స్వచ్ఛ ఆంధ్ర అవార్డుల్లో మెప్మా సత్తా.. నాలుగు రాష్ట్ర స్థాయి పురస్కారాలు

-75 జిల్లా స్థాయి అవార్డులతో మరో ఘనత.. ఉత్తమ సామాజిక మాధ్యమాల భాగస్వామ్యానికి ప్రత్యేక గుర్తింపు

అమరావతి, నేటి పత్రిక ప్రజావార్త :
ఆంధ్రప్రదేశ్‌లో పట్టణ పేదరిక నిర్మూలన లక్ష్యంగా పనిచేస్తున్న పట్టణ పేదరిక నిర్మూలన సంస్థ (మెప్మా) స్వచ్ఛ ఆంధ్ర అవార్డుల్లో అరుదైన ఘనత సాధించింది. నాలుగు రాష్ట్ర స్థాయి పురస్కారాలతో పాటు 75 జిల్లా స్థాయి అవార్డులను సొంతం చేసుకుని తన ప్రతిభను చాటుకుంది. స్వచ్ఛ ఆంధ్ర అవార్డుల కోసం జరిగిన పోటీల్లో పాల్గొన్న 21 ప్రభుత్వ శాఖల్లో మెప్మా ‘ఉత్తమ సామాజిక మాధ్యమాల భాగస్వామ్యం’ పురస్కారాన్ని కైవసం చేసుకుంది. సామాజిక మాధ్యమాల్లో మెప్మా ప్రచురించిన సమాచార నాణ్యత, వినూత్న ప్రచార కార్యక్రమాలు, క్రమం తప్పకుండా సమాచారాన్ని ప్రజలకు చేరవేయడం, ప్రజల భాగస్వామ్యం, అలాగే స్వచ్ఛ ఆంధ్ర సందేశాలను విస్తృతంగా ప్రజల్లోకి తీసుకెళ్లిన తీరును పరిగణనలోకి తీసుకుని ఈ అవార్డును అందించారు.
డిజిటల్ ప్రచారానికే పరిమితం కాకుండా క్షేత్రస్థాయిలో పర్యావరణ పరిరక్షణ కార్యక్రమాల్లోనూ మెప్మా విశేష ఫలితాలను సాధించింది. కాకినాడ, శ్రీకాకుళం, పశ్చిమ గోదావరి జిల్లాలకు చెందిన మూడు మెప్మా మురికివాడ స్థాయి సమాఖ్యలు మిద్దె తోటల విభాగంలో అత్యుత్తమ ప్రతిభ కనబరిచి రాష్ట్ర స్థాయి స్వచ్ఛ సమాఖ్య పురస్కారాలను అందుకున్నాయి. అదేవిధంగా రాష్ట్రవ్యాప్తంగా వివిధ మెప్మా విభాగాలకు చెందిన 75 మురికివాడ స్థాయి సమాఖ్యలు జిల్లా స్థాయి పురస్కారాలను సొంతం చేసుకున్నాయి. పట్టణ ప్రాంతాల్లో పర్యావరణ పరిరక్షణ, పరిశుభ్రత, సుస్థిర అభివృద్ధి కోసం చేపడుతున్న కార్యక్రమాలకు ఈ అవార్డులు గుర్తింపుగా నిలిచాయి.
రేపు విజయవాడలో అవార్డుల ప్రదానోత్సవం
స్వచ్ఛ ఆంధ్ర అవార్డుల ప్రదానోత్సవ కార్యక్రమం అక్టోబర్ 2, 2026న విజయవాడలోని ఎ కన్వెన్షన్ సెంటర్‌లో నిర్వహించనున్నారు. ఆంధ్రప్రదేశ్ ముఖ్యమంత్రి నారా చంద్రబాబు నాయుడు ముఖ్య అతిథిగా హాజరై, మెప్మా సామాజిక మాధ్యమాల బృందానికి ‘ఉత్తమ సామాజిక మాధ్యమాల భాగస్వామ్యం’ పురస్కారాన్ని అందజేయనున్నారు. మెప్మా సాధించిన ఈ విజయంపై మెప్మా మిషన్ డైరెక్టర్ శ్రీమతి వాకాటి కరుణ హర్షం వ్యక్తం చేశారు. మున్సిపల్ పరిపాలన, పట్టణాభివృద్ధి శాఖ మంత్రి పొంగూరు నారాయణ దిశానిర్దేశం, ప్రభుత్వ ప్రధాన కార్యదర్శి ఎస్. సురేష్ కుమార్ పర్యవేక్షణతో ఈ విజయాన్ని సాధించగలిగామని ఆమె తెలిపారు.
ఈ పురస్కారాలను మెప్మా సిబ్బందితో పాటు స్వచ్ఛమైన, సుస్థిరమైన ఆంధ్రప్రదేశ్ నిర్మాణం కోసం అంకితభావంతో పనిచేస్తున్న పట్టణ స్వయం సహాయక సంఘాల మహిళలకు అంకితం చేస్తున్నట్లు మిషన్ డైరెక్టర్ తెలిపారు.