ఇళ్ల స్థలాల కోసం సిపిఐ, వ్యవసాయ కార్మిక సంఘాల ఆధ్వర్యంలో సామూహిక అర్జీలను సమర్పించిన పేదలు

విజయవాడ, నేటి పత్రిక ప్రజావార్త :
పేదలకు పట్టణాల్లో 2 సెంట్లు గ్రామాల్లో 3 సెంట్లు చొప్పున ఇళ్ల స్థలాలు కేటాయించి, ఇంటి నిర్మాణానికి రూ. 5 లక్షల చొప్పున మంజూరు చేయాలని కోరుతూ సిపిఐ, ఆంధ్రప్రదేశ్ వ్యవసాయ కార్మిక సంఘాల రాష్ట్ర వ్యాప్తి పిలుపుమేరకు ఈరోజు రాష్ట్రవ్యాప్తంగా అన్ని జిల్లాలలో గ్రామ/వార్డు సచివాలయాల వద్ద పేదలు సామూహిక అర్జీలు సమర్పించి, చేపట్టిన ఆందోళన కార్యక్రమాలు జయప్రదంగా జరిగాయి. గుంటూరు జిల్లా మంగళగిరిలో సిపిఐ రాష్ట్ర సహాయ కార్యదర్శి ముప్పాళ్ళ నాగేశ్వరరావు; బాపట్ల జిల్లా చీరాలలో రాష్ట్ర కార్యదర్శివర్గ సభ్యులు, మాజీ ఎమ్మెల్సీ జల్లి విల్సన్; ఏలూరు జిల్లా చింతలపూడి నియోజకవర్గం, ఎర్రగుంటపల్లిలో రాష్ట్ర కార్యదర్శివర్గ సభ్యులు అక్కినేని వనజ; కర్నూలు కలెక్టరేట్ వద్ద భారీ స్థాయిలో జరిగిన కార్యక్రమంలో రాష్ట్ర కార్యదర్శి వర్గ సభ్యులు పి. రామచంద్రయ్య, కర్నూలు జిల్లా పార్టీ కార్యదర్శి బి. గిడ్డయ్య; వ్యవసాయ కార్మిక సంఘం రాష్ట్ర ప్రధాన కార్యదర్శి ఆవుల శేఖర్; గుంటూరు నగరంలో రాష్ట్ర కార్యదర్శివర్గ సభ్యులు జంగాల అజయ్ కుమార్; కృష్ణాజిల్లా గన్నవరంలో రాష్ట్ర కార్యదర్శివర్గ సభ్యులు కేవీవి ప్రసాద్; అనంతపురంలో జిల్లా పార్టీ కార్యదర్శి సీ. జాఫర్; విశాఖపట్నంలో జిల్లా పార్టీ కార్యదర్శి ఎం పైడిరాజు; ఎన్టీఆర్ జిల్లా మైలవరంలో ఆంధ్రప్రదేశ్ వ్యవసాయ కార్మిక సంఘం రాష్ట్ర అధ్యక్షులు సిహెచ్ కోటేశ్వరరావు తదితరులు పాల్గొన్నారు. రాష్ట్రవ్యాప్తంగా పలు జిల్లాల్లో సామూహిక అర్జీల సమర్పణ కార్యక్రమాలు అత్యంత జయప్రదంగా జరిగాయి.