Prajavartha Online Telugu News
విజయవాడ, నేటి పత్రిక ప్రజావార్త :
విజయవాడలో ‘పక్కా కమర్షియల్‌’ చిత్ర యూనిట్‌ సందడి చేసింది. జూలై ఒకటో తేదీన విడుదల కానున్న ఈ సినిమా ప్రమోషన్‌లో భాగంగా యూనిట్‌ సభ్యులు నగరంలోని రాజ్‌-యువరాజ్‌ (జీ3) థియేటర్లకు విచ్చేశారు. ఈ సందర్భంగా యూనిట్‌ మీడియా శనివారం సమావేశం నిర్వహించింది. హీరో గోపీచంద్‌ మాట్లాడుతూ ఈ చిత్రం చాలా అద్భుతంగా వచ్చిందని ఖచ్చితంగా సినీ అభిమానులను అలరించేలా వినోదాత్మకంగా పక్కా కమర్షియల్‌ సినిమా వుందన్నారు. అన్ని వర్గాల ప్రేక్షకులను అలరించే కామెడీ, యాక్షన్‌ సన్నివేశాలతో రూపొందించామని తెలిపారు. ఇప్పటికే పాటలు, ట్రైలర్‌కు ప్రేక్షకుల నుంచి మంచి స్పందన వచ్చిందన్నారు. అలాగే తనకు ప్రభాస్‌ అంటే చాలా ఇష్టమని, ఎప్పుడైనా తనతో నటించటానికి సిద్ధమేనని అన్నారు. పైగా ఆయనతో మల్టీస్టారర్‌ చేయాలని వున్నట్టు తెలిపారు. ఈ సినిమాను మారుతి చాలా బాగా తెరకెక్కించారన్నారు. దర్శకుడు మారుతి మాట్లాడుతూ ఈ సినిమా ప్రేక్షకులకు మంచి కిక్‌ ఇస్తుందని, సిని అభిమానులకు కావలసిన అన్ని ఎలిమెంట్స్‌ దీనిలో వున్నాయన్నారు. ఈ చిత్రాన్ని ప్రతి ఒక్కరూ చూసి ఆదరించాలని కోరారు. అనంతరం అభిమానులతో కొద్దిసేపు ముచ్చటించారు. ఈ చిత్రం ప్రీ రిలీజ్‌ ఈవెంట్‌కు మెగాస్టార్‌ చిరంజీవి ముఖ్య అతిధిగా పాల్గొనున్నారని చిత్రం యూనిట్‌ తెలిపారు. మెగా ప్రొడ్యూసర్‌ అల్లు అరవింద్‌ సమర్పణలో సక్సెస్‌ఫుల్‌ బ్యానర్లుగా అందరి మన్ననలు అందుకున్న జీఎ2 పిక్చర్స్‌, యూవీ క్రియేషన్స్‌ సంయుక్తంగా ఈ సినిమాను నిర్మించారు. బన్నీవాసు నిర్మాత, హీరో గోపీచంద్‌, రాశీఖన్నా హీరోయిన్‌గా, జకేస్‌ బీజాయ్‌ సంగీతం, ఎస్‌కెఎన్‌ సహ నిర్మాతగా చేస్తున్న పక్కా కమర్షియల్‌ సినిమాపై భారీ అంచనాలు వున్నాయి. ఈ కార్యక్రమంలో రాజ్‌-యువరాజ్‌ (జీ3) థియేటర్ల జనరల్‌ మేనేజర్‌ డి.శ్రీకాంత్‌, చిత్ర యూనిట్‌ సభ్యులు, ఎగ్జిబ్యూటర్స్‌, అభిమానులు, సిబ్బంది తదితరులు పాల్గొన్నారు.
