తిరుపతి ప్రాంతీయ సదస్సులో రూ.11,731.68 కోట్ల పెట్టుబడులకు 67 ఒప్పందాలు

-20,879 మందికి ఉపాధి అవకాశాలు.. ఐదు ప్రాంతీయ సదస్సుల్లో రూ.85,561 కోట్ల పెట్టుబడులు
-శ్రీసిటీలో విజయవంతంగా 31వ సీఐఐ ప్రాంతీయ సదస్సు
-ఎంఎస్‌ఎంఈ బ్యాంకింగ్ గ్రీవెన్స్ రిడ్రెసల్ మెకానిజం పోర్టల్ ఆవిష్కరణ

శ్రీసిటీ, నేటి పత్రిక ప్రజావార్త:
ఆంధ్రప్రదేశ్‌లో పారిశ్రామిక పెట్టుబడులను ప్రోత్సహించడం, ప్రాంతీయ ఆర్థికాభివృద్ధిని వేగవంతం చేయడం, యువతకు ఉపాధి అవకాశాలను విస్తరించడం లక్ష్యంగా నిర్వహించిన ఐదు ప్రాంతీయ పారిశ్రామిక సదస్సులు విజయవంతంగా ముగిశాయని రాష్ట్ర యువజన అభివృద్ధి, పర్యాటక, సాంస్కృతిక శాఖ ప్రత్యేక ప్రధాన కార్యదర్శి ఎస్.ఎస్. రావత్ తెలిపారు. తిరుపతి ప్రాంతీయ సదస్సులో భాగంగా రూ.11,731.68 కోట్ల పెట్టుబడులకు సంబంధించి 67 అవగాహన ఒప్పందాలు కుదిరాయని, వీటి ద్వారా 20,879 మందికి ఉపాధి అవకాశాలు లభించనున్నాయని వెల్లడించారు.

సోమవారం శ్రీసిటీలోని క్రియా విశ్వవిద్యాలయ ఆడిటోరియంలో 31వ సీఐఐ పార్టనర్‌షిప్ సమ్మిట్‌లో భాగంగా తిరుపతి ప్రాంతీయ సదస్సు నిర్వహించారు. తిరుపతి, చిత్తూరు, అన్నమయ్య, వైఎస్సార్ కడప, ఎస్పీఎస్ఆర్ నెల్లూరు జిల్లాలకు చెందిన పారిశ్రామిక ప్రతిపాదనలపై ఈ సదస్సులో ప్రధానంగా చర్చించారు.

ఈ సందర్భంగా ఎస్.ఎస్. రావత్ మాట్లాడుతూ.. రాష్ట్రంలోని అన్ని ప్రాంతాలకు పారిశ్రామిక పెట్టుబడులను విస్తరించడం, స్థానిక వనరులను సమర్థంగా వినియోగించుకోవడం, చిన్న, మధ్య తరహా పరిశ్రమలను బలోపేతం చేయడం ప్రాంతీయ సదస్సుల ప్రధాన ఉద్దేశమని వివరించారు. శ్రీసిటీ, శ్రీకాళహస్తి ప్రాంతాలకు పారిశ్రామికంగా విశేష ప్రాధాన్యత ఉందని, పెద్ద పరిశ్రమలతో ఎంఎస్‌ఎంఈలను అనుసంధానించడం ద్వారా స్థానిక పారిశ్రామికవేత్తలకు మరిన్ని అవకాశాలు కల్పించవచ్చని తెలిపారు.

తిరుపతి ప్రాంతీయ సదస్సుతో కలిపి రాష్ట్రవ్యాప్తంగా నిర్వహించిన ఐదు సదస్సుల్లో రూ.85,561 కోట్ల పెట్టుబడులకు సంబంధించిన ప్రతిపాదనలు వచ్చాయని, 1.56 లక్షల మందికి పైగా ఉపాధి కల్పించే అవకాశాలు ఏర్పడ్డాయని పేర్కొన్నారు. విశాఖపట్నంలో నవంబర్ 12, 13 తేదీల్లో జరగనున్న 31వ సీఐఐ పార్టనర్‌షిప్ సమ్మిట్ రాష్ట్రానికి మరిన్ని పెట్టుబడులు, వ్యాపార భాగస్వామ్యాలను తీసుకువస్తుందని ఆశాభావం వ్యక్తం చేశారు.
‘ఒక కుటుంబం – ఒక పారిశ్రామికవేత్త’ లక్ష్యంతో స్వయం ఉపాధికి ప్రోత్సాహం

