-ఉత్తరాంధ్ర జిల్లాలకు భారీ వర్ష సూచన.. 27 విపత్తు నిర్వహణ బృందాలు సిద్ధం
అమరావతి, నేటి పత్రిక ప్రజావార్త:
‘అర్నాబ్’ తుపాను క్రమంగా బలహీనపడుతోందని విపత్తుల నిర్వహణ సంస్థ ఎండీ ప్రఖర్ జైన్ తెలిపారు. తుపాను వాయువ్య దిశగా కదులుతూ బాపట్ల–విశాఖపట్నం మధ్య, నరసాపురం సమీపంలో తీరం దాటినట్లు వెల్లడించారు. గత ఆరు గంటల్లో గంటకు 5 కిలోమీటర్ల వేగంతో కదిలిన తుపాను మధ్యాహ్నానికి బలహీనపడిందని, బుధవారం రాత్రికి తీవ్ర వాయుగుండంగా మారే అవకాశం ఉందని తెలిపారు.
ఉత్తరాంధ్రకు భారీ వర్ష సూచన
గురువారం శ్రీకాకుళం, మన్యం, విజయనగరం జిల్లాల్లో ఒకటి, రెండు ప్రాంతాల్లో భారీ వర్షాలు కురిసే అవకాశం ఉందని ప్రఖర్ జైన్ తెలిపారు. మిగిలిన ప్రాంతాల్లో తేలికపాటి నుంచి మోస్తరు వర్షాలు కురిసే అవకాశముందని చెప్పారు. గంటకు 40 నుంచి 50 కిలోమీటర్ల వేగంతో ఈదురుగాలులు వీచే అవకాశం ఉన్నందున ప్రజలు అప్రమత్తంగా ఉండాలని సూచించారు.
భారీ వర్షాల కారణంగా ఆకస్మిక వరదలు వచ్చే ప్రమాదం ఉందని హెచ్చరించారు. లోతట్టు ప్రాంతాల ప్రజలు జాగ్రత్తలు తీసుకోవాలని, పొంగిపొర్లుతున్న వాగులు, కాలువలను దాటేందుకు ప్రయత్నించవద్దని సూచించారు.
అత్యవసర సహాయక చర్యలకు 27 బృందాలు
తుపాను ప్రభావిత జిల్లాల్లో అత్యవసర సహాయక చర్యల కోసం 16 జాతీయ విపత్తు స్పందన దళం (ఎన్‌డీఆర్‌ఎఫ్‌), 11 రాష్ట్ర విపత్తు స్పందన దళం (ఎస్‌డీఆర్‌ఎఫ్‌) బృందాలను ముందస్తుగా సిద్ధంగా ఉంచినట్లు అధికారులు తెలిపారు. వీటిలో ఒడిశా నుంచి నాలుగు ఎన్‌డీఆర్‌ఎఫ్‌ బృందాలు, ఢిల్లీ నుంచి మూడు బృందాలు వచ్చినట్లు వెల్లడించారు.
అనకాపల్లి, కాకినాడ, కోనసీమ, తూర్పుగోదావరి, ఏలూరు, పశ్చిమగోదావరి, కృష్ణా, శ్రీకాకుళం, బాపట్ల, అల్లూరి సీతారామరాజు, పోలవరం, మన్యం, ఎన్టీఆర్‌, విశాఖ జిల్లాల్లో సహాయక బృందాలను అందుబాటులో ఉంచారు. వీటితోపాటు అగ్నిమాపక, పోలీసు సిబ్బంది చెట్లు తొలగించడం, రహదారులపై అడ్డంకులను తొలగించడం వంటి పునరుద్ధరణ పనుల్లో నిమగ్నమయ్యారు.
పలు ప్రాంతాల్లో భారీ వర్షపాతం నమోదు
బుధవారం సాయంత్రం 5 గంటల వరకు పలు ప్రాంతాల్లో గణనీయమైన వర్షపాతం నమోదైంది.
చల్లపల్లి, కృష్ణా జిల్లా: 111.7 మి.మీ.
గూడవల్లి, బాపట్ల జిల్లా: 104 మి.మీ.
తరకటూరు, కృష్ణా జిల్లా: 102 మి.మీ.
బోడగుంట: 101 మి.మీ.
ఘంటసాల: 100 మి.మీ.
గూడూరు: 97 మి.మీ.
చేబ్రోలు, కాకినాడ జిల్లా: 92 మి.మీ.
నాగాయలంక, కృష్ణా జిల్లా: 89.5 మి.మీ.
హంసలదీవి: 88 మి.మీ.
తుపాను బలహీనపడుతున్నప్పటికీ భారీ వర్షాలు, ఈదురుగాలులు, ఆకస్మిక వరదల ప్రమాదం నేపథ్యంలో ప్రజలు అప్రమత్తంగా ఉండాలని అధికారులు సూచించారు. వాగులు, కాలువలు పొంగిపొర్లుతున్న సమయంలో వాటిని దాటే ప్రయత్నం చేయవద్దని, అధికారుల సూచనలను పాటించాలని కోరారు.
