-లేళ్ల అప్పిరెడ్డిపై పీడీ యాక్ట్ నమోదు చేయాలి: ఎమ్మెల్సీ వర్ల రామయ్య
అమరావతి, నేటి పత్రిక ప్రజావార్త:
గుంటూరు జిల్లా ప్రత్తిపాడు నియోజకవర్గ పరిధిలోని వెంగళాయపాలెం పరిషత్ ఎన్నికల్లో బ్యాలెట్ బాక్సును బలవంతంగా లాక్కెళ్లిన ఘటనపై టీడీపీ నేతల బృందం రాష్ట్ర ఎన్నికల సంఘానికి ఫిర్యాదు చేసింది. వైఎస్సార్‌సీపీ నాయకుడు లేళ్ల అప్పిరెడ్డి, ఆయన అనుచరులపై కఠిన చర్యలు తీసుకోవాలని కోరింది.
ఎమ్మెల్సీ వర్ల రామయ్య, మాజీ మంత్రి పీతల సుజాత, బ్రాహ్మణ కార్పొరేషన్ చైర్మన్ బుచ్చి రాంప్రసాద్, మీడియా కోఆర్డినేటర్ దారపనేని నరేంద్రబాబులతో కూడిన బృందం ఎస్ఈసీ కార్యదర్శి డాక్టర్ ఏ. మల్లికార్జున, ఐజీ రాజకుమారిని కలిసి ఫిర్యాదు అందజేసింది.
అనంతరం వర్ల రామయ్య మాట్లాడుతూ, ఎన్నికల్లో ఓటమి భయంతోనే వైఎస్సార్‌సీపీ అల్లర్లు, కుట్రలకు పాల్పడుతోందని ఆరోపించారు. లేళ్ల అప్పిరెడ్డిపై 2018 నుంచి ఇప్పటివరకు 19 క్రిమినల్ కేసులు పెండింగ్‌లో ఉన్నాయని, అలాంటి వ్యక్తిని అమాయకుడిగా ఎలా పేర్కొంటారని వైఎస్ జగన్‌ను ప్రశ్నించారు.
వెంగళాయపాలెంలో బ్యాలెట్ బాక్సును పోలింగ్ కేంద్రం నుంచి బయటకు తీసుకెళ్లడంతో పాటు, పోలింగ్ అధికారిపై దౌర్జన్యం చేసినట్లు ఆరోపిస్తూ అందుకు సంబంధించిన ఫొటో ఆధారాలను ఎన్నికల సంఘానికి సమర్పించినట్లు తెలిపారు. శాంతిభద్రతలకు విఘాతం కలగకుండా లేళ్ల అప్పిరెడ్డిపై పీడీ యాక్ట్ నమోదు చేయాలని డిమాండ్ చేశారు.
రాష్ట్రవ్యాప్తంగా 47 అసెంబ్లీ నియోజకవర్గాలు, 19 పార్లమెంట్ పరిధులకు సంబంధించి మొత్తం 82 ఫిర్యాదులను ఆధారాలతో సహా ఎన్నికల సంఘానికి అందజేసినట్లు వెల్లడించారు. ఎన్నికల కోడ్ ఉల్లంఘనలు, పోలింగ్ కేంద్రాల్లో ఏజెంట్లకు అనుమతి నిరాకరణ వంటి అంశాలపై విచారణ జరిపి బాధ్యులపై చట్టపరమైన చర్యలు తీసుకోవాలని కోరినట్లు వర్ల రామయ్య తెలిపారు.