రాష్ట్ర పరిశ్రమలు, వాణిజ్య శాఖ కార్యదర్శి డాక్టర్ వై. యువరాజ్ మాట్లాడుతూ.. “ఒక కుటుంబం – ఒక పారిశ్రామికవేత్త” లక్ష్యం ద్వారా స్వయం ఉపాధిని ప్రోత్సహించి, ప్రజల ఆర్థిక స్థితిగతులను మెరుగుపరిచేందుకు ప్రభుత్వం చర్యలు చేపడుతోందని తెలిపారు. ప్రతి అసెంబ్లీ నియోజకవర్గంలో ఎంఎస్‌ఎంఈ పార్కును ఏర్పాటు చేసే దిశగా ప్రణాళికలు రూపొందిస్తున్నట్లు పేర్కొన్నారు.

రాష్ట్రంలోని 175 ఎంఎస్‌ఎంఈ పార్కుల్లో 153 పార్కుల పనులు పురోగతిలో ఉన్నాయని తెలిపారు. తిరుపతి సహా ఐదు జిల్లాల్లో 31 ఎంఎస్‌ఎంఈ పార్కులు ఉండగా, సుమారు 2,053 ఎకరాల భూమి అందుబాటులో ఉందన్నారు. జూన్ 2024 నుంచి ఈ ప్రాంతంలో 914 ఎకరాల భూమిని ఎంఎస్‌ఎంఈలకు కేటాయించినట్లు, దీనివల్ల రూ.3,885 కోట్ల పెట్టుబడులు, 41,622 ఉద్యోగాల కల్పనకు అవకాశాలు ఏర్పడినట్లు వివరించారు.

విశాఖపట్నం, అమరావతి, తిరుపతి ప్రాంతాలను ప్రధాన ఆర్థిక కేంద్రాలుగా అభివృద్ధి చేయడం, పారిశ్రామిక కారిడార్లు, రహదారులు, రవాణా, లాజిస్టిక్స్ సదుపాయాలను విస్తరించడం ద్వారా పెట్టుబడులను ఆకర్షించేందుకు ప్రభుత్వం కృషి చేస్తోందని చెప్పారు. యువత నైపుణ్యాభివృద్ధి, స్థానిక వనరుల వినియోగం, చిన్న పరిశ్రమలకు ప్రోత్సాహం ద్వారా రాష్ట్ర సమగ్ర ఆర్థికాభివృద్ధికి ప్రాధాన్యత ఇస్తున్నట్లు తెలిపారు.
ఎంఎస్‌ఎంఈ బ్యాంకింగ్ ఫిర్యాదుల పరిష్కార పోర్టల్ ఆవిష్కరణ

సదస్సులో ఎంఎస్‌ఎంఈల బ్యాంకింగ్ సమస్యలు, ఫిర్యాదుల పరిష్కారానికి రూపొందించిన బ్యాంకింగ్ గ్రీవెన్స్ రిడ్రెసల్ మెకానిజం పోర్టల్‌ను ఆవిష్కరించారు. చిన్న, మధ్య తరహా పరిశ్రమలు ఎదుర్కొంటున్న రుణ సమస్యలు, ఆలస్య చెల్లింపులు, వర్కింగ్ క్యాపిటల్ కొరత వంటి అంశాల పరిష్కారానికి ఇటువంటి వ్యవస్థలు దోహదపడతాయని అధికారులు పేర్కొన్నారు.

కేంద్ర ఎంఎస్‌ఎంఈ మంత్రిత్వ శాఖ జాయింట్ డెవలప్‌మెంట్ కమిషనర్ సందీప్ దావు మాట్లాడుతూ.. RAMP కార్యక్రమం ద్వారా ఎంఎస్‌ఎంఈలకు రుణ సదుపాయాలు, మార్కెట్ మద్దతు, సాంకేతిక పరిజ్ఞానం, నైపుణ్యాభివృద్ధి వంటి అంశాల్లో సహకారం అందిస్తున్నట్లు తెలిపారు. ఉద్యమ్ రిజిస్ట్రేషన్, జెడ్ పథకం, మేధో సంపత్తి హక్కులు, వ్యాపార అభివృద్ధి సేవలను వినియోగించుకోవాలని పారిశ్రామికవేత్తలకు సూచించారు. TReDS వేదిక ద్వారా ఇన్‌వాయిస్‌లను నగదుగా మార్చుకుని వర్కింగ్ క్యాపిటల్ అవసరాలను తీర్చుకోవచ్చని వివరించారు.
ఆహార శుద్ధి, ఎలక్ట్రానిక్స్, పర్యాటక రంగాలకు పెట్టుబడులు

తిరుపతి ప్రాంతీయ సదస్సులో ఎలక్ట్రానిక్స్, సెమీకండక్టర్లు, ఆటోమొబైల్ విడిభాగాలు, ఎలక్ట్రిక్ మొబిలిటీ, పాదరక్షల తయారీ, పర్యాటకం, ఆతిథ్యం, ఆహార శుద్ధి, ఔషధాలు, పునరుత్పాదక ఇంధనం, రీసైక్లింగ్, లాజిస్టిక్స్, ఐటీ రంగాలకు సంబంధించిన పెట్టుబడి ప్రతిపాదనలకు ప్రాధాన్యత లభించింది.

