-మున్సిపల్ కమిషనర్, ఎన్నికల రిటర్నింగ్ అధికారి ధ్యాన్‌చంద్ర హెచ్.ఎం.కు పలు కీలక ఆదేశాలు జారీ
-ఎన్నికల నియమావళి పక్కాగా అమలయ్యేలా చూడాలని స్పష్టీకరణ
విజయవాడ, నేటి పత్రిక ప్రజావార్త:
రాష్ట్రంలో స్థానిక సంస్థల ఎన్నికల నిర్వహణలో భాగంగా జిల్లాలో జరగనున్న మున్సిపల్ ఎన్నికల సన్నద్ధతను జిల్లా యంత్రాంగం వేగవంతం చేసింది. ఇందులో భాగంగా విజయవాడ నగరపాలక సంస్థ ఎన్నికలకు సంబంధించి స్థానిక లయోలా కాలేజీలో ఏర్పాటు చేస్తున్న స్ట్రాంగ్ రూములు, ఓట్ల లెక్కింపు కేంద్రాల ఏర్పాట్లను మంగళవారం జిల్లా కలెక్టర్ డాక్టర్ జి.లక్ష్మీశ క్షేత్రస్థాయిలో పరిశీలించారు. ఈ పరిశీలనలో మున్సిపల్ కమిషనర్ మరియు ఎన్నికల రిటర్నింగ్ అధికారి ధ్యాన్‌చంద్ర హెచ్.ఎం., ఇతర అధికార యంత్రాంగం కలెక్టర్‌కు ఏర్పాట్ల వివరాలను సమగ్రంగా వివరించారు. ఈ సందర్భంగా అధికారులకు కలెక్టర్ కీలక మార్గదర్శకాలు, ఆదేశాలు జారీ చేశారు. పోలింగ్ ముగిసిన అనంతరం బ్యాలెట్ పెట్టెలు / ఈవీఎంలను భద్రపరిచే స్ట్రాంగ్ రూమ్‌ల వద్ద పటిష్టమైన మూడంచెల భద్రతా వ్యవస్థను ఏర్పాటు చేయాలని ఆదేశించారు. స్ట్రాంగ్ రూమ్‌ల వద్ద 24 గంటల పాటు నిరంతరాయంగా సీసీటీవీ (CCTV) కెమెరాల నిఘా ఉండేలా తగిన ఏర్పాట్లు చేయాలన్నారు. లెక్కింపు ప్రక్రియ వేగంగా, పారదర్శకంగా జరిగేలా టేబుళ్ల అమరిక, బారికేడింగ్ పనులను నిబంధనల ప్రకారం చేపట్టాలని సూచించారు. కౌంటింగ్ సిబ్బంది, ఏజెంట్లు, మీడియా ప్రతినిధులకు వేర్వేరుగా మార్గాలు, అవసరమైన మౌలిక సదుపాయాలు, విద్యుత్, నిరంతర విద్యుత్ సరఫరాకు జనరేటర్లు, తాగునీరు, ప్రాథమిక వైద్య సదుపాయాలు సిద్ధం చేయాలన్నారు.
ఎన్నికల ప్రక్రియలో ఎలాంటి లోటుపాట్లకు తావులేకుండా అన్ని విభాగాల అధికారులు పూర్తి సమన్వయంతో పనిచేయాలని మున్సిపల్ కమిషనర్ ధ్యాన్‌చంద్ర హెచ్.ఎం.ను ఆదేశించారు. ఎన్నికల సంఘం జారీ చేసిన మార్గదర్శకాలను తూచా తప్పకుండా పాటించాలని స్పష్టం చేశారు. స్థానిక సంస్థల ఎన్నికలను ప్రశాంత, నిష్పక్షపాత వాతావరణంలో విజయవంతంగా పూర్తి చేయడానికి అధికార యంత్రాంగం నిరంతరం అప్రమత్తంగా ఉండాలని జిల్లా కలెక్టర్ డా.జి.లక్ష్మీశ పిలుపునిచ్చారు.
ఈ పరిశీలన కార్యక్రమంలో నగరపాలక సంస్థ అదనపు కమిషనర్లు, సంబంధిత నోడల్ అధికారులు, ఇంజనీరింగ్ విభాగ అధికారులు, పోలీస్ అధికారులు పాల్గొన్నారు.
