ధర్మవరం అభివృద్ధికి రూ.242.28 కోట్ల మహా ప్రణాళిక

-27 కి.మీ. మేర కొత్త రహదారులు.. తాగునీరు, డ్రైనేజీ, పారిశుద్ధ్యానికి పెద్దపీట
-హెచ్‌ఏఎం కింద రూ.43 కోట్లు.. అమృత్‌ పథకాలతో తాగునీటి వ్యవస్థకు మరింత బలోపేతం
-రూ.104.28 కోట్ల పనులు పురోగతిలో.. మరో రూ.95 కోట్ల పనులు అనుమతుల దశలో
-కుప్పం నుంచి రాష్ట్రవ్యాప్తంగా హెచ్‌ఏఎం పనులకు సీఎం చంద్రబాబు శ్రీకారం.. మంత్రి సత్యకుమార్‌ యాదవ్‌ వెల్లడి

అమరావతి, నేటి పత్రిక ప్రజావార్త :
ధర్మవరం పట్టణ సమగ్ర అభివృద్ధికి వివిధ పథకాల కింద మొత్తం రూ.242.28 కోట్ల మేర అభివృద్ధి పనులు చేపడుతున్నామని రాష్ట్ర వైద్య, ఆరోగ్య, కుటుంబ సంక్షేమ, వైద్య విద్య శాఖామాత్యులు, ధర్మవరం ఎమ్మెల్యే శ్రీ సత్యకుమార్‌ యాదవ్‌ తెలిపారు. రహదారులు, డ్రైనేజీ, తాగునీరు, పారిశుద్ధ్యం, పార్కులు, వీధి దీపాలు తదితర మౌలిక వసతులను మెరుగుపరిచి పట్టణ ప్రజలకు మెరుగైన సౌకర్యాలు కల్పించడమే లక్ష్యంగా పనులు కొనసాగుతున్నాయని ఆయన పేర్కొన్నారు.

రాష్ట్రవ్యాప్తంగా పట్టణ మౌలిక వసతుల అభివృద్ధికి ముఖ్యమంత్రి నారా చంద్రబాబు నాయుడు మంగళవారం కుప్పం నుంచి హైబ్రిడ్‌ యాన్యుటీ మోడల్‌ (హెచ్‌ఏఎం) పనులకు శ్రీకారం చుట్టారని మంత్రి తెలిపారు. ఇందులో భాగంగా ధర్మవరం పట్టణానికి హెచ్‌ఏఎం కింద రూ.43 కోట్ల విలువైన పనులు కేటాయించామని చెప్పారు. రోడ్లు, డివైడర్లు, పార్కులు, వీధి దీపాల అభివృద్ధితో పాటు పట్టణ మౌలిక వసతులను మెరుగుపరిచేందుకు ఈ నిధులను వినియోగించనున్నట్లు వెల్లడించారు.

ధర్మవరం పట్టణంలో ప్రస్తుతం రూ.104.28 కోట్ల విలువైన పనులు పురోగతిలో ఉన్నాయని, హెచ్‌ఏఎం కింద రూ.43 కోట్ల పనులు టెండర్‌ దశలో ఉన్నాయని మంత్రి తెలిపారు. యూఐడీఎఫ్‌–IV కింద రూ.72 కోట్లు, యూసీఎఫ్‌ ఫేజ్‌–II కింద రూ.23 కోట్ల పనులు పరిపాలనా అనుమతుల దశలో ఉన్నాయని వివరించారు.

హెచ్‌ఏఎం కింద ధర్మవరానికి రూ.43 కోట్ల పనులు

ధర్మవరం పురపాలక సంఘానికి హెచ్‌ఏఎం కింద రూ.43 కోట్ల విలువైన పనులు కేటాయించామని మంత్రి సత్యకుమార్‌ యాదవ్‌ తెలిపారు. ఈ నిధులతో రోడ్లు, డివైడర్లు, పార్కులు, వీధి దీపాల అభివృద్ధి పనులు చేపట్టనున్నట్లు చెప్పారు. ప్రస్తుతం ఈ పనులు టెండర్‌ దశలో ఉన్నాయని వెల్లడించారు.

