-పారదర్శకత, నిజాయితీ, జవాబుదారీతనంపై ప్రత్యేక దృష్టి
విజయవాడ, నేటి పత్రిక ప్రజావార్త:
దక్షిణ మధ్య తీర రైల్వే (SCoR) విజయవాడ డివిజన్‌లో నిర్వహించిన విజిలెన్స్ అవేర్‌నెస్ వీక్ ముగింపు కార్యక్రమం సోమవారం విజయవాడలోని డీఆర్ఎం కాన్ఫరెన్స్ హాల్‌లో నిర్వహించారు. ప్రభుత్వ సేవల్లో నిజాయితీ, పారదర్శకత, జవాబుదారీతనాన్ని పెంపొందించడమే లక్ష్యంగా ఈ కార్యక్రమాన్ని నిర్వహించారు.
ఈ కార్యక్రమానికి విజయవాడ డివిజనల్ రైల్వే మేనేజర్ (డీఆర్ఎం) మోహిత్ సోనకియా ముఖ్య అతిథిగా హాజరయ్యారు. దక్షిణ తీర రైల్వే డిప్యూటీ చీఫ్ విజిలెన్స్ ఆఫీసర్ (Dy. CVO) వెంకట కారుణ్య అతిథిగా పాల్గొని విజిలెన్స్ ప్రాధాన్యత, ప్రజా పరిపాలనలో నైతిక విలువలు, అవినీతి నివారణలో ఉద్యోగుల సమష్టి బాధ్యతపై ప్రత్యేక ప్రజెంటేషన్ ఇచ్చారు. ప్రతి ఉద్యోగి విధి నిర్వహణలో పారదర్శకతను పాటించాలని, నిబంధనలకు అనుగుణంగా వ్యవహరిస్తూ నిజాయితీతో బాధ్యతలు నిర్వర్తించాలని ఆయన సూచించారు.
విజిలెన్స్ అవేర్‌నెస్ వీక్‌లో భాగంగా నిర్వహించిన వ్యాసరచన, చిత్రలేఖనం తదితర పోటీల్లో విజేతలుగా నిలిచిన వారికి ఈ సందర్భంగా బహుమతులు అందజేసి అభినందించారు. రైల్వే ఉద్యోగులతో పాటు పాఠశాల విద్యార్థులు కూడా ఈ పోటీల్లో ఉత్సాహంగా పాల్గొన్నారు.
ఐకాన్ పబ్లిక్ స్కూల్, పీఎం శ్రీ కేంద్రీయ విద్యాలయ నంబర్-1, జాక్ అండ్ జిల్ ఇంగ్లీష్ మీడియం స్కూల్ విద్యార్థులు వ్యాసరచన, చిత్రలేఖనం పోటీల్లో పాల్గొని తమ ప్రతిభను చాటుకున్నారు. నిజాయితీ, నైతిక విలువల ప్రాధాన్యతను తమ రచనలు, చిత్రాల ద్వారా తెలియజేశారు. విజేతలకు ప్రశంసా పత్రాలు, బహుమతులు అందజేశారు.
యువతలో చిన్ననాటి నుంచే నైతిక విలువలు, నిజాయితీ, బాధ్యతాయుతమైన పౌరసత్వ లక్షణాలను పెంపొందించాల్సిన అవసరాన్ని ఈ కార్యక్రమం గుర్తుచేసింది. విజయవాడ రైల్వే డివిజన్ పరిధిలోని అన్ని కార్యకలాపాల్లో పారదర్శకత, జవాబుదారీతనం, అవినీతి రహిత విధానాలను ప్రోత్సహించేందుకు నిరంతరం కృషి చేస్తామని అధికారులు ఈ సందర్భంగా పునరుద్ఘాటించారు.
