-ఎలాంటి పొరపాట్లకు తావులేకుండా పారదర్శకంగా ఓట్ల లెక్కింపు జరగాలి: నగర కమిషనర్ కె. మయూర్ అశోక్
గుంటూరు, నేటి పత్రిక ప్రజావార్త:
గుంటూరు నగరపాలక సంస్థ ఎన్నికల ఓట్ల లెక్కింపు ప్రక్రియను ఎటువంటి పొరపాట్లకు తావులేకుండా, అత్యంత పారదర్శకంగా నిర్వహించేందుకు కౌంటింగ్ సిబ్బంది రాష్ట్ర ఎన్నికల సంఘం సూచించిన నిబంధనలు, మార్గదర్శకాలను క్షుణ్ణంగా అధ్యయనం చేయాలని నగర కమిషనర్, అడిషనల్ ఎలక్షన్ అథారిటీ కె. మయూర్ అశోక్ ఆదేశించారు. నవంబర్ 3న జరగనున్న ఓట్ల లెక్కింపు నేపథ్యంలో సోమవారం స్థానిక శ్రీ వెంకటేశ్వర విజ్ఞాన మందిరంలో కౌంటింగ్ సూపర్‌వైజర్లు, కౌంటింగ్ అసిస్టెంట్లు, సంబంధిత అధికారులకు ప్రత్యేక శిక్షణ కార్యక్రమం నిర్వహించారు.
ఈ సందర్భంగా కమిషనర్ మయూర్ అశోక్ మాట్లాడుతూ.. ప్రజాస్వామ్య వ్యవస్థలో ఎన్నికల ప్రక్రియ, ఓట్ల లెక్కింపు అత్యంత కీలకమైన ఘట్టాలని పేర్కొన్నారు. కౌంటింగ్ కేంద్రాల్లో విధులు నిర్వహించే ప్రతి అధికారి, సిబ్బంది పూర్తి బాధ్యతాయుతంగా, నిబద్ధతతో, క్రమశిక్షణతో వ్యవహరించాలని సూచించారు. ఎన్నికల సంఘం జారీ చేసిన మార్గదర్శకాలు, నిబంధనలపై సిబ్బందికి పూర్తి అవగాహన ఉండాలని, చెల్లుబాటు అయ్యే ఓట్లు, చెల్లుబాటు కాని ఓట్లను గుర్తించి లెక్కించే విషయంలో స్పష్టతతో వ్యవహరించాలని తెలిపారు. ఏదైనా సందేహం తలెత్తితే వెంటనే సంబంధిత రిటర్నింగ్ అధికారి దృష్టికి తీసుకెళ్లి పరిష్కరించుకోవాలని స్పష్టం చేశారు.
కౌంటింగ్ హాల్‌లో పారదర్శకతకు అత్యంత ప్రాధాన్యత ఇవ్వాలని, కౌంటింగ్ ఏజెంట్లకు ఓట్ల లెక్కింపు ప్రక్రియ స్పష్టంగా కనిపించేలా విధులు నిర్వహించాలని అధికారులకు సూచించారు. లెక్కింపు సమయంలో కౌంటింగ్ ఏజెంట్లతో అనవసర వివాదాలకు తావివ్వకూడదని, ఏవైనా సందేహాలు లేదా సమస్యలు ఎదురైతే వెంటనే రిటర్నింగ్ అధికారి దృష్టికి తీసుకెళ్లాలని ఆదేశించారు.
కౌంటింగ్ సిబ్బంది సమయపాలన పాటించడం అత్యంత ముఖ్యమని పేర్కొన్న కమిషనర్, ఓట్ల లెక్కింపు రోజున నిర్ణీత సమయానికి ముందుగానే తమకు కేటాయించిన కేంద్రాలకు చేరుకోవాలని సూచించారు. కౌంటింగ్ కేంద్రాల పరిసరాల్లో పటిష్ట భద్రతా ఏర్పాట్లు చేస్తున్నామని తెలిపారు. ఎన్నికల నిబంధనల ప్రకారం కౌంటింగ్ హాల్‌లోకి మొబైల్ ఫోన్లు, ఇతర ఎలక్ట్రానిక్ పరికరాలను అనుమతించబోమని స్పష్టం చేశారు.
ప్రతి రౌండ్ ఓట్ల లెక్కింపు పూర్తయిన వెంటనే ఫలితాలకు సంబంధించిన వివరాలను నిర్దేశిత ఫారమ్‌లలో ఎలాంటి తప్పులు లేకుండా నమోదు చేసి, సంబంధిత అధికారులకు సమర్పించాలని సూచించారు. ఎన్నికల సంఘం నిబంధనలను తూచా తప్పకుండా పాటిస్తూ, కౌంటింగ్ ప్రక్రియను సజావుగా పూర్తి చేసేందుకు ప్రతి ఒక్కరూ సమన్వయంతో పనిచేయాలని పిలుపునిచ్చారు.
ఈ శిక్షణ కార్యక్రమంలో డిప్యూటీ కమిషనర్ జి. సాంబశివరావు, ఎన్నికల కౌంటింగ్ సూపర్‌వైజర్లు, సంబంధిత అధికారులు పాల్గొన్నారు.