27 కి.మీ. రోడ్లకు రూ.43 కోట్లు

అర్బన్‌ ఇన్ఫ్రాస్ట్రక్చర్‌ పథకం కింద ధర్మవరం పట్టణ అభివృద్ధికి రూ.43 కోట్ల నిధులు మంజూరయ్యాయని మంత్రి తెలిపారు. ఇందులో సుమారు 25 కిలోమీటర్ల మేర సీసీ రోడ్లు, 2 కిలోమీటర్ల మేర బీటీ రోడ్ల నిర్మాణ పనులు ఉన్నాయని చెప్పారు. మొత్తం 27 కిలోమీటర్ల మేర రహదారులను అభివృద్ధి చేయనున్నట్లు వెల్లడించారు.

బీపీఎస్‌, ఎల్‌ఆర్‌ఎస్‌ నిధులతో 13 పనులు పూర్తి

బీపీఎస్‌, ఎల్‌ఆర్‌ఎస్‌ నిధులతో ధర్మవరం పట్టణంలో 13 అభివృద్ధి పనులను రూ.390 లక్షలు అంటే రూ.3.90 కోట్ల వ్యయంతో పూర్తి చేశామని మంత్రి తెలిపారు.

15వ ఆర్థిక సంఘం నిధులతో 17 పనులు పూర్తి

15వ ఆర్థిక సంఘం నిధుల కింద సీసీ కాలువలు, ఇతర మౌలిక వసతులకు సంబంధించిన 17 అభివృద్ధి పనులను రూ.419.73 లక్షలు అంటే రూ.4.19 కోట్లకు పైగా వ్యయంతో పూర్తి చేశామని మంత్రి తెలిపారు. 2024–25, 2025–26 సంవత్సరాలకు సంబంధించి మరో రూ.367.41 లక్షల విలువైన అభివృద్ధి పనులకు ప్రతిపాదనలు పంపినట్లు చెప్పారు.

తాగునీటి సరఫరా బలోపేతానికి రూ.2.54 కోట్లు

ఆహుడా, పురపాలక సంఘ సాధారణ నిధులతో ధర్మవరం పట్టణ తాగునీటి సరఫరా వ్యవస్థను మెరుగుపరిచేందుకు డీఐ కే9 పైప్‌లైన్‌ ఏర్పాటు పనులకు రూ.254.64 లక్షలు అంటే రూ.2.54 కోట్ల మేర నిధులతో టెండర్‌ ప్రక్రియ పూర్తి చేశామని మంత్రి తెలిపారు. భవిష్యత్‌ తాగునీటి అవసరాలను దృష్టిలో ఉంచుకుని సరఫరా వ్యవస్థను మరింత బలోపేతం చేస్తున్నామని చెప్పారు.

అమృత్‌ ఫేజ్‌–1 కింద రూ.17.57 కోట్ల పనులు.. 90 శాతం పూర్తి

అమృత్‌ ఫేజ్‌–1 కింద రూ.1,757 లక్షలు అంటే రూ.17.57 కోట్లు మంజూరు కాగా, ఇందిరమ్మ కాలనీ, సిద్ధయ్య గుట్ట ప్రాంతాల్లో ఎల్ఎస్‌ఆర్‌ల నిర్మాణం, యర్రగుంట ప్రాంతంలో కొత్త పంప్‌హౌస్‌ నిర్మాణం, మోటర్ల ఏర్పాటు వంటి పనులు చేపట్టామని మంత్రి తెలిపారు. ఈ పనుల్లో సుమారు 90 శాతం పూర్తయ్యాయని వెల్లడించారు.

అమృత్‌ ఫేజ్‌–2 కింద రూ.11.18 కోట్ల పనులు

అమృత్‌ ఫేజ్‌–2 కింద రూ.1,118 లక్షలు అంటే రూ.11.18 కోట్లు మంజూరయ్యాయని మంత్రి తెలిపారు. మారుతినగర్‌ ప్రాంతంలో కొత్త ఎల్ఎస్‌ఆర్‌, జోన్‌–2 పంపింగ్‌ మెయిన్‌, డెలివరీ లైన్ల నిర్మాణానికి అనుమతులు మంజూరయ్యాయని చెప్పారు. ఈ పనులు సుమారు 90 శాతం పూర్తయ్యాయని వెల్లడించారు.

