అక్రమ మద్యం, బెల్ట్ షాపులపై కఠిన చర్యలు

-పారదర్శకత కోసం సురక్షా యాప్ స్కానింగ్ తప్పనిసరి
-అధికారులను హెచ్చరించిన ప్రొహిబిషన్, ఎక్సైజ్ కమిషనర్ చామకూరి శ్రీధర్

ఏలూరు/రాజమండ్రి,  నేటి పత్రిక ప్రజావార్త :
అక్రమ మద్యం నియంత్రణ, పారదర్శకత పెంపుపై ప్రొహిబిషన్ & ఎక్సైజ్ కమిషనర్ చామకూరి శ్రీధర్ దృష్టి సారించారు. ఏలూరు, రాజమండ్రి ప్రాంతాల పరిధిలోని జిల్లాలపై ఎస్‌హెచ్‌ఓల వారీగా గురు వారం సమీక్ష సమావేశం నిర్వహించారు. ఈ సమీక్షలో ఏలూరు, భీమవరం, కాకినాడ, కొనసీమ, తూర్పు గోదావరి జిల్లాల పనితీరును పరిశీలిస్తూ అక్రమ మద్యం నియంత్రణ, డిజిటల్ మానిటరింగ్, ఆదాయ సేకరణ అంశాలపై ప్రత్యేకంగా దృష్టి పెట్టారు.

సాధారణ జిల్లా స్థాయి సమీక్షలకు భిన్నంగా ప్రతి స్టేషన్ హౌస్ ఆఫీసర్ పనితీరును వ్యక్తిగతంగా సమీక్షించారు. వారి పరిధిలో అక్రమంగా తయారు చేసే మద్యం, బెల్ట్ షాపుల పరిస్థితి, తీసుకున్న చర్యలను అడిగి తెలుసుకున్నారు. స్టేషన్‌లలో సిబ్బంది అందుబాటు, వారి వినియోగం, దాడులు, పర్యవేక్షణ చర్యలపై కూడా సమగ్రంగా సమీక్షించారు.

చర్యల్లో కఠినత్వం అవసరమని పేర్కొంటూ, పునరావృత నేరస్తులపై కేసులు నమోదు చేయడం, చర్యలు తీసుకోవడంలో నిర్లక్ష్యం వహిస్తే తీవ్రంగా పరిగణిస్తామని హెచ్చరించారు. సమీక్షలో ముఖ్యంగా సురక్షా యాప్ అమలుపై దృష్టి పెట్టారు. ప్రతి స్టేషన్ పరిధిలో 100 శాతం స్కానింగ్ జరగాలని ఎస్‌హెచ్‌ఓలకు ఆదేశించారు. డిపో నుంచి వినియోగదారుడి వరకు మద్యం సరఫరా పూర్తిగా ట్రాక్ చేయడానికి ఈ యాప్ ఉపయోగపడుతుందని చెప్పారు. షాపులు, బార్లలో స్టాక్ లిఫ్టింగ్, అమ్మకాల మధ్య తేడాలు ఉంటే వాటిని కచ్చితంగా గుర్తించి అక్రమ మద్యం రవాణాను అరికట్టాలని సూచించారు. స్వయంగా కమీషనర్ సురక్ష యాప్ లో మద్యం సీసాలను స్కానింగ్ ద్వారా తనిఖీ చేశారు.

లైసెన్స్ పొందిన షాపులు, బార్లపై తరచూ ఆకస్మిక తనిఖీలు నిర్వహించాలని అధికారులకు ఆదేశించారు. సమయపాలన, సామర్థ్య నిబంధనలు పాటిస్తున్నారో లేదో పరిశీలించాలని, అలాగే నాణ్యతను నిర్ధారించేందుకు మద్యం నమూనాల సేకరణను పెంచాలని సూచించారు.

గత సంవత్సరం పనితీరుతో పోల్చి చూస్తూ, అక్రమ వ్యాపారాన్ని అణచివేస్తేనే ప్రభుత్వ ఆదాయం పెరుగుతుందని కమిషనర్ తెలిపారు. విభిన్న చర్యలు, ఆదాయ సేకరణ మధ్య సమతుల్యత అవసరమని పేర్కొన్నారు.

సమీక్షలో భాగంగా ఏలూరులోని అజయ్ వైన్ షాపును సందర్శించిన కమిషనర్, సురక్షా యాప్ ద్వారా స్టాక్‌ను స్వయంగా స్కాన్ చేసి పరిశీలించారు. నకిలీ మద్యం విక్రయాలను పూర్తిగా అరికట్టేందుకు యాదృచ్ఛికంగా బాటిళ్లను తనిఖీ చేయాలని అధికారులకు సూచించారు.

ఈ సమావేశంలో ఏలూరు డీసీ శ్రీలత, ఏసీ ప్రభుకుమార్, డీపీఈఓ అవులయ్య, డీపీఈఓ పశ్చిమ గోదావరి సుబ్బారావు పాల్గొన్నారు. రాజమండ్రిలో జరిగిన సమావేశంలో కాకినాడ డీసీ చైతన్య మురళి, రాజమండ్రి డీపీఈఓ శ్రీలత, కొనసీమ డీపీఈఓ కుమరేశన్ తదితరులు హాజరయ్యారు.

సమావేశం ముగింపులో, తమ పరిధిలో అక్రమ కార్యకలాపాలను నియంత్రించడంలో విఫలమయ్యే ఎస్‌హెచ్‌ఓలపై శాఖాపరమైన కఠిన చర్యలు తీసుకుంటామని కమిషనర్ స్పష్టం చేశారు.