గ్రూప్‌-1 మెయిన్స్‌ రద్దు చేయడం హర్షణీయం… : కె.రామకృష్ణ

విజయవాడ, నేటి పత్రిక ప్రజావార్త :
2018లో నిర్వహించిన ఎపిపిఎస్‌సి గ్రూప్‌-1 మెయిన్స్‌ను ఎపీ హైకోర్టు రద్దు చేస్తూ తీర్పునివ్వడంపట్ల సిపిఐ రాష్ట్ర కార్యదర్శి కె రామకృష్ణ హర్షం వ్యక్తం చేశారు. ఈ మేరకు కె.రామకృష్ణ నేడొక ప్రకటన విడుదల చేశారు. ఆంధ్రప్రదేశ్‌ పబ్లిక్‌ సర్వీస్‌ కమీషన్‌ 2018 గ్రూప్‌-1 పరీక్షల ఫలితాలను ప్రకటించింది. ప్రశ్నాపత్రాల డిజిటల్‌ వాల్యుయేషన్‌పై పలువురు అభ్యర్థులు ఎపీ హైకోర్టును ఆశ్రయించారు. దీంతో మెయిన్స్‌ ఫలితాలను నిలిపివేశారు. జవాబు పత్రాల మాన్యువల్‌ మూల్యాంకనం చేయాలని గతంలో ఎపిపిఎస్‌సిని హైకోర్టు ఆదేశించింది. ఇప్పుడు గ్రూప్‌-1 మెయిన్స్‌ పరీక్షను రద్దు చేస్తూ, మరో 6 నెలల్లో మెయిన్స్‌ పరీక్ష నిర్వహించాలని రాష్ట్ర హైకోర్టు ఎపిపిఎస్‌సిని ఆదేశించింది. ఎపిపిఎస్‌సిలో అధికార పార్టీకి చెందినవారే సభ్యులుగా ఉండడం సరైంది కాదు. 2018లో నిర్వహించిన గ్రూప్‌-1 మెయిన్స్‌ పరీక్ష రద్దుచేస్తూ హైకోర్టు ఇచ్చిన తీర్పును స్వాగతిస్తున్నాం. హైకోర్టులోనైనా అభ్యర్థులకు న్యాయం జరగడంపట్ల హర్షం వ్యక్తం చేస్తున్నాం. ఆంధ్రప్రదేశ్‌ పబ్లిక్‌ సర్వీస్‌ కమీషన్‌ ఇకనైనా పారదర్శకంగా వ్యవహరించాలని, రానున్న కాలంలోనైనా జవాబు పత్రాలను మాన్యువల్‌ మూల్యాంకనం చేయాలని కోరుతున్నామన్నారు.