రాబోయే రోజుల్లో ఏపీని నెం.1 స్టేట్‌గా తీర్చిదిద్దుతాం

-నీళ్లుంటే సంపద సృష్టించవచ్చు . సంపద వల్ల ప్రభుత్వానికి ఆదాయం.. తద్వారా పేదరిక నిర్మూలన
-పేదరికంలేని సమాజాన్ని ఏర్పాటు చేసుకోవాలి
-అభివృద్ధి చేస్తాం.. సంక్షేమం అందిస్తాం.. ఆదాయం పెంచుతాం.
-పెంచిన ఆదాయం పేదలకు పంచే బాధ్యత మాది
శ్రీశైలాన్ని ఒక దివ్యక్షేత్రంగా తయారుచేసే బాధ్యత మాది
-సామాజిక న్యాయం కూటమి ప్రభుత్వ సిద్ధాంతం
-ముఖ్యమంత్రి నారా చంద్రబాబు నాయుడు

శ్రీశైలం/నంద్యాల జిల్లా. నేటి పత్రిక ప్రజావార్త :
నంద్యాల జిల్లా సున్నిపెంట నీటి వినియోగదారుల సంఘం ప్రతినిధులతో ముఖ్యమంత్రి నారా చంద్రబాబు నాయుడు సమావేశమయ్యారు. ఈ సందర్భంగా సీఎం చంద్రబాబు మాట్లాడుతూ ఏమన్నారంటే..

నేను ఇక్కడికి మీలో ఒక బాధ్యత చెప్పడానికి వచ్చాను. ఆ బాధ్యత కూడా నీరు, సంపద. నీళ్లుంటే సంపద సృష్టిస్తాం, నీళ్లు లేకపోతే ఎడారిగా ఉంటుంది. తిండి లేకపోయినా ఉంటాం కానీ నీరు లేకుండా ఉండలేం. నీరు సంపద సృష్టిస్తుంది. సంపద వల్ల ప్రభుత్వానికి ఆదాయం వస్తుంది. తద్వారా పేదరిక నిర్మూలన జరుగుతుంది. జీరో పావర్టీ అన్నాను. పేదరికంలేని సమాజాన్ని ఏర్పాటు చేసుకోవాలి. ఒకపక్క సంక్షేమ కార్యక్రమాలు ఇవ్వాలి, ఇంకోపక్క అభివృద్ధి చేయాలి, మా తమ్ముళ్లకు ఉద్యోగాలు ఇవ్వాలి. ఆ ఉద్యోగాలు కూడా మామూలు కాకుండా నైపుణ్యాన్ని కూడా నేర్పించాలని స్కిల్ డెవలప్‌మెంట్ కోసం స్కిల్ సెన్సస్ పెట్టాం.

శ్రీశైలంలో ఉండే పిల్లలు అమెరికాలో ఉండే న్యూయార్క్ లో పనిచేసే శక్తిని మీకు ఇవ్వాలనేది నా అభిమతం. ఇప్పటికే 25 ఏళ్ల క్రిందట చేసిన పనులు మీరు చూశారు. హైదరాబాద్ నగరాన్ని మీరు చూశారు. ప్రపంచమంతా ఐటీ ప్రొఫెషన్స్ ను మీరు చూశారు. కానీ అప్పుడప్పుడు మీరు ఏం ఆలోచిస్తారంటే అన్ని పనులు అవుతా ఉంటే ఈసారి ఇంకొకడు వస్తున్నాడు కొత్త బిచ్చగాడు ఏదో చేస్తారని ఓట్లు వేసేస్తున్నారు. వాళ్లు వచ్చి అడవి పందుల మాదిరి మొత్తం చెడగొట్టి పోయారు. సర్వనాశనం చేసి వెళ్లారు.. భ్రష్టుపట్టించి వెళ్లారు.. విధ్వంసం చేసి వెళ్లిపోయారు. ఇప్పుడు అవన్నీ చేయాలంటే నాకొక ఐదు పదేళ్లు పట్టేలా ఉంది. కానీ నాకొక సంకల్పం ఉంది. మా కూటమిని మీరు చూస్తే.. నేను గానీ, పవన్ కళ్యాణ్ గానీ, నరేంద్ర మోదీ గానీ అందరం కూడా ఒక ధృడ సంకల్పంతో ఉన్నాం. మీకు ఏమాత్రం అనుమానం వద్దు. పరిగెత్తిస్తాం.. మళ్లీ రాబోయే రోజుల్లో నెం.1 స్టేట్‌గా తయారుచేసే బాధ్యత మాది అని మీకు హామీ ఇస్తున్నా.

