“ప్రతి కుటుంబం నుంచి ఒక పారిశ్రామికవేత్త” లక్ష్యంతో విజయవాడలో MSME గ్రోత్ వర్క్‌షాప్

విజయవాడ, నేటి పత్రిక ప్రజావార్త :
“ప్రతి కుటుంబం నుంచి ఒక పారిశ్రామికవేత్త (One Family – One Entrepreneur)” అనే లక్ష్యంతో MSME గ్రోత్ వర్క్‌షాప్‌ను బుధవారం విజయవాడలోని స్కూల్ ఆఫ్ ప్లానింగ్ అండ్ ఆర్కిటెక్చర్ (SPAV) ఆడిటోరియం, ITI కళాశాల పక్కన నిర్వహించారు. ఈ కార్యక్రమాన్ని MSME డెవలప్‌మెంట్ కార్పొరేషన్ (MSME-DC) మరియు NTR జిల్లా జిల్లా పరిశ్రమల కేంద్రం (DIC), విజయవాడ సంయుక్తంగా నిర్వహించాయి.

కార్యక్రమాన్ని MSME మంత్రి కె. శ్రీనివాస్ జ్యోతి ప్రజ్వలన చేసి ప్రారంభించారు. రాష్ట్రవ్యాప్తంగా నిర్వహిస్తున్న MSME గ్రోత్ వర్క్‌షాప్‌లలో భాగంగా NTR జిల్లాలో నిర్వహించిన తొలి కార్యక్రమం ఇదే.

కార్యక్రమంలో విజయవాడ ఈస్ట్ నియోజకవర్గ ఎమ్మెల్యే గద్దె రామ్మోహన్, ఎన్ టీ ఆర్ జిల్లా కలెక్టర్ జి. లక్ష్మీశ MSME-DC CEO విశ్వ, MSME-DC ఎగ్జిక్యూటివ్ డైరెక్టర్ ఎ. సుధాకర్, NTR జిల్లా DIC జనరల్ మేనేజర్ ఎం. మధు, PD-DRDA, PD-MEPMA, ZM-APPIIC, వివిధ ప్రభుత్వ శాఖల అధికారులు, MSME అధికారులు తదితరులు పాల్గొన్నారు.

ఈ సందర్భంగా ఎమ్మెల్యే గద్దె రామ్మోహన్ మాట్లాడుతూ, కుటుంబాల ఆర్థిక అభివృద్ధిలో విద్య, నైపుణ్యాభివృద్ధి మరియు స్వయం ఉపాధి ఎంతో ముఖ్యమైనవని తెలిపారు. విద్యార్థులు, యువత మరియు నిరుద్యోగులు అందుబాటులో ఉన్న శిక్షణా కార్యక్రమాలు, ప్రభుత్వ పథకాలను సద్వినియోగం చేసుకుని పారిశ్రామికవేత్తలుగా ఎదగాలని సూచించారు. ప్రతి కుటుంబం నుంచి కనీసం ఒకరు పారిశ్రామికవేత్తగా మారే విధంగా కృషి చేయాలని పిలుపునిచ్చారు.

గౌరవ MSME మంత్రి కె. శ్రీనివాస్ మాట్లాడుతూ, కేంద్ర మరియు రాష్ట్ర ప్రభుత్వాలు అమలు చేస్తున్న వివిధ పథకాలను ఔత్సాహిక పారిశ్రామికవేత్తలు సద్వినియోగం చేసుకోవాలని సూచించారు. ముఖ్యంగా CMEGP, Cluster Development Programme (CDP) తదితర పథకాల ద్వారా లభించే ఆర్థిక, సాంకేతిక మరియు సంస్థాగత సహాయాన్ని ఉపయోగించుకుని కొత్త పరిశ్రమలను స్థాపించాలని కోరారు. ప్రతి కుటుంబం నుంచి ఒక పారిశ్రామికవేత్తను తయారు చేయడం ద్వారా స్వయం ఉపాధితో పాటు ఇతరులకు కూడా ఉపాధి అవకాశాలు కల్పించవచ్చని తెలిపారు.

వర్క్‌షాప్‌లో భాగంగా India SME Forum, Amazon, Walmart తదితర సంస్థలకు చెందిన ప్రముఖ వక్తలు, పరిశ్రమ నిపుణులు పాల్గొని పారిశ్రామికవేత్తలకు విలువైన అవగాహన కల్పించారు. డిజిటల్ వ్యాపారం, ఈ-కామర్స్, మార్కెట్ యాక్సెస్, మార్కెటింగ్, వ్యాపార విస్తరణ, MSMEలకు జాతీయ మరియు అంతర్జాతీయ మార్కెట్ అవకాశాలు తదితర అంశాలపై వారు వివరించారు.

ఈ కార్యక్రమానికి స్వయం సహాయక సంఘాల సభ్యులు, CITD, CIPET, జన శిక్షణ సంస్థ, RSETIలకు చెందిన నిరుద్యోగ శిక్షణార్థులు, సాంకేతిక విద్యాసంస్థల విద్యార్థులు, ఔత్సాహిక పారిశ్రామికవేత్తలు మరియు ఇప్పటికే పరిశ్రమలు నిర్వహిస్తున్న MSME పారిశ్రామికవేత్తలు పెద్ద సంఖ్యలో హాజరయ్యారు.

వర్క్‌షాప్ ద్వారా ప్రభుత్వ పథకాలు, రుణ సౌకర్యాలు, నైపుణ్య శిక్షణ, డిజిటల్ ప్లాట్‌ఫారాలు, మార్కెట్ అనుసంధానం, ఈ-కామర్స్ మరియు MSME అభివృద్ధి అవకాశాలపై పాల్గొన్న వారికి అవగాహన కల్పించారు.

“ప్రతి కుటుంబం నుంచి ఒక పారిశ్రామికవేత్త” అనే లక్ష్యాన్ని సాకారం చేయడం ద్వారా యువతలో స్వయం ఉపాధిని ప్రోత్సహించడం, ఉపాధి అవకాశాలను పెంపొందించడం, MSME రంగాన్ని బలోపేతం చేయడం మరియు NTR జిల్లా, ఆంధ్రప్రదేశ్ ఆర్థిక అభివృద్ధికి మరింత ఊతం ఇవ్వడం ఈ కార్యక్రమం ప్రధాన ఉద్దేశ్యంగా నిలిచింది.