సంబర జాతరకు విస్తృత ఏర్పాట్లు

శంబర (పార్వతీపురం మన్యం), నేటి పత్రిక ప్రజావార్త :
వచ్చే జనవరి నెలలో 27, 28, 29 తేదీల్లో మూడు రోజుల పాటు నిర్వహించే శంబర పొలమాంబ జాతరకు పార్వతీపురం మన్యం జిల్లా యంత్రాంగం  విస్తృత ఏర్పాట్లు చేపట్టింది. ప్రధాన వేడుకల అనంతరం, పండుగ తొమ్మిది వారాల పాటు కొనసాగుతుంది. ఆంధ్రప్రదేశ్ ప్రభుత్వం దీనిని రాష్ట్ర కార్యక్రమంగా ప్రకటించింది. జిల్లా నలు మూలల నుండి అలాగే పొరుగు జిల్లాలు,  ఒడిశాలోని కొన్ని ప్రాంతాల నుండి సుమారు మూడు లక్షల మంది భక్తులు వస్తారని  జిల్లా యంత్రాంగం అంచనా వేస్తోంది. శంబర పోలమాంబ జాతర అనేది ఉత్తరాంధ్ర జిల్లాలలో ప్రసిద్ధి చెందిన పండుగ. చాలా మంది యాత్రికులు ఆరాధ్య దేవత దర్శనం కోసం వస్తారు. ఉత్తర ఆంధ్రాలో జరిగే అతి పెద్ద పండుగలలో ఇది ఒకటి.

సోమవారం మక్కువ మండలం శంబర వద్ద శంబర పొలమాంబ జాతర ఏర్పాట్లపై మహిళా శిశు సంక్షేమ, గిరిజన సంక్షేమ శాఖ మంత్రి గుమ్మిడి సంధ్యారాణి, జిల్లా కలెక్టర్ ఎ శ్యామ్ ప్రసాద్‌తో కలిసి సమీక్షా సమావేశం నిర్వహించారు. జాతరను విజయవంతం చేసేందుకు ప్రతి అడుగు పకడ్బందీగా వేయాలని అధికారులను ఆదేశించారు. “సిరిమాను ఉత్సవం”లో ముఖ్యంగా విద్యుత్ సరఫరా సమయంలో జాగ్రత్తగా వ్యవహరించాలని హెచ్చరించారు. పారిశుధ్యం అత్యంత ప్రాధాన్యతతో చేపట్టాలని ఆమె అన్నారు. తాగునీరు ఏర్పాటు చేయాలని, వైద్య శిబిరాలు నిర్వహించాలని ఆమె కోరారు. ప్రజలు పోలమాంబ దర్శనం చేసుకునేందుకు ప్రజా రవాణా శాఖ తగినన్ని బస్సులను ఏర్పాటు చేయాలని ఆదేశించారు. ఏర్పాట్లకు ప్రజలు సహకరించాలని ఆమె విజ్ఞప్తి చేశారు. క్యూలైన్లు, దుస్తులు మార్చుకునే గదులు, మరుగుదొడ్లు సక్రమంగా ఏర్పాటు చేయాలని, ఆలయానికి ఆనుకుని ఉన్న గోముఖి నది వద్ద స్నానాలు, వంటలు చేపట్టడంపై దృష్టి సారించాలని ఆమె తెలిపారు. పోలీసులు సరైన బందోబస్తు ఏర్పాటు చేయాలని ఆమె అన్నారు. 2.50 కోట్లతో అభివృద్ధి పనులు చేపట్టినట్లు తెలిపారు. రోడ్డు నిర్వహణ పనులు పూర్తి చేయాల్సి ఉందన్నారు.

జిల్లా కలెక్టర్ ఎ శ్యామ్ ప్రసాద్ ప్రసంగిస్తూ ప్లాస్టిక్ వాడకుండా చూడాలని ఆదేశించారు. జాతర చూసేందుకు ప్రజలు ఎక్కే ఏనుగు కొండ వద్ద ప్రాణాలను రక్షించే ఏర్పాట్లు చేయాలని, మంజూరైన పనులను త్వరితగతిన పూర్తి చేయాలన్నారు. ప్రతి పాయింట్ వద్ద సూచిక బోర్డులు ఏర్పాటు చేయాలని ఆదేశించారు.

పోలీసు సూపరింటెండెంట్ ఎస్వీ మాధవ రెడ్డి మాట్లాడుతూ సరైన పోలీసు బందోబస్తు ఏర్పాటు చేస్తామని, బారికేడింగ్‌తో పాటు సరైన వెలుతురును ఏర్పాటు చేయాలన్నారు.క్యూ లైన్లలో అత్యవసర నిష్క్రమణ పాయింట్లను కూడా ఉండాలని సూచించాడు. దాదాపు ఐదు వందల మంది పోలీసు సిబ్బందిని మోహరిస్తామని చెప్పారు.

ఆర్ టి సి 61 బస్సులను ఏర్పాటు చేస్తోంది. రోడ్ల మధ్యలో ఉన్న స్తంభాలను టాస్క్ కొ మార్చ నుంది. వైద్య, ఆరోగ్య శాఖ 8 వైద్య శిబిరాలకు ఏర్పాట్లు చేస్తోంది. 4 వందల మంది పారిశుధ్య కార్మికుల ఏర్పాటుతో పాటు అవసరమైన మెటీరియల్‌ను పంచాయతీ రాజ్ శాఖ ఏర్పాటు చేస్తుంది.

ఈ సందర్భంగా మంత్రి శంబర జాతర పోస్టర్ను విడుదల చేశారు.

పార్వతీపురం సబ్ కలెక్టర్ మరియు ఐటిడిఎ ప్రాజెక్ట్ ఆఫీసర్ శ్అశుతోష్ శ్రీవాస్తవ, సబ్ డివిజనల్ పోలీస్ ఆఫీసర్ అంకితా సురానా, టెంపుల్ ఎగ్జిక్యూటివ్ ఆఫీసర్  నారాయణరావు, డ్వామా ప్రాజెక్ట్ డైరెక్టర్ కె రామచంద్రరావు, జిల్లా గ్రామ పంచాయితీ అధికారి  తమర్భ కొండల రావు, జిల్లా ఆర్‌డబ్ల్యుఎస్ అధికారి  ఓ ప్రభాకర్ రావు, తదితరులు హాజరయ్యారు.