దశాబ్దాల భూసమస్యలకు పరిష్కారం చూపిన తిరుపతి ‘శెట్టిపల్లి మోడల్ టౌన్‌షిప్’..

అమరావతి, నేటి పత్రిక ప్రజావార్త :
7వ కలెక్టర్ల కాన్ఫరెన్స్‌లో ‘ఉత్తమ విధానాలు’ విభాగంలో నాల్గవ బెస్ట్ ఇనిషియేటివ్‌గా తిరుపతి జిల్లా కలెక్టర్ డాక్టర్ ఎస్. వెంకటేశ్వర్ ‘శెట్టిపల్లి మోడల్ టౌన్‌షిప్’ ప్రాజెక్టుపై అద్భుతమైన ప్రెజెంటేషన్ ఇచ్చారు. దశాబ్దాలుగా అపరిష్కృతంగా ఉన్న అత్యంత క్లిష్టమైన భూసమస్యలను ‘ల్యాండ్ పూలింగ్ స్కీమ్’ (LPS) ద్వారా ఎలా పరిష్కరించాలో ఈ ప్రాజెక్టు ద్వారా ఆయన సవివరంగా అధికారులకు వివరించారు.

తిరుపతికి కూతవేటు దూరంలో, విమానాశ్రయం మరియు రైల్వే స్టేషన్‌కు అతి దగ్గరగా అద్భుతమైన రవాణా సదుపాయాలున్న ప్రాంతం ఈ శెట్టిపల్లి గ్రామం. సుమారు 636.38 ఎకరాల విస్తీర్ణమున్న ఈ గ్రామాన్ని 1948 చట్టం కింద ఇనామ్ ఎస్టేట్‌గా ప్రకటించి, 1979లో ప్రభుత్వం స్వాధీనం చేసుకుందని కలెక్టర్ తెలిపారు. అయితే, సెటిల్‌మెంట్ ప్రక్రియ పూర్తి కాకపోవడంతో అక్కడ ఉంటున్న వారికి ఎటువంటి చట్టపరమైన హక్కులు, పట్టాలు దక్కలేదని ఆయన సభ ముందు ఉంచారు. ఐదు దశాబ్దాల పాటు ఎటువంటి చట్టబద్ధత లేకుండానే ఆ భూముల్లో క్రయవిక్రయాలు జరిగాయని, ఆ తర్వాత 2015-16లో ఈ భూములను రిజిస్ట్రేషన్ చట్టంలోని సెక్షన్ 22A కింద చేర్చడంతో రిజిస్ట్రేషన్లు పూర్తిగా నిలిచిపోయాయని ఆయన సమస్య తీవ్రతను విశ్లేషించారు.

ఈ సమస్యకు శాశ్వత పరిష్కారం చూపేందుకు జూలై 2024 నుంచి ప్రభుత్వం పలు దఫాలుగా చర్చలు జరిపి చారిత్రాత్మక నిర్ణయాలు తీసుకుందని కలెక్టర్ వెంకటేశ్వర్ వెల్లడించారు. ల్యాండ్ పూలింగ్ విధానంలో భాగంగా మొత్తం భూమిలో సుమారు 223.63 ఎకరాలను లబ్ధిదారులకు కేటాయించి, 65 ఎకరాలను మౌలిక సదుపాయాల అభివృద్ధి కోసం తిరుపతి పట్టణాభివృద్ధి సంస్థ (తుడా – TUDA) కు అప్పగించామన్నారు. అలాగే పర్యాటక శాఖ కోసం 90 ఎకరాల భూమిని ప్రత్యేకంగా కేటాయించినట్లు తెలిపారు. అర్హులైన 823 మందికి కనీసం 2 సెంట్ల స్థలం వచ్చేలా మొత్తం 2,111 ప్లాట్లను లేఅవుట్‌లో రూపొందించామని ఆయన వివరించారు.

ఎవరికీ ఎలాంటి అన్యాయం జరగకుండా, పూర్తి పారదర్శకతతో ప్లాట్లను కేటాయించడానికి ‘ఈకాం’ (AECOM), ‘ఎంట్రో ల్యాబ్స్’ సహకారంతో ‘ఈ-డిప్’ (ఎలక్ట్రానిక్ లాటరీ) విధానాన్ని తీసుకొచ్చామని కలెక్టర్ సభకు తెలిపారు. జనవరి 15, 2026న ముఖ్యమంత్రి వర్యులు స్వయంగా ఈ ఆన్‌లైన్ విధానాన్ని ప్రారంభించారని గుర్తుచేశారు. ఈ ప్లాట్లకు సంబంధించి లబ్ధిదారులు చెల్లించాల్సిన రిజిస్ట్రేషన్ ఫీజు, స్టాంపు డ్యూటీని కూడా ప్రభుత్వమే పూర్తిగా మాఫీ చేసిందని పంచుకున్నారు.

