విభిన్న ప్రతిభావంతుల పాఠశాలలో విద్యార్థులకు దుస్తుల పంపిణీ చేసిన మేయర్ లక్ష్మీ అపర్ణ

గుంటూరు, నేటి పత్రిక ప్రజావార్త:
నగరంలోని బృందావన్ గార్డెన్స్ 4వ లైనులో ఉన్న విభిన్న ప్రతిభావంతుల పాఠశాలలో నిర్వహించిన దుస్తుల పంపిణీ కార్యక్రమంలో గుంటూరు నగర మేయర్ శ్రీమతి కోవెలమూడి లక్ష్మీ అపర్ణ పాల్గొన్నారు. ఈ సందర్భంగా పాఠశాల చిన్నారులను ఆప్యాయంగా పలకరిస్తూ వారితో కొద్దిసేపు ముచ్చటించారు. విద్యార్థులకు ఏర్పాటు చేసిన అల్పాహారాన్ని స్వయంగా వడ్డించి, అనంతరం వారికి దుస్తులను పంపిణీ చేశారు. ప్రతి చిన్నారికి ప్రేమాభిమానాలు, ప్రోత్సాహం అందించడంతో పాటు సమాన అవకాశాలు కల్పించాల్సిన బాధ్యత సమాజంలోని ప్రతి ఒక్కరిపై ఉందని మేయర్ పేర్కొన్నారు. విభిన్న ప్రతిభావంతులైన విద్యార్థులను ఆదరిస్తూ, వారి అభివృద్ధికి ప్రతి ఒక్కరూ తమ వంతు సహకారం అందించాలని సూచించారు. ఈ కార్యక్రమంలో స్థానిక కార్పొరేటర్లు, కూటమి నాయకులు తదితరులు పాల్గొన్నారు.