సదస్సులో వెల్లడించిన వివరాల ప్రకారం:

ఎలక్ట్రానిక్స్, సెమీకండక్టర్లు: ఆరు ఒప్పందాల ద్వారా రూ.2,105 కోట్ల పెట్టుబడులు, 4,540 ఉద్యోగాల కల్పనకు అవకాశం.
ఆటో విడిభాగాలు, ఎలక్ట్రిక్ మొబిలిటీ: ఐదు ఒప్పందాల ద్వారా రూ.1,600 కోట్ల పెట్టుబడులు, 2,250 ఉద్యోగాలకు అవకాశం.
పాదరక్షల తయారీ: రూ.700 కోట్ల పెట్టుబడితో 3,000 ఉద్యోగాల కల్పనకు ప్రతిపాదనలు.
పర్యాటకం, ఆతిథ్యం: 22 ఒప్పందాల ద్వారా రూ.1,538 కోట్ల పెట్టుబడులు, 2,812 ఉద్యోగాలకు అవకాశం.
ఆహార శుద్ధి: తొమ్మిది ఒప్పందాల ద్వారా రూ.1,096 కోట్ల పెట్టుబడులు, 2,130 ఉద్యోగాల కల్పనకు అవకాశం.

మొత్తంగా 67 అవగాహన ఒప్పందాల ద్వారా రూ.11,731.68 కోట్ల పెట్టుబడులు, 20,879 ఉద్యోగాల కల్పనకు అవకాశం ఉందని అధికారులు వెల్లడించారు. వీటిలో 50 ప్రాజెక్టులకు సంబంధించి రూ.7,380.68 కోట్ల పెట్టుబడులతో 16,612 ఉద్యోగాలు కల్పించే అవకాశం ఉండగా, 18 ప్రాజెక్టులు శ్రీసిటీలోనే ఏర్పాటు కానున్నట్లు తెలిపారు.
స్థానిక రైతులకు, ఆహార పరిశ్రమలకు కొత్త అవకాశాలు

కెవిన్‌కేర్ ప్రైవేట్ లిమిటెడ్ ఎగ్జిక్యూటివ్ డైరెక్టర్ ఆముదవల్లి రంగనాథన్ మాట్లాడుతూ.. మదనపల్లె ప్రాంతంలో టమోటా రైతులు గిట్టుబాటు ధరలు లేక ఇబ్బందులు ఎదుర్కొంటున్నారని తెలిపారు. వ్యవసాయ క్షేత్రాల నుంచి అంతర్జాతీయ మార్కెట్ల వరకు బలమైన సరఫరా వ్యవస్థను అభివృద్ధి చేయడం ద్వారా రైతులకు మెరుగైన ధరలు లభించేలా చూడవచ్చని సూచించారు.

మామిడి గుజ్జు, టమోటా పేస్ట్, పౌడర్, పాల ఉత్పత్తులు, చిరుతిళ్లు, రెడీ-టు-కుక్ ఆహార పదార్థాల తయారీతో పాటు కోల్డ్ స్టోరేజ్, ఫుడ్ టెస్టింగ్ ల్యాబ్‌లు, ప్యాకేజింగ్ యూనిట్ల ఏర్పాటుకు తిరుపతి ప్రాంతంలో విస్తృత అవకాశాలు ఉన్నాయని వివరించారు. ఆహార శుద్ధి రంగంలో ప్రభుత్వ ప్రోత్సాహకాలను పారిశ్రామికవేత్తలు సద్వినియోగం చేసుకోవాలని కోరారు.
శ్రీసిటీలో విస్తరిస్తున్న అంతర్జాతీయ పరిశ్రమలు

ఇండియా మెటల్ వన్ స్టీల్ ప్లేట్ ప్రాసెసింగ్ సంస్థ మేనేజింగ్ డైరెక్టర్ టైజో ఇవామి మాట్లాడుతూ.. శ్రీసిటీలో తమ సంస్థ 2011లో వ్యాపార కార్యకలాపాలు ప్రారంభించి, 2012లో ఉత్పత్తిని మొదలుపెట్టిందని తెలిపారు. అనంతరం 2019, 2022లో విస్తరణ చేపట్టినట్లు పేర్కొన్నారు.

