-సర్పంచ్, వార్డు సభ్యులందరూ ఏకగ్రీవంగా ఎన్నికైతే వెంటనే ఉపసర్పంచ్ ఎన్నిక పూర్తి చేయాలి
-రిటర్నింగ్ అధికారులకు రాష్ట్ర ఎన్నికల సంఘం స్పష్టమైన ఆదేశాలు
విజయవాడ, నేటి పత్రిక ప్రజావార్త:
రాష్ట్రంలో గ్రామ పంచాయతీలకు జరుగుతున్న రెండవ సాధారణ ఎన్నికలు–2026 లో భాగంగా, సర్పంచ్తో పాటు వార్డు సభ్యులందరూ ఏకగ్రీవంగా ఎన్నికైన గ్రామ పంచాయతీల్లో ఉపసర్పంచ్ ఎన్నికను అదే రోజు నిర్వహించాలని రాష్ట్ర ఎన్నికల సంఘం స్పష్టం చేసింది. ఈ మేరకు రిటర్నింగ్ అధికారులకు తగిన సూచనలు జారీ చేయాలని అన్ని జిల్లాల పంచాయతీ అధికారులకు రాష్ట్ర ఎన్నికల కమిషనర్ అనిల్ చంద్ర పునేఠా ఆదేశాలు జారీ చేశారు.
ఈ అంశంపై కాకినాడ జిల్లా పంచాయతీ అధికారి కోరిన వివరణకు స్పందిస్తూ రాష్ట్ర ఎన్నికల సంఘం ఈ స్పష్టత ఇచ్చింది.
ఎన్నికల షెడ్యూల్ ప్రకారం రిటర్నింగ్ అధికారి జారీ చేసే ఎన్నికల నోటీసుతో ఎన్నికల ప్రక్రియ ప్రారంభమవుతుందని, ఆ నోటీసులో ఉపసర్పంచ్ ఎన్నిక నిర్వహించే ప్రదేశం, తేదీ, సమయాన్ని కూడా పేర్కొంటారని కమిషనర్ తెలిపారు. అయితే నామినేషన్ల ఉపసంహరణకు నిర్దేశించిన గడువు ముగిసిన తర్వాత మాత్రమే గ్రామ పంచాయతీలో సర్పంచ్, వార్డు సభ్యులందరూ ఏకగ్రీవంగా ఎన్నికయ్యారా లేదా అన్న విషయం స్పష్టమవుతుందని పేర్కొన్నారు.
రాష్ట్ర ఎన్నికల సంఘం జారీ చేసిన రిటర్నింగ్ అధికారుల హ్యాండ్బుక్లోని అధ్యాయం–IXలో కూడా దీనిపై స్పష్టమైన మార్గదర్శకాలు ఉన్నాయని తెలిపారు. సర్పంచ్తో పాటు వార్డు సభ్యులందరూ ఏకగ్రీవంగా ఎన్నికైనప్పుడు, హ్యాండ్బుక్లోని అధ్యాయం–XVIIలో సూచించిన విధానాన్ని అనుసరించి రిటర్నింగ్ అధికారి (స్టేజ్–I) ఉపసర్పంచ్ ఎన్నిక నిర్వహించాలని ఆదేశించినట్లు వివరించారు.
గ్రామ పంచాయతీకి సంబంధించిన మొత్తం పాలకవర్గం ఏకగ్రీవంగా ఎన్నికైన సందర్భంలో, ఉపసర్పంచ్ ఎన్నిక కోసం ముందుగా నిర్ణయించిన తేదీ వరకు వేచి ఉండకుండా, ఎన్నికల ప్రక్రియను సకాలంలో పూర్తి చేయాలనే ఉద్దేశంతో ఈ మార్గదర్శకాలను జారీ చేసినట్లు ఎన్నికల కమిషనర్ తెలిపారు.
1994 ఆంధ్రప్రదేశ్ పంచాయతీరాజ్ చట్టంలోని సెక్షన్ 14(10) ప్రకారం గ్రామ పంచాయతీ సాధారణ ఎన్నికల ఫలితాలు ప్రకటించిన రోజే ఉపసర్పంచ్ ఎన్నిక నిర్వహించేందుకు ప్రత్యేక సమావేశం ఏర్పాటు చేయాలని నిబంధన ఉందని కమిషనర్ గుర్తుచేశారు. అలాగే 2006 ఆంధ్రప్రదేశ్ పంచాయతీరాజ్ (గ్రామ పంచాయతీ ఉపసర్పంచ్ ఎన్నికల నిర్వహణ) నిబంధనల్లోని రూల్ 3(1) కూడా ఇదే విషయాన్ని నిర్దేశిస్తోందని తెలిపారు.
కాబట్టి, సర్పంచ్ మరియు వార్డు సభ్యులందరూ ఏకగ్రీవంగా ఎన్నికైన గ్రామ పంచాయతీల్లో ఏకగ్రీవ ఎన్నికల ఫలితాలు ప్రకటించిన వెంటనే అదే రోజున ఉపసర్పంచ్ ఎన్నిక నిర్వహించేలా రిటర్నింగ్ అధికారులు చర్యలు తీసుకోవాలని రాష్ట్ర ఎన్నికల కమిషనర్ అనిల్ చంద్ర పునేఠా స్పష్టం చేశారు.