ఇక్కడికి వచ్చినప్పుడు.. ఈరోజే ఒక వార్త వచ్చిందని మీరు గుర్తుపెట్టుకోవాలి. సుప్రీంకోర్టు ఏదైతే ఉందో.. షెడ్యూల్ కులాల కోసం ఎ,బి,సి,డి కేటగిరైజేషన్ సబబు అని ఒక నిర్ణయం చేశారు. నేను ఈరోజు చెప్పడం కాదు. సామాజిక న్యాయం మా పార్టీ సిద్ధాంతం. ఒకరికి కాదు అందరికీ న్యాయం జరగాలి. అందుకే 1996-97లో రామచంద్రరావు కమిషన్ వేసి ఆర్థిక పరిస్థితులన్నీ అధ్యయనం చేసిన తర్వాత ఎ,బి,సి,డి కేటగిరైజేషన్ నేనే తీసుకొచ్చా. తర్వాత అది డిఫరెంట్ కోర్టుల్లో ఛాలెంజ్ కావడంతో ఇప్పటివరకు అనేక విధాలుగా ముందుకుపోయి ఈరోజు దాన్ని ఏడుగురు జడ్జిల బెంచ్ ధృవీకరించారు. దాన్ని కూడా ఆమోదించారు.

జనాభా దామాషా ప్రకారం ప్రతి కులానికి, ప్రతి మతానికి, ప్రతి వర్గానికీ న్యాయం చేయడం మా పార్టీ సిద్ధాంతం. జరిగిన ఎన్నికల్లో సీట్లు కూడా.. శబరిని ఇక్కడ ఎంపీగా ఇస్తే పక్కన ఎంపీగా నాగరాజు ఒక కురుబ కమ్యూనిటీకి సంబంధించిన వ్యక్తికి ఇచ్చాం. అనంతపురంలో ఒక బోయ వాల్మీకి కమ్యూనిటీకి ఎంపీ ఇచ్చాం. నంద్యాలలో ఫరూక్ కు ఆరోజు ఎమ్మెల్యే గా ఇచ్చాం, ఈరోజు మంత్రిగా చేశాం. కర్నూలులో టీజీ భరత్ ను ఒక వైశ్య కులం నుంచి ఎమ్మెల్యేగా ఇచ్చి మంత్రిని చేశాం. సామాజిక న్యాయం జరగాలి. అన్ని వర్గాలకు న్యాయం జరగాలి. ఈ ప్రభుత్వం అందరిది. నేను మీ అందరివాడిగా ఉంటాను శాశ్వతంగా అదే చేస్తాను. ఎక్కడ పేదవాడు ఉంటే అక్కడ ఉంటాను, అందుకే జీరో పావర్టీ అన్నాను.

మీ గ్రామంలో పేదవాళ్లు ఉంటే వాళ్లను పైకి తీసుకొచ్చే బాధ్యత పైకొచ్చినవాళ్లు తీసుకోవాలి. నేను ఒక ఫార్ములా మాట్లాడాను. పీ-3 (పబ్లిక్, ప్రైవేట్ పార్ట్ నర్ షిప్) మోడల్లో హైదరాబాద్ బాగుపడింది. హైదరాబాద్‌ లో రోడ్లు కానీ, టెలి కమ్యూనికేషన్ కానీ, కరెంట్ కానీ ఇవన్నీ కూడా వచ్చాయంటే ప్రైవేట్ వ్యక్తుల భాగస్వామ్యంతో వచ్చాయి. ఇప్పుడు నేను మాట్లాడేది ఎవరైతే బాగుపడ్డారో సమాజంలో వాళ్ల బాధ్యత పేదవాళ్లను పైకి తీసుకురావడం. పైనుండే పదిమంది కింద ఉండే 25 మందికి చేయూత ఇవ్వగలిగితే పేదరిక నిర్మూలన అసాధ్యం కాదు. అదే నా జీవితాశయం, నా సంకల్పం. తప్పకుండా ఈరోజు మల్లన్న సాక్షిగా చెబుతున్నా ఇది సాధించి తీరుతామని మీ అందరికీ హామీ ఇస్తున్నా.

ఈరోజు రూ.33 వేల కోట్లు ఖర్చు పెట్టి పింఛన్లు ఇస్తున్నాం. నేను ఒకటే హామీ ఇస్తున్నా. సంపద సృష్టించడం తెలిసిన పార్టీ మనది. ఆ సంపద పేదవాళ్లకు పంచడం తెలిసిన పార్టీ మనది.. మొన్నటివరకు పరిపాలించిన పార్టీ దోచుకోవడం తెలిసిన పార్టీ. దాచుకోవడం, దోచుకోవడం, వ్యవస్థలను విధ్వంసం చేయడం, నిద్రలేస్తే అబద్ధాలు చెప్పడం. రెండు నెలలు కాలేదు నేను వచ్చి.. ఇప్పటికే నేను ఏమీ చేయలేదని మాట్లాడుతున్నారు. నేను ఏం చేశానో, చేయలేదో ఈ ప్రజలే సాక్ష్యమని విజ్ఞప్తి చేస్తున్నా. ఒక పక్క అభివృద్ధి చేస్తా, ఒక పక్క సంక్షేమానికి పెద్దపీట వేస్తా, ఇంకోపక్క ఆదాయం పెంచుతా. పెంచిన ఆదాయం ఈ పేదవాళ్లకు పంచే బాధ్యత నాది అని హామీ ఇస్తున్నా.

