– మహిళా పారిశ్రామికవేత్తల విజయగాథలు స్ఫూర్తిదాయకమని వ్యాఖ్య
విజయవాడ, నేటి పత్రిక ప్రజావార్త:
విజయవాడలో నిర్వహిస్తున్న జాతీయ సరస్ మేళాను కేంద్ర వినియోగదారుల వ్యవహారాలు, ఆహారం, ప్రజా పంపిణీ శాఖ సహాయ మంత్రి నిముబెన్ జయంతిభాయ్ బాంభానియా శనివారం సందర్శించారు. ఈ సందర్భంగా 50 మంది స్వయం సహాయక సంఘాల మహిళా పారిశ్రామికవేత్తలు, లఖ్‌పతి దీదీలతో ముఖాముఖి నిర్వహించి, వారి విజయగాథలను తెలుసుకున్నారు. మహిళలు నిర్వహిస్తున్న స్టాళ్లను సందర్శించి, సంప్రదాయ నైపుణ్యాలు, స్థానిక వనరులను ఆదాయాన్ని అందించే వ్యాపారాలుగా అభివృద్ధి చేస్తున్న వారి కృషిని అభినందించారు. ముఖాముఖిలో గుజరాత్‌కు చెందిన ఓ మ‌హిళ తన వ్యాపార విజయగాథను వివరించారు. మేఘాలయ మహిళలు ప్లాస్టిక్ సంచులకు ప్రత్యామ్నాయంగా పత్తితో త‌యారుచేసిన సంచులను తయారు చేస్తున్న తీరును మంత్రి అభినందించారు. కేరళ మహిళలు సహజ ఉత్పత్తులు, ఆహార పదార్థాలను, బీహార్ మహిళలు చేనేత ఉత్పత్తులను ప్రదర్శించగా వారిని ప్రోత్స‌హించారు. స్వయం సహాయక సంఘాల ద్వారా గ్రామీణ మహిళలు ఆర్థిక స్వాతంత్ర్యం సాధిస్తూ వ్యాపారవేత్తలుగా, సంస్థల యజమానులుగా, సమాజ నాయకులుగా ఎదుగుతున్న తీరు స్ఫూర్తిదాయకమని ఈ సందర్భంగా మంత్రి పేర్కొన్నారు. సొంత వ్యాపారాలను స్థాపించడంతో పాటు కుటుంబాలకు అండగా నిలుస్తూ, ఇతరులకు ఉపాధి కల్పిస్తున్న మహిళల పట్టుదల, ఆత్మవిశ్వాసాన్ని ఆమె ప్రశంసించారు. గౌర‌వ ప్రధానమంత్రి నరేంద్ర మోదీ నాయకత్వంలో, కేంద్ర గ్రామీణాభివృద్ధి శాఖ మంత్రి మార్గదర్శకత్వంలో, మహిళా స్వయం సహాయక సంఘాలను బలోపేతం చేయడానికి, గ్రామీణ వ్యాపారాలను ప్రోత్సహించడానికి, మార్కెట్ అవకాశాలను విస్తరించడానికి సరస్ మేళాలు కీలక వేదికలుగా నిలుస్తున్నాయని తెలిపారు. గ్రామీణ మహిళల ఉత్పత్తులకు విస్తృత మార్కెట్ అవకాశాలు కల్పించడం, వారి ఆదాయాన్ని పెంపొందించడం, స్వయం సమృద్ధి సాధించేలా ప్రోత్సహించడం జాతీయ సరస్ మేళా ప్రధాన లక్ష్యమని పేర్కొన్నారు.
