-ప్రజల ప్రాణాలు, ఆస్తుల పరిరక్షణకు రాత్రింబవళ్లు సహాయక చర్యలు
అమరావతి, నేటి పత్రిక ప్రజావార్త:
తుఫాను ప్రభావిత ప్రాంతాల్లో ప్రజలకు అండగా నిలుస్తూ ఆంధ్రప్రదేశ్ స్టేట్ డిజాస్టర్ రెస్పాన్స్ ఫోర్స్ (ఏపీఎస్‌డీఆర్‌ఎఫ్‌) బృందాలు విశేష సేవలు అందిస్తున్నాయి. ఆంధ్రప్రదేశ్ స్పెషల్ పోలీస్ (ఏపీఎస్‌పీ)లో భాగంగా పనిచేస్తున్న ఏపీఎస్‌డీఆర్‌ఎఫ్‌కు చెందిన ఆరు యూనిట్లు రాష్ట్రంలోని వివిధ జిల్లాల్లో నిరంతరం సహాయక చర్యలు చేపడుతున్నాయి.
ఏపీఎస్‌పీ బెటాలియన్ల ఇన్‌ఛార్జ్‌ ఇన్‌స్పెక్టర్ జనరల్ ఆఫ్ పోలీస్ సీహెచ్‌ శ్రీకాంత్, ఐపీఎస్‌ పర్యవేక్షణలో, ఆయన సూచనల మేరకు విపత్తు స్పందన బృందాలు తుఫాను ప్రభావిత ప్రాంతాల్లో ప్రజల రక్షణకు ప్రాధాన్యతనిస్తూ విధులు నిర్వహిస్తున్నాయి.
పది జిల్లాల్లో సహాయక చర్యలు
బాపట్ల, కోనసీమ, కాకినాడ, శ్రీకాకుళం, అల్లూరి సీతారామరాజు, పశ్చిమగోదావరి, తూర్పుగోదావరి, అనకాపల్లి, కృష్ణా, పోలవరం జిల్లాల్లో ఏపీఎస్‌డీఆర్‌ఎఫ్‌ బృందాలు సహాయక చర్యల్లో పాల్గొంటున్నాయి. ప్రజల ప్రాణాలను కాపాడటంతోపాటు ప్రభుత్వ, ప్రైవేటు ఆస్తులకు నష్టం జరగకుండా అవసరమైన చర్యలు చేపడుతున్నాయి.
తుఫాను ప్రభావంతో రహదారులపై కూలిపోయిన చెట్లను ఎప్పటికప్పుడు తొలగిస్తూ రాకపోకలను పునరుద్ధరిస్తున్నాయి. విద్యుత్‌ శాఖ సిబ్బందికి సహకరిస్తూ దెబ్బతిన్న విద్యుత్‌ లైన్ల పునరుద్ధరణ పనుల్లో భాగస్వాములవుతున్నాయి.
వరదల్లో చిక్కుకున్న వారికి రక్షణ
తుఫాను కారణంగా ఏర్పడిన వరదల్లో చిక్కుకున్న ప్రజలను సురక్షిత ప్రాంతాలకు తరలిస్తూ, ఆపదలో ఉన్నవారికి అవసరమైన సహాయాన్ని అందిస్తున్నాయి. ప్రతికూల వాతావరణ పరిస్థితులను సైతం లెక్కచేయకుండా రాత్రింబవళ్లు విధులు నిర్వహిస్తూ ప్రజలకు భరోసా కల్పిస్తున్నాయి.
ప్రజల రక్షణే ప్రధాన లక్ష్యం
ఐజీ సీహెచ్‌ శ్రీకాంత్, ఐపీఎస్‌ పర్యవేక్షణలో ఏపీఎస్‌డీఆర్‌ఎఫ్‌ బృందాలు ప్రభుత్వ యంత్రాంగంతో సమన్వయం చేసుకుంటూ సహాయక చర్యలను కొనసాగిస్తున్నాయి. విపత్కర పరిస్థితుల్లో ప్రజల ప్రాణాలు, ఆస్తుల పరిరక్షణకు అంకితభావంతో పనిచేస్తూ బాధితులకు అండగా నిలుస్తున్న బృందాల సేవలు ప్రశంసనీయం.
