విజయవాడ, నేటి పత్రిక ప్రజావార్త:
విజయవాడ సెంట్రల్ నియోజకవర్గ పరిధిలోని 86వ డివిజన్‌లో వైఎస్సార్ కాంగ్రెస్ పార్టీ తరఫున నగర మేయర్ రాయన భాగ్యలక్ష్మి, మాజీ ఎమ్మెల్యే మల్లాది విష్ణు, కార్పొరేటర్ అభ్యర్థి యర్రగొర్ల తిరుపతమ్మ ఎన్నికల ప్రచారం నిర్వహించారు. కండ్రికలోని శానిటరీ కార్యాలయం, కేర్ అండ్ షేర్ స్కూల్ పరిసర ప్రాంతాల నుంచి గడపగడపకు వెళ్లి స్థానిక ప్రజలను కలుసుకుంటూ ఓట్లు అభ్యర్థించారు.
ఈ సందర్భంగా మాజీ ఎమ్మెల్యే మల్లాది విష్ణు మాట్లాడుతూ… కూటమి ప్రభుత్వం అధికారంలోకి వచ్చిన తర్వాత అభివృద్ధి, ప్రజా సమస్యల పరిష్కారంలో తగిన చర్యలు తీసుకోవడం లేదని విమర్శించారు. నిత్యావసర వస్తువుల ధరలు, బియ్యం ధరలు పెరగడం వల్ల మధ్యతరగతి కుటుంబాలు ఇబ్బందులు ఎదుర్కొంటున్నాయని పేర్కొన్నారు. నగరపాలక సంస్థ పరిధిలో పారిశుద్ధ్యం, శానిటేషన్‌కు సంబంధించిన సమస్యల పరిష్కారంపై కూడా దృష్టి సారించాలని అన్నారు. గత వైఎస్సార్ కాంగ్రెస్ పార్టీ ప్రభుత్వ హయాంలో చేపట్టిన అభివృద్ధి కార్యక్రమాలను ప్రజలు గుర్తించాలని ఆయన కోరారు. 86వ డివిజన్‌లో కార్పొరేటర్ అభ్యర్థి యర్రగొర్ల తిరుపతమ్మకు ఫ్యాను గుర్తుపై ఓటు వేసి గెలిపించాలని, నగర మేయర్ రాయన భాగ్యలక్ష్మికి కూడా తమ మద్దతు అందించాలని ప్రజలను అభ్యర్థించారు.
అనంతరం 86వ డివిజన్ వైసీపీ కార్పొరేటర్ అభ్యర్థి యర్రగొర్ల తిరుపతమ్మ మాట్లాడుతూ, తనను కార్పొరేటర్‌గా గెలిపిస్తే డివిజన్‌లోని స్థానిక సమస్యల పరిష్కారానికి ప్రత్యేక ప్రాధాన్యత ఇస్తానని తెలిపారు. డ్రైనేజీ సమస్యలు, తాగునీటి సరఫరా, వీధి విద్యుత్ దీపాలు తదితర సమస్యలపై దృష్టి సారించి ప్రజలకు మెరుగైన సేవలు అందించేందుకు కృషి చేస్తానని పేర్కొన్నారు. ఈ సందర్భంగా ఫ్యాను గుర్తుపై ఓటు వేసి తనను కార్పొరేటర్‌గా గెలిపించాలని, మేయర్ రాయన భాగ్యలక్ష్మికి కూడా మద్దతు తెలిపి గెలిపించాలని ఆమె ప్రజలను కోరారు.
ఈ కార్యక్రమంలో వైసీపీ డివిజన్ అధ్యక్షులు, పార్టీ నాయకులు, కార్యకర్తలు తదితరులు పాల్గొన్నారు.
86వ డివిజన్‌లో వైసీపీ నాయకుల విస్తృత ఎన్నికల ప్రచారం