నా జీవితంలో ఏదైతే ఒక ఆశయం.. ఒక్కసారి రిజర్వాయర్‌లోకి మంచి వర్షాలు పడితే ఐదేళ్లు కరువు లేకుండా చేయాలనే ఉద్దేశంతోనే ఆరోజు ప్రాజెక్టుల కోసం రూ.68 వేల కోట్లు ఖర్చు పెట్టాం. మైక్రో ఇరిగేషన్ తీసుకొచ్చాను, డ్రిప్ ఇరిగేషన్ తీసుకొచ్చాను అనేక విధాలుగా ముందుకుపోయాం. కానీ వీళ్లు వచ్చిన తర్వాత అన్నీ ఆపేశారు. ఈరోజు వర్షాలు బ్రహ్మాండంగా పడ్డాయ్, దేవుడు కరుణించాడు. చాలా సంతోషం అదే సమయంలో నేను ఆలోచించేది అన్ని రిజర్వాయర్లలో నీళ్లు పెట్టి ఆ నీళ్లు కూడా పొదుపుగా వాడుకుని అక్కడ నుంచి మీకు సంపద సృష్టించే మార్గాలు, ఆదాయం పెంచే మార్గాలు ఎన్ని ఉన్నాయో అన్ని కూడా నేర్పించే బాధ్యత నాది, మాది. మీరు కూడా పూర్తిగా అనుసంధానమైతే మనకు మంచి జరుగుతుంది. రాష్ట్రానికి మంచి జరుగుతుంది. దీనికి పూర్తిగా ముందుకు రావాల్సిందిగా మరొక్కసారి కోరుకుంటున్నాను.

మళ్లీ మళ్లీ వస్తా, ఈ శ్రీశైలాన్ని ఒక దివ్యక్షేత్రంగా తయారుచేసే బాధ్యత తీసుకుంటాం. ఇదొక పవిత్రమైన పుణ్యభూమి, ఇక్కడికి దేశంలోనే కాకుండా ప్రపంచం మొత్తం వచ్చే అవకాశాలు ఉన్నాయి. అలాంటప్పుడు దీన్ని ఏవిధంగా అభివృద్ధి చేయాలో చేయడం ఇప్పుడే మన రాజశేఖర్ రెడ్డి చెప్పినట్టు ఇక్కడ సమస్యలన్నీ పరిష్కారం చేస్తాం, శబరి చెప్పినట్టు నేషనల్ హైవే సిద్ధేశ్వరం దగ్గర ఐకానిక్ బ్రిడ్జే కాకుండా దానికి నీళ్లన్నీ పెట్టడానికి ఏం చేయాలో గవర్నమెంట్ ఆఫ్ ఇండియాతో చర్చించి ఐకానిక్ బ్రిడ్జే కాకుండా రిజర్వాయర్‌గా తయారు చేయడానికి ఏం చేయాలో చేస్తాం.. దానికి కూడా శ్రీకారం చుడతాం’’ అంటూ సీఎం చంద్రబాబు తన ప్రసంగం ముగించారు.

ఈ కార్యక్రమంలో రాష్ట్ర న్యాయ మైనారిటీ సంక్షేమ శాఖ మంత్రి ఎన్ఎండి ఫరూక్, రోడ్లు భవనాలు, మౌలిక సదుపాయాలు, పెట్టుబడుల శాఖ మంత్రి బీసీ జనార్దన్ రెడ్డి, జల వనరుల శాఖ మంత్రి డా. నిమ్మల రామానాయుడు, విద్యుత్ శాఖ మంత్రి గొట్టిపాటి రవికుమార్, శ్రీశైలం ఎమ్మెల్యే బుడ్డా రాజశేఖర్ రెడ్డి, నంద్యాల పార్లమెంటు సభ్యులు బైరెడ్డి శబరి, డోన్ ఎమ్మెల్యే కోట్ల జయ సూర్యప్రకాష్ రెడ్డి, నందికొట్కూరు ఎమ్మెల్యే గిత్త జయసూర్య, ఆళ్లగడ్డ ఎమ్మెల్యే భూమా అఖిలప్రియ, పాణ్యం ఎమ్మెల్యే గౌరు చరిత రెడ్డి, జిల్లా కలెక్టర్ శ్రీమతి రాజకుమారి, డిఐజీ కే ప్రవీణ్ కుమార్, జిల్లా ఎస్పీ అధిరాజ్ సింగ్ రాణా తదితరులు పాల్గొన్నారు.