విజయవాడ, నేటి పత్రిక ప్రజావార్త:
జాతీయ సరస్ ఉత్సవంలో సందర్శకులు, స్టాళ్ల నిర్వాహకులకు అగ్నిప్రమాదాల నివారణపై అవగాహన కల్పించేందుకు ప్రతిరోజూ ప్రత్యేక అవగాహన కార్యక్రమాలు నిర్వహిస్తున్నట్లు ఫైర్ అధికారులు తెలిపారు. భవానీపురంలోని పున్నమి ఘాట్ వద్ద నిర్వహిస్తున్న జాతీయ సరస్ ఉత్సవ ప్రాంగణంలో అగ్నిమాపక భద్రతా చర్యలను నిరంతరం పర్యవేక్షిస్తూ, ప్రమాదాల నివారణకు అవసరమైన ముందస్తు జాగ్రత్తలను వివరిస్తున్నట్లు పేర్కొన్నారు.
డైరెక్టర్ జనరల్ ఆఫ్ ఫైర్ సర్వీసెస్ పి.వి. రమణ, ఎన్టీఆర్ జిల్లా కలెక్టర్ డాక్టర్ జి. లక్ష్మీశ, విజయవాడ నగరపాలక సంస్థ కమిషనర్ ధ్యానచంద్ర ఆదేశాల మేరకు ఆంధ్రప్రదేశ్ రాష్ట్ర విపత్తు ప్రతిస్పందన మరియు అగ్నిమాపక సేవల శాఖ ఆధ్వర్యంలో, విజయవాడ నగరపాలక సంస్థ ఫైర్ ప్రివెన్షన్ వింగ్ సమన్వయంతో ఈ అవగాహన కార్యక్రమాలు నిర్వహిస్తున్నారు. ఉత్సవంలో పాల్గొంటున్న వివిధ రాష్ట్రాల స్టాళ్ల నిర్వాహకులు, ఆహార విక్రయదారులు, ఉత్సవ నిర్వహణ సిబ్బందికి అగ్నిప్రమాదాల నివారణ, భద్రతా ప్రమాణాలపై ప్రతిరోజూ అవగాహన కల్పిస్తున్నారు.
అధిక ఉష్ణోగ్రతలు, ఆహార తయారీ ప్రాంతాల్లో ఎల్‌పీజీ గ్యాస్ సిలిండర్ల వినియోగం, పెద్ద సంఖ్యలో సందర్శకుల రాకపోకలను దృష్టిలో ఉంచుకుని అగ్నిప్రమాదాల నివారణకు తీసుకోవాల్సిన జాగ్రత్తలను వివరిస్తున్నారు. ఎల్‌పీజీ సిలిండర్ల సురక్షిత వినియోగం, గ్యాస్ లీకేజీ గుర్తింపు, వంట ప్రాంతాల్లో భద్రతా ప్రమాణాలు, అగ్నిమాపక పరికరాల వినియోగం, అత్యవసర పరిస్థితుల్లో అనుసరించాల్సిన విధానాలపై అవగాహన కల్పిస్తున్నారు.
అగ్నిమాపక వాహనాలు అత్యవసర పరిస్థితుల్లో సంఘటనా స్థలానికి సులభంగా చేరుకునేందుకు మార్గాలను ఖాళీగా ఉంచడం, వంట ప్రాంతాల్లో అగ్నిమాపక పరికరాలను అందుబాటులో ఉంచడం, గ్యాస్ సిలిండర్లను సురక్షితంగా ఏర్పాటు చేయడం వంటి అంశాలపై ప్రత్యేకంగా వివరించారు. అగ్నిప్రమాదం సంభవించినప్పుడు వెంటనే స్పందించడం, సంబంధిత అగ్నిమాపక సిబ్బందికి సమాచారం అందించడం, సందర్శకులను సురక్షిత ప్రాంతాలకు తరలించడం వంటి చర్యలపై సూచనలు అందిస్తున్నారు.
ఉత్సవ ప్రాంగణంలో సమగ్ర అగ్నిమాపక భద్రతా ఏర్పాట్లలో భాగంగా మొత్తం ఐదు అగ్నిమాపక వాహనాలు, 20 మంది అధికారులు, 60 మంది శిక్షణ పొందిన అగ్నిమాపక సిబ్బందిని వివిధ ప్రాంతాల్లో విధుల్లో నియమించారు. అత్యవసర పరిస్థితులను సమర్థవంతంగా ఎదుర్కొనేందుకు అవసరమైన సిబ్బంది, పరికరాలను అందుబాటులో ఉంచడంతో పాటు భద్రతా ఏర్పాట్లను నిరంతరం పర్యవేక్షిస్తున్నారు.
జాతీయ స్థాయిలో నిర్వహిస్తున్న సరస్ ఉత్సవానికి వివిధ రాష్ట్రాల నుంచి పెద్ద సంఖ్యలో సందర్శకులు, వ్యాపారులు తరలివస్తున్న నేపథ్యంలో, ఆంధ్రప్రదేశ్ రాష్ట్ర విపత్తు ప్రతిస్పందన మరియు అగ్నిమాపక సేవల శాఖ, విజయవాడ నగరపాలక సంస్థ ఫైర్ ప్రివెన్షన్ వింగ్ సమన్వయంతో ప్రతిరోజు అవగాహన కార్యక్రమాలు, భద్రతా పర్యవేక్షణ కొనసాగిస్తున్నాయి. సందర్శకులు, స్టాళ్ల నిర్వాహకులు, ఉత్సవ నిర్వాహకులకు సురక్షిత వాతావరణం కల్పించేందుకు సంబంధిత శాఖలతో సమన్వయం చేసుకుంటూ అవసరమైన చర్యలు చేపడుతున్నారు.
ఈ కార్యక్రమంలో స్టేషన్ ఫైర్ ఆఫీసర్ నరేష్, రామారావు, క్రాంతి పాల్గొన్నారు.
