ఆరోగ్యశాఖ సిబ్బందికి ప్రత్యేక బిసిజి టీకా శిబిరం

అమరావతి, నేటి పత్రిక ప్రజావార్త :
గుంటూరు జిల్లా మంగళగిరిలోని 5వ అంతస్తులోని ఏపీఐఐసీ భవనంలోని ఆరోగ్య, కుటుంబ సంక్షేమ కమీషనర్ కార్యాలయంలో శుక్రవారం ఆరోగ్య శాఖ అధికారులు, సిబ్బందికి వయోజన బీసీజీ టీబీ వ్యాక్సినేషన్ సెషన్ నిర్వహించినట్లు జేడీ (టీబీ) డాక్టర్ టి.రమేష్ తెలిపారు. వయోజన బిసిజి టీకా ప్రత్యేక శిబిరాన్ని డాక్టర్ టి రమేష్ ప్రారంభించారు. ఈ ప్రత్యేక శిబిరంలో ఎపిఐఐసి భవనం, ఐహెచ్ సి భవనం & ఎపిఎంఎస్ఐడిసి భవనాలలో పని చేస్తున్న 49 మంది ఉద్యోగులకు టీకాలు వేశారు. స్టేట్ ఇమ్యునైజేషన్ అధికారి డాక్టర్ ఎల్బిఎస్ హెచ్ దేవి, హెల్త్ వెల్నెస్ సెంటర్ కు చెందిన డాక్టర్ అనూష, ఇతర ఆరోగ్య సిబ్బంది పాల్గొన్నారు. ఈ ప్రత్యేక శిబిరంలో కమీషనర్ పియస్ డి. అనిల్ కుమార్, ఎన్ హెచ్ఎం సిఎఓ ఆర్.గణపతిరావు బిసిజి టీకాలు వేసుకున్నారు. 7.06.2024న తాడేపల్లిలో ఎపి శాక్స్ బిల్డింగ్ లో తదుపరి వయోజన బిసిజి టీకా ప్రత్యేక శిబిరాన్ని నిర్వహిస్తామని డాక్టర్ టి.రమేష్ చెప్పారు. ఈ ప్రత్యేక కార్యక్రమాన్ని ఎపి శాక్స్ ఉద్యోగులు వినియోగించుకోవాలని ఆయన ఈ సందర్భంగా కోరారు. జాతీయ టిబి నిర్మూలన కార్యక్రమం ప్రకారం 2025 నాటికి దేశంలో టిబి నిర్మూలన యొక్క స్థిర అభివృద్ధి లక్ష్యాన్ని(SDG Goals) సాధించాలని ప్రభుత్వం లక్ష్యంగా నిర్ణయించుకుంది. టిబి తగ్గుదల యొక్క మెరుగైన రేటును సాధించడానికి బిసిజి టీకా తప్పనిసరి అని ఇప్పటికే స్పష్టమైన విషయం తెలిసిందే. పిల్లల కు ఇప్పటికే వేస్తున్న బిసిజి వ్యాక్సిన్ పూర్తి భద్రతతో నిరూపితమైన దీర్ఘకాల విధానం అని డాక్టర్ రమేష్ వివరించారు. బిసిజి టీకా సురక్షితంగా, ప్రభావవంతంగా ఉంటుందనే విషయం రుజువైందని ఆయన గుర్తు చేశారు. కేంద్ర ఆరోగ్య మరియు కుటుంబ సంక్షేమ మంత్రిత్వ శాఖ మార్గదర్శకాల మేరకు, ఆంధ్రప్రదేశ్ రాష్ట్రం దశలవారీగా బిసిజి టీకా కార్యక్రమాన్ని అమలు చేస్తోందని ఆయన వివరించారు. ఆరోగ్య మరియు కుటుంబ సంక్షేమ కమీషనర్ డాక్టర్ ఎస్.వెంకటేశ్వర్ ఆదేశాల మేరకు, తాము ఇప్పటికే రాష్ట్రంలోని 12 జిల్లాల్లో బిసిజి టిబి వ్యాక్సినేషన్‌ను చేపట్టామని ఆయన తెలిపారు.

60 ఏళ్లు పైబడిన వ్యక్తులందరూ, మధుమేహంతో బాధపడుతున్న వ్యక్తులు, 2018 నుండి తీసుకున్న టిబి చికిత్స యొక్క గత చరిత్ర ఉన్నవారు, టిబి రోగులతో సన్నిహిత పరిచయాలు (2021 నుండి). ఉన్నవారు, ధూమపానం అలవాటు ఉన్నవారు ఈ వయోజన బిసిజి వ్యాక్సినేషన్‌కు అర్హులని ఆయన వివరించారు.