సంత్ రవిదాస్ కలశ యాత్రతో సామాజిక ఏకత్వానికి పిలుపు

-కుల, మత భేదాలను వీడి సమానత్వం వైపు సాగాలి: పీవీఎన్ మాధవ్
-వారణాసి నుంచి వచ్చిన పవిత్ర కలశాలకు విజయవాడలో ఘన స్వాగతం

విజయవాడ, నేటి పత్రిక ప్రజావార్త :
కుల, మత భేదాలను అధిగమించి సమాజంలో సోదరభావం, సమానత్వం, ఏకత్వాన్ని బలోపేతం చేయడమే సంత్ రవిదాస్ కలశ యాత్ర ప్రధాన ఉద్దేశమని బీజేపీ ఆంధ్రప్రదేశ్ రాష్ట్ర అధ్యక్షుడు పీవీఎన్ మాధవ్ అన్నారు. సంత్ రవిదాస్ 650వ జయంతి ఉత్సవాల్లో భాగంగా వారణాసి నుంచి తీసుకొచ్చిన పవిత్ర కలశాలతో విజయవాడలో నిర్వహించిన కలశ యాత్ర అనంతరం బీజేపీ రాష్ట్ర కార్యాలయంలో జరిగిన సభలో ఆయన ముఖ్య ప్రసంగం చేశారు.

కాశీ విశ్వేశ్వర క్షేత్రం నుంచి తీసుకొచ్చిన పవిత్ర కలశాలను రాష్ట్రంలోని వివిధ ప్రాంతాల్లో ఊరేగిస్తూ సంత్ రవిదాస్ మహరాజ్ సందేశాన్ని ప్రజల్లోకి తీసుకెళ్తున్నామని మాధవ్ తెలిపారు. సమాజంలోని ప్రతి వర్గం ఒక్కటిగా నిలవాలన్నదే ఈ యాత్ర లక్ష్యమని చెప్పారు.

వివక్షకు వ్యతిరేకంగా సంత్ రవిదాస్ బోధనలు

14వ శతాబ్దంలో సామాజిక వివక్ష, అంటరానితనం తీవ్రంగా ఉన్న సమయంలో సంత్ రవిదాస్ తన భక్తి, జ్ఞానం, ఆధ్యాత్మిక బోధనలతో సమాజ మార్పుకు కృషి చేశారని మాధవ్ పేర్కొన్నారు. భగవంతుడు ఏ కులానికో, మతానికో పరిమితం కాదని, ప్రతి మనిషిలోనూ దైవత్వాన్ని చూడాలని ఆయన బోధించారని తెలిపారు.

సంత్ రవిదాస్ రచనలు గురు గ్రంథ్ సాహిబ్‌లో స్థానం పొందడం ఆయన ఆధ్యాత్మిక ప్రభావానికి నిదర్శనమని అన్నారు. ఆయన బోధనలు నేటికీ సమాజానికి మార్గదర్శకమని చెప్పారు.

శ్రమకు గౌరవమే ఆయన సందేశం

ఏ వృత్తీ తక్కువ కాదని, నిజాయితీగా చేసే ప్రతి పని భగవంతుని సేవేనని సంత్ రవిదాస్ తన జీవితంతో చాటిచెప్పారని మాధవ్ తెలిపారు. కష్టపడి పనిచేసే ప్రతి వ్యక్తిని గౌరవించాలన్న సందేశం నేటి సమాజానికి అత్యంత అవసరమని అన్నారు.

భారతీయ ఆధ్యాత్మిక సంప్రదాయంలోని ఏకత్వ భావన, సామాజిక సమానత్వ సందేశం సమాజాన్ని ఏకం చేసే విలువలను ప్రతిబింబిస్తాయని పేర్కొన్నారు. కుల భేదాలను అధిగమించి మనిషిని మనిషిగా గౌరవించడమే భారతీయ సంస్కృతి గొప్పతనమని చెప్పారు.

రాష్ట్రవ్యాప్తంగా కలశ యాత్ర

బీజేపీ ఎస్సీ మోర్చా రాష్ట్ర అధ్యక్షుడు పనతల సురేష్ మాట్లాడుతూ సంత్ రవిదాస్ జన్మస్థలమైన వారణాసిలో భారీ కార్యక్రమం నిర్వహించి అక్కడి నుంచి పవిత్ర కలశాలను తీసుకొచ్చామని తెలిపారు. విజయవాడలో వాటికి ఘన స్వాగతం లభించిందన్నారు.

ఏలూరు రోడ్డులోని రామమందిరం నుంచి పాదయాత్రగా కలశాలను బీజేపీ రాష్ట్ర కార్యాలయానికి తీసుకువచ్చి సభ నిర్వహించినట్లు చెప్పారు. సంత్ రవిదాస్ జయంతి ఉత్సవాలను ప్రధానమంత్రి నరేంద్ర మోదీ ప్రారంభించారని తెలిపారు.

బీజేపీ రాష్ట్ర ప్రధాన కార్యదర్శి సాలిగ్రామ లక్ష్మీ ప్రసన్న మాట్లాడుతూ పవిత్ర కలశాలను రాష్ట్రవ్యాప్తంగా అన్ని మండలాలకు తీసుకెళ్లి సంత్ రవిదాస్ సందేశాన్ని విస్తృతంగా ప్రజల్లోకి తీసుకెళ్తామని తెలిపారు.

కీర్తనలతో సామాజిక మార్పు

ముఖ్య అతిథి శివస్వామి మాట్లాడుతూ 650 ఏళ్ల క్రితం జన్మించిన సంత్ రవిదాస్ మహరాజ్ భగవంతుని తత్వాన్ని కీర్తనల ద్వారా సమాజానికి అందించారని తెలిపారు. ఆయన కీర్తనలు సామాజిక మార్పులకు దోహదపడ్డాయని, నేటి తరానికి స్ఫూర్తిదాయకమని అన్నారు.

ఏక్ భారత్–శ్రేష్ఠ భారత్ స్ఫూర్తి

సంత్ రవిదాస్ 650వ జయంతి ఉత్సవాలు దేశవ్యాప్తంగా సామాజిక సమైక్యత, సోదరభావం, సమానత్వాన్ని బలోపేతం చేసే కార్యక్రమాలుగా నిలుస్తున్నాయని నాయకులు పేర్కొన్నారు. ‘ఏక్ భారత్–శ్రేష్ఠ భారత్’ స్ఫూర్తితో కుల, మత భేదాలకు అతీతంగా ఐక్యంగా ముందుకు సాగాలని పిలుపునిచ్చారు.

సంత్ రవిదాస్ చూపిన మార్గంలో నడుస్తూ సమానత్వం, సామాజిక న్యాయం, పరస్పర గౌరవంతో కూడిన సమాజ నిర్మాణానికి ప్రతి ఒక్కరూ భాగస్వాములు కావాలని వారు కోరారు. ఈ కార్యక్రమంలో 20సూత్రాల అమలు కమిటీ చైర్మన్ లంకా దినకర్, బిజెపి రాష్ట్ర మీడియా ఇంఛార్జి కిలారి దిలీప్, రాష్ట్ర ప్రొటోకాల్ ఇంఛార్జి పాతూరి నాగభూషణం, ఎన్టీఆర్ జిల్లా అధ్యక్షుడు అడ్డూరి శ్రీ రాం, రాష్ట్ర అధికార ప్రతినిధి దర్శనపు శ్రీ నివాస్
తదితరులు వేదిక ను అలంకరించారు