వ్యవసాయాభివృద్ధికి శాస్త్రీయ పరిశోధనలు, సహజ వ్యవసాయమే భవిష్యత్‌కు మార్గం

-రాష్ట్ర గవర్నర్ ఎస్. అబ్దుల్ నజీర్

బాపట్ల, నేటి పత్రిక ప్రజావార్త :
వ్యవసాయ రంగం ఎదుర్కొంటున్న వాతావరణ మార్పులు, సహజ వనరుల క్షీణత వంటి సవాళ్లను అధిగమించేందుకు శాస్త్రీయ పరిశోధనలు, సుస్థిర వ్యవసాయ విధానాలు, సహజ వ్యవసాయం అత్యంత అవసరమని ఆంధ్రప్రదేశ్ గవర్నర్ ఎస్. అబ్దుల్ నజీర్ పేర్కొన్నారు.

శనివారం బాపట్లలోని ఆచార్య ఎన్.జి. రంగా వ్యవసాయ విశ్వవిద్యాలయం (ANGRAU) 58వ వార్షిక స్నాతకోత్సవానికి అధ్యక్షత వహించిన గవర్నర్, పట్టభద్రులను ఉద్దేశించి ప్రసంగించారు.
ఈ సందర్భంగా గవర్నర్ మాట్లాడుతూ, గత ఆరు దశాబ్దాలుగా ఆచార్య ఎన్.జి. రంగా వ్యవసాయ విశ్వవిద్యాలయం వ్యవసాయ విద్య, పరిశోధనలు, విస్తరణ సేవల ద్వారా రైతు సమాజానికి, దేశ వ్యవసాయాభివృద్ధికి విశేష సేవలు అందిస్తోందని కొనియాడారు. ఈ స్నాతకోత్సవం విద్యార్థుల కృషి, పట్టుదల, అంకితభావానికి నిదర్శనమని, వారి విజయాల్లో తల్లిదండ్రులు, అధ్యాపకులు, శాస్త్రవేత్తల పాత్ర కూడా అమూల్యమని పేర్కొన్నారు.
ప్రధాన అతిథిగా విచ్చేసిన ఐసీఏఆర్–ఇండియన్ అగ్రికల్చరల్ రీసెర్చ్ ఇన్‌స్టిట్యూట్ డైరెక్టర్, ANGRAU పూర్వ విద్యార్థి డా. చి. శ్రీనివాసరావును గవర్నర్ ప్రత్యేకంగా అభినందించారు. సహజ వనరుల నిర్వహణ, సుస్థిర వ్యవసాయం, వాతావరణ మార్పులకు అనుగుణమైన వ్యవసాయ విధానాల అభివృద్ధిలో ఆయన చేసిన కృషి దేశానికి మార్గదర్శకమని కొనియాడారు.
పత్తి సాగు అభివృద్ధికి విశేష సేవలు అందించిన పదవీ విరమణ పొందిన పత్తి శాస్త్రవేత్త శ్రీ కె. రవీంద్రనాథ్‌కు విశ్వవిద్యాలయం గౌరవ డాక్టరేట్ (హానోరిస్ కాజా) ప్రదానం చేయడం అభినందనీయమని పేర్కొన్నారు.
వ్యవసాయం కేవలం ఆర్థిక కార్యకలాపం మాత్రమే కాదని, దేశ సంస్కృతి, ఆహార భద్రత, సమాజ శ్రేయస్సుకు పునాదిగా నిలుస్తుందని గవర్నర్ అన్నారు. రైతు నాటే ప్రతి విత్తనం ఆశకు ప్రతీక అని, ప్రకృతితో సమన్వయంగా రైతు చేసే శ్రమే దేశాన్ని పోషిస్తోందని పేర్కొన్నారు.
ప్రస్తుతం వ్యవసాయ రంగం ఆలస్యమైన రుతుపవనాలు, వర్షాభావం, అతివృష్టి, వాతావరణ మార్పులు, భూగర్భ జలాల క్షీణత, నేల సార నష్టం వంటి ఎన్నో సవాళ్లను ఎదుర్కొంటోందన్నారు. ఇలాంటి పరిస్థితుల్లో నేల ఆరోగ్యం, నీటి వినియోగ సామర్థ్యం, సహజ వనరుల పరిరక్షణకు ప్రాధాన్యతనిస్తూ సుస్థిర వ్యవసాయాన్ని ప్రోత్సహించాల్సిన అవసరం ఉందన్నారు.
ఎల్ నినో ప్రభావంతో దేశంలో రుతుపవనాల బలహీనత, కరువు పరిస్థితులు ఏర్పడే అవకాశాల నేపథ్యంలో వ్యవసాయ విశ్వవిద్యాలయాలు వాతావరణ మార్పులను నిరంతరం పర్యవేక్షించి, ప్రభుత్వానికి తగిన సూచనలు చేయడంతో పాటు రైతులకు శాస్త్రీయ సలహాలు అందించాలని సూచించారు. ముఖ్యంగా కరువును తట్టుకునే పంటలు, భూగర్భ జలాల సమర్థ వినియోగంపై రైతులకు అవగాహన కల్పించాల్సిన అవసరం ఉందన్నారు.
ఆంధ్రప్రదేశ్ కమ్యూనిటీ మేనేజ్డ్ నేచురల్ ఫార్మింగ్ (APCNF) కార్యక్రమం ద్వారా రాష్ట్రం సహజ వ్యవసాయంలో ప్రపంచానికి ఆదర్శంగా నిలిచిందని గవర్నర్ పేర్కొన్నారు. ఈ కార్యక్రమం ద్వారా లక్షలాది మంది రైతులు తక్కువ పెట్టుబడితో అధిక ఆదాయం పొందుతున్నారని, నేల ఆరోగ్యం మెరుగుపడటంతో పాటు నీటి వినియోగం గణనీయంగా తగ్గుతోందని తెలిపారు. 2047 నాటికి రాష్ట్రాన్ని 100 శాతం సహజ వ్యవసాయ రాష్ట్రంగా తీర్చిదిద్దాలన్న ప్రభుత్వ లక్ష్యాన్ని ఆయన అభినందించారు.
ANGRAU జాతీయ విద్యా విధానం–2020 అమలులో ముందంజలో నిలిచిందని, మెరుగైన పంట రకాల అభివృద్ధి, నాణ్యమైన విత్తనాల ఉత్పత్తి, రైతులకు శాస్త్రీయ సేవలందించడంలో విశేష కృషి చేస్తోందని గవర్నర్ ప్రశంసించారు.
పట్టభద్రులను ఉద్దేశించి మాట్లాడుతూ, విద్య అనేది జ్ఞానంతో పాటు బాధ్యతను కూడా అందిస్తుందని అన్నారు. రైతుల సమస్యలను అర్థం చేసుకుని, వారి అవసరాలకు అనుగుణంగా పరిశోధనలు చేయాలని సూచించారు. భారత మాజీ రాష్ట్రపతి డాక్టర్ ఏ.పి.జె. అబ్దుల్ కలాం చెప్పిన “విజయం శాశ్వతం కాదు, అపజయం అంతిమం కాదు. విజయం తర్వాత కృషిని ఆపవద్దు, అపజయం తర్వాత ప్రయత్నాన్ని మానవద్దు” అనే సందేశాన్ని గుర్తుచేస్తూ, పట్టభద్రులు నిరంతరం శ్రమించి సమాజానికి సేవ చేయాలని పిలుపునిచ్చారు.
అలాగే, భారతరత్న డాక్టర్ ఎం.ఎస్. స్వామినాథన్ చెప్పిన “వ్యవసాయం కేవలం ఒక వృత్తి కాదు, అది ఒక జీవన విధానం” అనే సందేశాన్ని గుర్తుచేస్తూ, రైతు సంక్షేమం, గ్రామీణాభివృద్ధి, సుస్థిర వ్యవసాయం దిశగా తమ జ్ఞానాన్ని వినియోగించాలని యువతకు సూచించారు.

