వైభవంగా జేఎన్‌టీయూ-జీవీ ప్రథమ స్నాతకోత్సవం

-గవర్నర్ చేత పట్టాలు, స్వర్ణ పతకాల ప్రదానం – మయూర్ పట్నాలకు గౌరవ డాక్టరేట్ ప్రదానం

విశాఖపట్నం, నేటి పత్రిక ప్రజావార్త :
జవహర్‌లాల్ నెహ్రూ సాంకేతిక విశ్వవిద్యాలయం–గురజాడ, విజయనగరం (జేఎన్‌టీయూ-జీవీ) ప్రథమ స్నాతకోత్సవం శనివారం విశాఖపట్నంలోని ఏయూ కన్వెన్షన్ సెంటర్‌లో అత్యంత వైభవంగా, అంగరంగ వైభవంగా జరిగింది.

ఈ కార్యక్రమానికి ఆంధ్రప్రదేశ్ రాష్ట్ర గవర్నర్, జేఎన్‌టీయూ-జీవీ ఛాన్సలర్ ఎస్. అబ్దుల్ నజీర్ అధ్యక్షత వహించారు. ఆంధ్రప్రదేశ్ రాష్ట్ర ఉన్నత విద్యామండలి (APSCHE) ఛైర్మన్ ప్రొఫెసర్ ఎం. మధుమూర్తి ప్రత్యేక అతిథిగా పాల్గొన్నారు. నిర్మాన్ ఆర్గనైజేషన్ వ్యవస్థాపకుడు & గ్లోబల్ సీఈఓ మయూర్ పట్నాల ముఖ్య అతిథిగా హాజరై, *గౌరవ డాక్టర్ ఆఫ్ సైన్స్ (Honoris Causa) పట్టాను అందుకున్నారు.

గవర్నర్‌కు విశ్వవిద్యాలయ ఉపకులపతి ప్రొఫెసర్ వి.వి. సుబ్బారావు ఘన స్వాగతం పలికారు. గార్డ్ ఆఫ్ హానర్, అకడమిక్ ప్రొసెషన్ అనంతరం జాతీయ గీతం, జాతీయ గానం ఆలపించడంతో స్నాతకోత్సవ కార్యక్రమం ప్రారంభమైంది. అనంతరం ఛాన్సలర్ అనుమతితో ఉపకులపతి స్నాతకోత్సవాన్ని ప్రారంభించి, విశ్వవిద్యాలయం సాధించిన విద్యా, పరిశోధన, నవకల్పన, మౌలిక సదుపాయాల అభివృద్ధి తదితర విశేషాలను సభకు వివరించారు.

సాంకేతిక రంగంలో విశిష్ట సేవలు, వినూత్న ఆవిష్కరణలు, పారిశ్రామిక రంగంలో చేసిన విశేష కృషికి గుర్తింపుగా మయూర్ పట్నాల, వ్యవస్థాపకుడు & గ్లోబల్ సీఈఓ, నిర్మాన్ ఆర్గనైజేషన్ డాక్టర్ ఆఫ్ సైన్స్ (హానోరిస్ కాజా) గౌరవ డాక్టరేట్‌ను గవర్నర్, ఛాన్సలర్ ఎస్. అబ్దుల్ నజీర్ ప్రదానం చేశారు. ఈ సందర్భంగా సభలో హర్షధ్వానాలు మార్మోగాయి.

ఉపకులపతి ఆధ్వర్యంలో పట్టభద్రులు స్నాతక ప్రతిజ్ఞ చేశారు. అనంతరం ఛాన్సలర్ వివిధ విభాగాలకు చెందిన అర్హులైన విద్యార్థులకు డిగ్రీలను ప్రదానం చేశారు. ఈ సందర్భంగా విశ్వవిద్యాలయం అభివృద్ధి చేసిన బ్లాక్‌చైన్ ఆధారిత టాంపర్-ప్రూఫ్ ఒరిజినల్ డిగ్రీ సిస్టమ్ ద్వారా డిజిటల్ డిగ్రీల జారీ ప్రక్రియను కూడా గవర్నర్ ప్రారంభించారు.

వివిధ విభాగాల్లో అత్యుత్తమ ప్రతిభ కనబరిచిన 15 మంది విద్యార్థులకు విశ్వవిద్యాలయ స్వర్ణ పతకాలను గవర్నర్ అందజేసి అభినందించారు.

ప్రత్యేక ఆహ్వానితులుగా విచ్చేయాల్సిన రాష్ట్ర మానవ వనరుల అభివృద్ధి, ఐటీ, ఎలక్ట్రానిక్స్ & కమ్యూనికేషన్స్ మరియు రియల్ టైమ్ గవర్నెన్స్ శాఖ మంత్రి నారా లోకేష్ ప్రభుత్వ అధికారిక కార్యక్రమాలలో నిమగ్నమై ఉండటంతో ఈ స్నాతకోత్సవానికి హాజరు కాలేకపోయారు.

ఈ సందర్భంగా ప్రసంగించిన ఏపీఎస్‌సీహెచ్‌ఈ ఛైర్మన్ ప్రొఫెసర్ ఎం. మధుమూర్తి ఉన్నత విద్యలో నాణ్యత, పరిశోధన, ఆవిష్కరణలకు ప్రాధాన్యం పెరుగుతున్న నేపథ్యంలో విద్యార్థులు ప్రపంచ స్థాయి నైపుణ్యాలను అలవరుచుకొని దేశాభివృద్ధిలో భాగస్వాములు కావాలని పిలుపునిచ్చారు.

నిర్మాన్ ఆర్గనైజేషన్ వ్యవస్థాపకుడు & గ్లోబల్ సీఈఓ మయూర్ పట్నాల పట్టభద్రులను ఉద్దేశించి మాట్లాడుతూ, సృజనాత్మకత, ఆవిష్కరణలు, పారిశ్రామిక దృక్పథం, నాయకత్వ లక్షణాలతో ప్రపంచ స్థాయిలో రాణించాలని, సమాజానికి ఉపయోగపడే సాంకేతిక పరిష్కారాలను అందించాలని ఆకాంక్షించారు.

స్నాతకోత్సవ ప్రసంగంలో గవర్నర్, ఛాన్సలర్ ఎస్. అబ్దుల్ నజీర్ పట్టభద్రులు, పరిశోధకులు, స్వర్ణ పతక గ్రహీతలకు అభినందనలు తెలియజేస్తూ, జీవితాంతం నిజాయితీ, నైతిక విలువలు, క్రమశిక్షణ, సామాజిక బాధ్యతలను పాటిస్తూ దేశ సేవలో తమ ప్రతిభను వినియోగించాలని సూచించారు.

అనంతరం విశిష్ట అతిథులను సత్కరించి, కృతజ్ఞతా సభ నిర్వహించారు. జాతీయ గీతం, జాతీయ గానం అనంతరం స్నాతకోత్సవాన్ని అధికారికంగా ముగించారు. జేఎన్‌టీయూ-జీవీ ప్రథమ స్నాతకోత్సవం విశ్వవిద్యాలయ చరిత్రలో ఒక చిరస్మరణీయ ఘట్టంగా నిలిచింది.