Prajavartha Online Telugu News
-ముందస్తు గుర్తింపు, ఆధునిక చికిత్సలతో మెరుగైన ఫలితాలు
విజయవాడ, నేటి పత్రిక ప్రజావార్త :
రొమ్ము క్యాన్సర్ చికిత్సలో హెచ్‌సీజీ క్యూరీ సిటీ క్యాన్సర్ సెంటర్ విజయవాడ కీలక మైలురాయిని సాధించింది. ఇప్పటివరకు 12 వేలకుపైగా రొమ్ము క్యాన్సర్ శస్త్రచికిత్సలను విజయవంతంగా పూర్తి చేసినట్లు సంస్థ ప్రకటించింది. ప్రముఖ శస్త్ర చికిత్సా క్యాన్సర్ నిపుణుడు, ప్రాంతీయ డైరెక్టర్ డాక్టర్ ఎం. గోపీచంద్ నాయకత్వంలో ఈ విజయాన్ని సాధించినట్లు వెల్లడించింది.
రొమ్ము క్యాన్సర్ చికిత్సలో భాగంగా రొమ్మును పూర్తిగా తొలగించాల్సిన అవసరాన్ని తగ్గించే అవయవ సంరక్షణ శస్త్రచికిత్సలు, అధునాతన పునర్నిర్మాణ పద్ధతులు, శోషరస గ్రంథుల పరిశీలన వంటి ఆధునిక విధానాలకు ప్రాధాన్యతనిస్తున్నట్లు తెలిపింది. వీటి ద్వారా క్యాన్సర్ చికిత్సతో పాటు రోగుల జీవన నాణ్యతను మెరుగుపరచడంపై దృష్టి సారిస్తున్నట్లు పేర్కొంది.
ఈ సందర్భంగా శుక్రవారం, బందర్ రోడ్ లోని ఓ హోటల్లో అక్టోబర్లో జరుపుకునే రొమ్ము క్యాన్సర్ అవగాహన కార్యక్రమంలో హెచ్‌సీజీ సీనియర్ వైస్ ప్రెసిడెంట్, ప్రాంతీయ వ్యాపార విభాగాధిపతి డాక్టర్ రూపాలి బసు మాట్లాడుతూ, విజయవాడలోనే అత్యాధునిక క్యాన్సర్ చికిత్సలను అందుబాటులోకి తీసుకురావడం తమ లక్ష్యమన్నారు. డాక్టర్ ఎం. గోపీచంద్ మాట్లాడుతూ, 12 వేల శస్త్రచికిత్సలు వేలాది కుటుంబాలకు ఆశను కల్పించాయని, రొమ్ము క్యాన్సర్‌ను తొలిదశలో గుర్తించి సరైన చికిత్స అందిస్తే మెరుగైన ఫలితాలు సాధించవచ్చని తెలిపారు. కన్సల్టెంట్ శస్త్ర చికిత్సా క్యాన్సర్ నిపుణుడు డాక్టర్ ఎం. ప్రవీణ్ రాయల్ మాట్లాడుతూ, ఆధునిక శస్త్రచికిత్సా పద్ధతులతో రోగుల ఆత్మవిశ్వాసాన్ని, జీవన నాణ్యతను కాపాడేందుకు కృషి చేస్తున్నట్లు వివరించారు.
రొమ్ము క్యాన్సర్ అవగాహన మాసం సందర్భంగా అక్టోబరు నెలంతా మహిళలకు రాయితీతో కూడిన రొమ్ము క్యాన్సర్ పరీక్షలు, వైద్య సంప్రదింపుల వోచర్లను అందిస్తున్నట్లు ఆసుపత్రి ప్రకటించింది. వైద్యుల పరీక్షతో పాటు అవసరాన్ని బట్టి మామోగ్రామ్ లేదా రొమ్ము అల్ట్రాసౌండ్ పరీక్షలను రాయితీ ధరలకు పొందవచ్చని తెలిపింది. ముందస్తు నమోదు, అపాయింట్‌మెంట్ తప్పనిసరని పేర్కొంది. ఈ కార్యక్రమంలో యూనిట్ హెడ్ టి.యువకిశోర్ సిబ్బంది తదితరులు పాల్గొన్నారు.