ఈ స్నాతకోత్సవ కార్యక్రమంలో 50 మందికి డాక్టరేట్ పండితులు, 240 మంది పీజీ విద్యార్థులు, 1385 మంది గ్రాడ్యుయేట్లతోపాటు పథకాలు ప్రతిభ ధృవీకరణ పత్రాలు అందజేసినట్లు ఆయన తెలిపారు. ఇది పట్టదలకు లభించి విజయం అని ఆయన అన్నారు. ఈ శుభ సందర్భంగా విద్యార్థుల విజయానికి, తల్లిదండ్రుల త్యాగానికి, ఉపకులపతి అధ్యాపకులు శాస్త్రవేత్తలు అధికారులు సిబ్బందిని ప్రత్యేకంగా ఆంధ్రప్రదేశ్ రాష్ట్ర గవర్నర్ మరియు ఏ ఎన్ జి ఆర్ ఏ యూ చాన్సులర్ ఎస్ అబ్దుల్ అభినందించారు.

ఈ కార్యక్రమంలో పత్తి పెంపక దారుడు ( రిటైర్డ్) కె. రవీంద్రనాథ్ కు విశ్వవిద్యాలయం గౌరవ డాక్టరేట్ ప్రధానం చేయడం అదియును వారి చేతుల మీదుగా అందజేయడం చాలా ఆనందంగా ఉందని ఆంధ్రప్రదేశ్ రాష్ట్ర గవర్నర్ మరియు ఏ ఎన్ జి ఆర్ ఏ యూ చాన్సులర్ ఎస్ అబ్దుల్ అన్నారు.

ఈ కార్యక్రమంలో డాక్టర్ సిహెచ్ శ్రీనివాసరావు, ఐ సి ఏ ఆర్ భారతీయ వ్యవసాయ పరిశోధన కేంద్రం సంచాలకులు, కళాశాల వైస్ చాన్సులర్ డాక్టర్ పి వి సత్యనారాయణ, కళాశాల ప్రధానోపాధ్యాయులు ప్రసన్న రాణి, జిల్లా కలెక్టర్ డాక్టర్ వినోద్ కుమార్ వి, బాపట్ల శాసనసభ్యులు వేగేసిన నరేంద్ర వర్మ రాజు,జిల్లా ఎస్పీ ఉమామహేశ్వరరావు, కళాశాల అధ్యాపకులు, విద్యార్థులు, ఇతర అధికారులు మరియు తదితరులు పాల్గొన్నారు.