సంస్థ పెట్టుబడులు ప్రారంభంలో రూ.20 కోట్లుగా ఉండగా ప్రస్తుతం రూ.400 కోట్లకు చేరాయని, ఉద్యోగుల సంఖ్య 130 నుంచి 800కు పెరిగిందని వివరించారు. మార్చి 2027 నాటికి 1,000 మందికి ఉపాధి కల్పించాలనే లక్ష్యంతో పనిచేస్తున్నట్లు తెలిపారు. ఉద్యోగాల్లో 75 శాతం స్థానికులకు అవకాశాలు కల్పించేందుకు ప్రాధాన్యత ఇస్తున్నామని చెప్పారు.

శ్రీసిటీలో అంతర్జాతీయ సంస్థలకు అవసరమైన పారిశ్రామిక మౌలిక సదుపాయాలు, విద్యుత్ సరఫరా, నైపుణ్యం కలిగిన మానవ వనరులు అందుబాటులో ఉండటం పరిశ్రమల అభివృద్ధికి దోహదపడుతోందని పేర్కొన్నారు.
21 ఎంఎస్‌ఎంఈ సంస్థల ఉత్పత్తుల ప్రదర్శన

సదస్సులో తిరుపతి, చిత్తూరు, ఎస్పీఎస్ఆర్ నెల్లూరు, అన్నమయ్య జిల్లాలకు చెందిన 21 ఎంఎస్‌ఎంఈ సంస్థలు తమ ఉత్పత్తులను ప్రదర్శించాయి. ప్యాకేజింగ్, పారిశ్రామిక పరికరాలు, ఆటోమేషన్, రోబోటిక్స్, వ్యవసాయ ఉత్పత్తులు, చిరుధాన్యాలు, మూలికా ఉత్పత్తులు, హస్తకళలు, గ్రామీణ పరిశ్రమలు, సాంకేతిక సేవలకు సంబంధించిన ఉత్పత్తులు ప్రదర్శనలో ఆకట్టుకున్నాయి.

సీఐఐ ఆంధ్రప్రదేశ్ వైస్ చైర్మన్ డాక్టర్ జి. సాంబశివరావు మాట్లాడుతూ.. పర్యాటకం, ఆతిథ్యం, ఎలక్ట్రానిక్స్, సెమీకండక్టర్లు, ఆటోమోటివ్, అంతరిక్షం, పాదరక్షల తయారీ వంటి రంగాల్లో పెట్టుబడులకు విస్తృత అవకాశాలు ఉన్నాయని తెలిపారు. ప్రభుత్వం, పరిశ్రమలు, స్థానిక పారిశ్రామికవేత్తలు సమన్వయంతో పనిచేస్తే ప్రాంతీయ ఆర్థికాభివృద్ధితో పాటు యువతకు మెరుగైన ఉపాధి అవకాశాలు కల్పించవచ్చని పేర్కొన్నారు.

ఈ కార్యక్రమంలో రాష్ట్ర ప్రభుత్వ ఉన్నతాధికారులు, ఏపీ ఎకనామిక్ డెవలప్‌మెంట్ బోర్డు, ఏపీఐఐసీ, ఏపీటీడీసీ ప్రతినిధులు, జిల్లా కలెక్టర్ డాక్టర్ ఎస్. వెంకటేశ్వర్, శ్రీసిటీ చైర్మన్ సి. శ్రీనివాస రాజు, మేనేజింగ్ డైరెక్టర్ రవీంద్ర సన్నారెడ్డి, పారిశ్రామికవేత్తలు, పెట్టుబడిదారులు, ఎంఎస్‌ఎంఈ ప్రతినిధులు పాల్గొన్నారు.

రాష్ట్రంలో పెట్టుబడుల కోసం కుదిరిన ఒప్పందాలను పరిశ్రమల స్థాపన, ఉత్పత్తి ప్రారంభం వరకు పర్యవేక్షించే విధానాన్ని ప్రభుత్వం అమలు చేస్తోందని అధికారులు తెలిపారు. ఐదు ప్రాంతీయ సదస్సుల ద్వారా రాష్ట్రంలోని వివిధ ప్రాంతాల్లో పెట్టుబడుల అవకాశాలను జాతీయ, అంతర్జాతీయ పారిశ్రామిక వర్గాలకు పరిచయం చేయగలిగామని పేర్కొన్నారు.