ఈ బృహత్తర ప్రాజెక్టును వేగంగా పూర్తి చేసేందుకు అధికారులు పడుతున్న శ్రమను కలెక్టర్ ప్రత్యేకంగా ప్రస్తావించారు. ‘తుడా’ ఆధ్వర్యంలో మూడు ప్రత్యేక బృందాలను ఏర్పాటు చేసి, తిరుపతి అర్బన్, రూరల్, రేణిగుంట సబ్ రిజిస్ట్రార్ కార్యాలయాల్లో ఉదయం 7:30 నుంచి 10:30 వరకు, తిరిగి సాయంత్రం 6:00 నుంచి 9:00 గంటల వరకు ప్రత్యేక వేళల్లో రిజిస్ట్రేషన్లు చేస్తున్నామన్నారు. రోజూ సగటున 200 ప్లాట్ల చొప్పున ఇప్పటికే 1,302 ప్లాట్ల రిజిస్ట్రేషన్లు విజయవంతంగా పూర్తయ్యాయని ఆయన సగర్వంగా చెప్పారు.

మౌలిక సదుపాయాల అభివృద్ధి విషయానికొస్తే, ‘తుడా’కు ఇచ్చిన 65 ఎకరాల ద్వారా సమకూరే సుమారు 250 కోట్ల రూపాయల నిధులతో ఈ టౌన్‌షిప్‌లో అద్భుతమైన వసతులు కల్పిస్తున్నామన్నారు. విశాలమైన సీసీ రోడ్లు, అండర్‌గ్రౌండ్ డ్రైనేజీ, మురుగునీటి శుద్ధి కేంద్రం (STP), తాగునీటి సరఫరా, విద్యుత్ సబ్‌స్టేషన్, మరియు గోవింద ధామం లాంటి సదుపాయాలతో పాటు 100 అడుగుల రోడ్డు అనుసంధానం కల్పిస్తున్నట్లు కలెక్టర్ వివరించారు.

ఈ ‘శెట్టిపల్లి మోడల్ టౌన్‌షిప్’ ద్వారా ప్రజల కల నెరవేరడమే కాకుండా, లబ్ధిదారులకు సుమారు 1100 కోట్ల రూపాయల విలువైన ఆస్తులు సమకూరాయని కలెక్టర్ స్పష్టం చేశారు. రిజిస్ట్రేషన్ ఫీజుల మాఫీ ద్వారా ప్రజలకు 16.25 కోట్ల రూపాయల మేర లబ్ధి చేకూరిందని, అలాగే పర్యాటక శాఖకు ఇచ్చిన 90 ఎకరాల వల్ల ప్రభుత్వానికి 400 కోట్ల రూపాయల విలువైన ఆస్తి దక్కిందని ఆయన గణాంకాలతో వివరించారు.

దశాబ్దాలుగా ఉన్న సమస్యను పరిష్కరించడానికి రెవెన్యూ, రిజిస్ట్రేషన్, సర్వే మరియు మున్సిపల్ శాఖలు ఒకే తాటిపైకి వచ్చి అద్భుతమైన సమన్వయంతో పనిచేశాయని ఆయన కొనియాడారు. సరైన ప్రణాళిక, మౌలిక సదుపాయాల కల్పనపై భరోసా ఇస్తే ప్రజలు భూసమీకరణకు ఎంత స్వచ్ఛందంగా ముందుకు వస్తారో ఈ ప్రాజెక్టు నిరూపించిందని ఆయన అన్నారు. రాష్ట్రవ్యాప్తంగా ఇలాంటి వివాదాల్లో ఉన్న ఇతర భూసమస్యల పరిష్కారానికి ఈ శెట్టిపల్లి ప్రాజెక్టు ఒక అత్యుత్తమ ఆదర్శ నమూనాగా (Proof of Concept) నిలుస్తుందని వివరిస్తూ డాక్టర్