Prajavartha Online Telugu News
ఇబ్రహీంపట్నం, నేటి పత్రిక ప్రజావార్త :
దివ్యాంగ పిల్లలకు విద్యను అందించే ప్రత్యేక పాఠశాలలో అన్ని వసతులు కల్పించి ఆహ్లాదంగా తీర్చిదిద్దాలని విజయవాడ సబ్ కలెక్టర్ జి ఎస్ ఎస్ ప్రవీణ్ చంద్ అన్నారు. ఇబ్రహీంపట్నం మండలంలోని అన్నమ్మ దివ్యాంగుల ప్రత్యేక పాఠశాలను విజయవాడ సబ్ కలెక్టర్ జి. సూర్యసాయి ప్రవీణ్ చంద్ బుధవారం ఆకస్మికంగా తనిఖీ చేశారు. పాఠశాలలోని పిల్లలతో ఆయన ముచ్చటించి పాఠ్యాంశాలను ఏ విధంగా బోధిస్తున్నారో ఉపాధ్యాయులను అడిగి తెలుసుకున్నారు. పాఠశాలలోని అన్ని గదులను, వంటశాలను, వాష్ రూమ్ లను సబ్ కలెక్టర్ ప్రవీణ్ తనిఖీ చేశారు. పిల్లలకు కొత్త యూనిఫారాలు అందించాలని, వాష్ రూమ్ లను సక్రమంగా నిర్వహించాలని, పిల్లలకు పరిశుభ్రమైన వాతావరణాన్ని అందించాలని సబ్ కలెక్టర్ ప్రవీణ్ చంద్ పాఠశాలలోని అధికారులు, సిబ్బందిని ఆదేశించారు. పాఠశాల పరిసరాలు ఆహ్లాదంగా తీర్చిదిద్దాలని, పిల్లలకు పోషకాహారం తో కూడిన ఆహారాన్ని అందించాలని అధికారులను ఆదేశించారు.
