-25 వేల విద్యుత్ స్తంభాలు, ఇతర సామగ్రి సిద్ధం
-విద్యుత్ శాఖ సిబ్బందితో మంత్రులు గొట్టిపాటి,అనిత సమీక్ష
అమరావతి, నేటి పత్రిక ప్రజావార్త:
అర్నబ్ తుపాను నేపథ్యంలో విద్యుత్ సరఫరాకు అంతరాయం కలగకుండా ముందస్తు చర్యలు చేపట్టాలని విద్యుత్ శాఖ మంత్రి గొట్టిపాటి రవికుమార్, హోం మంత్రి వంగలపూడి అనిత అధికారులను ఆదేశించారు. భారీ వర్షాలు, ఈదురుగాలుల నేపథ్యంలో విద్యుత్ శాఖ యంత్రాంగం అప్రమత్తంగా ఉండాలని సూచించారు. తుపాను పరిస్థితులను ఎదుర్కొనేందుకు తీసుకోవాల్సిన చర్యలపై డిస్కంల సీఎండీలు, డైరెక్టర్లు, జిల్లా అధికారులతో మంత్రులు టెలికాన్ఫరెన్స్ నిర్వహించారు.
అంతరాయం లేకుండా సరఫరా
తుపాను ప్రభావంతో విద్యుత్ సరఫరాలో సమస్యలు తలెత్తకుండా అధికారులు ముందస్తు జాగ్రత్తలు తీసుకోవాలని మంత్రులు సూచించారు. ఎక్కడైనా విద్యుత్ సరఫరాకు అంతరాయం ఏర్పడితే వెంటనే పునరుద్ధరణ పనులు చేపట్టాలని ఆదేశించారు. ఎలాంటి అత్యవసర పరిస్థితులనైనా ఎదుర్కొనేందుకు అవసరమైన సిబ్బంది, పరికరాలు అందుబాటులో ఉంచుకోవాలన్నారు. జిల్లా, మండల, గ్రామ స్థాయిలో అధికారులు, సిబ్బంది నిరంతరం అందుబాటులో ఉండాలని స్పష్టం చేశారు.
అత్యవసర సామగ్రి సిద్ధం
తుపాను పరిస్థితులను ఎదుర్కొనేందుకు ఇప్పటికే 25 వేల విద్యుత్ స్తంభాలతో పాటు ఇతర సామగ్రిని సిద్ధం చేసినట్లు అధికారులు మంత్రులకు వివరించారు. తుపాను తీవ్రత అధికంగా ఉండే ప్రాంతాలకు అదనపు సిబ్బందిని పంపేందుకు ఎస్పీడీసీఎల్‌ సిద్ధంగా ఉందని తెలిపారు. విద్యుత్ సరఫరా పునరుద్ధరణలో జాప్యం జరగకుండా అవసరమైన ఏర్పాట్లు చేసుకోవాలని మంత్రులు సూచించారు.
ప్రాణ, ఆస్తి నష్టం జరగకుండా..
విద్యుత్ ప్రమాదాల వల్ల ప్రాణ, ఆస్తి నష్టం జరగకుండా ముందస్తు చర్యలు తీసుకోవాలని మంత్రులు ఆదేశించారు. ప్రమాదకరంగా ఉన్న హోర్డింగులను వెంటనే తొలగించేలా సంబంధిత శాఖలతో సమన్వయం చేసుకోవాలన్నారు. విద్యుత్ శాఖ అధికారులు ఇతర ప్రభుత్వ శాఖలతో కలిసి పనిచేస్తూ క్షేత్రస్థాయి పరిస్థితులను ఎప్పటికప్పుడు పర్యవేక్షించాలని సూచించారు.
ప్రజలు జాగ్రత్తగా ఉండాలి
తుపాను, భారీ వర్షాల నేపథ్యంలో ప్రజలు అప్రమత్తంగా ఉండాలని మంత్రులు సూచించారు. విద్యుత్ తీగలు తెగిపడినా, స్తంభాలు నేలకొరిగినా వాటికి దూరంగా ఉండాలని, వాటిని తాకరాదని హెచ్చరించారు. విద్యుత్ ప్రమాదాలు లేదా సరఫరా సమస్యలు ఎదురైతే వెంటనే 1912 టోల్‌ఫ్రీ నంబరుకు సమాచారం అందించాలని కోరారు. ప్రజలకు ఇబ్బందులు కలగకుండా విద్యుత్ శాఖ అధికారులు నిరంతరం అప్రమత్తంగా ఉండాలని మంత్రులు స్పష్టం చేశారు.
