరికీ ‘స్వరనర్తన’ వ్యవస్థాపకులు పద్మామోహన్ దెందులూరి, కర్నాటి నవత మరియు కార్యనిర్వాహక బృందం హృదయపూర్వక కృతజ్ఞతలు తెలిపారు.

ఆంధ్రనాట్య పరిరక్షణకు విజ్ఞప్తి
ఆంధ్రనాట్యాన్ని రాష్ట్రంలోని అన్ని ప్రభుత్వ సంగీత–నృత్య కళాశాలలలో ప్రత్యేక కోర్సుగా** ప్రవేశపెట్టాలని కళాభిమానులు ఆకాంక్షించారు. ఈ శాస్త్రీయ నృత్యరూపం ద్వారా ఆంధ్రుల సాంస్కృతిక వైభవం తరతరాలకు అందించబడుతుందన్నారు.

అదేవిధంగా, ఆంధ్రనాట్య పునరుజ్జీవనానికి ఎనలేని సేవలు అందించిన పద్మశ్రీ డా. నటరాజ రామకృష్ణ పేరుతో ఆంధ్రప్రదేశ్ ప్రభుత్వం ఒక ప్రతిష్టాత్మక రాష్ట్రస్థాయి పురస్కారాన్ని ఏర్పాటు చేయాలని సాంస్కృతిక వర్గాలు కోరాయి. ఇది ఆంధ్రనాట్య కళాకారులకు ప్రోత్సాహంగా నిలవడమే కాక, ఈ అపూర్వ నృత్య సంప్రదాయానికి గౌరవాన్ని చేకూర్చే మహత్తర నిర్ణయంగా నిలుస్తుందన్నారు.

విజేతల వివరాలు:
కార్యక్రమంలో జూనియర్ మరియు సీనియర్ విభాగాల్లో విజేతలకు బహుమతి ప్రదానం చేశారు.
జూనియర్స్: శారద రామకృష్ణ శిష్యులు
(ప్రథమ), తమ్మిన జోష్నా మరియు పెడమల్లు క్షీర సాగరిక (ద్వితీయ), కె. సాహితి లక్ష్మి (తృతీయ).
సీనియర్స్: శారద రామకృష్ణ శిష్యులు
(ప్రథమ), తణుకు సాయి మాధవి (ద్వితీయ), పి. ఉమామహేశ్వర పాత్రుడు (తృతీయ), మరియు రాయన శ్రీనివాసరావు (కన్సోలేషన్).