అమృత్‌ 2.0 కింద రూ.31.73 కోట్ల సమగ్ర తాగునీటి ప్రాజెక్టు

అమృత్‌ 2.0 కింద రూ.3,173 లక్షలు అంటే రూ.31.73 కోట్ల విలువైన సమగ్ర తాగునీటి ప్రాజెక్టుకు అనుమతులు మంజూరయ్యాయని మంత్రి సత్యకుమార్‌ యాదవ్‌ తెలిపారు. ఇందులో రోజుకు 10 ఎంఎల్‌డీ సామర్థ్యం కలిగిన నీటి శుద్ధి కేంద్రం, రాంనగర్‌, గిర్రాజు కాలనీ, శాంతినగర్‌ ప్రాంతాల్లో ఎల్ఎస్‌ఆర్‌ల నిర్మాణం, అవసరమైన పైప్‌లైన్ల ఏర్పాటు వంటి పనులు ఉన్నాయని చెప్పారు.

ఈ ప్రాజెక్టు ద్వారా ధర్మవరం పట్టణ తాగునీటి సరఫరా వ్యవస్థ మరింత బలోపేతం కావడంతో పాటు భవిష్యత్‌ అవసరాలకు అనుగుణంగా నీటి సరఫరా మౌలిక వసతులు అభివృద్ధి చెందుతాయని మంత్రి పేర్కొన్నారు.

పురపాలక సంఘ సాధారణ నిధులతో 58 పనులు పూర్తి

పురపాలక సంఘ సాధారణ నిధులతో సీసీ రోడ్లు, కాలువలు, ఇతర మౌలిక వసతులకు సంబంధించి 58 అభివృద్ధి పనులు చేపట్టి రూ.222.73 లక్షలు అంటే రూ.2.23 కోట్లకు పైగా వ్యయంతో పూర్తి చేశామని మంత్రి తెలిపారు.

సద్భావన భవనానికి రూ.50 లక్షలు

ఎంపీ ల్యాడ్స్‌ నిధుల కింద ధర్మవరం పట్టణంలో సద్భావన భవనం నిర్మాణానికి రూ.50 లక్షలు మంజూరయ్యాయని మంత్రి వెల్లడించారు.

పారిశుద్ధ్య మౌలిక వసతులకు రూ.21.68 కోట్లు

ధర్మవరం పట్టణంలో ఘన, ద్రవ వ్యర్థాల నిర్వహణకు ప్రభుత్వం ప్రాధాన్యం ఇస్తోందని మంత్రి తెలిపారు. స్వచ్ఛ భారత్‌ మిషన్‌ 2.0 కింద రూ.21.68 కోట్ల మేర నిధులు కేటాయించబడి, సంబంధిత పనులు పురోగతిలో ఉన్నాయని చెప్పారు.

రాష్ట్ర ప్రభుత్వ నిధులతో రోడ్లు, డ్రైన్ల అభివృద్ధి

రాష్ట్ర ప్రభుత్వ కేటాయింపుల కింద రూ.5.20 కోట్ల విలువైన రోడ్లు, డ్రైన్లు, పూడికతీత తదితర పనులు పురోగతిలో ఉన్నాయని మంత్రి తెలిపారు.

తాగునీరు, డ్రైనేజీకి మరో రూ.95 కోట్ల పనులు

పట్టణ తాగునీటి సరఫరా, డ్రైనేజీ వ్యవస్థలను మరింత బలోపేతం చేసేందుకు యూఐడీఎఫ్‌–IV కింద రూ.72 కోట్ల విలువైన పనులు పరిపాలనా అనుమతుల దశలో ఉన్నాయని మంత్రి తెలిపారు. యూసీఎఫ్‌ ఫేజ్‌–II కింద డ్రైనేజీ పనులకు మరో రూ.23 కోట్ల విలువైన పనులు కూడా పరిపాలనా అనుమతుల దశలో ఉన్నాయని చెప్పారు.

రూ.104.28 కోట్ల పనులు పురోగతిలో

ధర్మవరం పట్టణంలో ప్రస్తుతం రూ.104.28 కోట్ల విలువైన వివిధ అభివృద్ధి పనులు పురోగతిలో ఉన్నాయని మంత్రి సత్యకుమార్‌ యాదవ్‌ తెలిపారు. రహదారులు, డ్రైనేజీ, తాగునీరు, పారిశుద్ధ్యం తదితర మౌలిక వసతుల పనులు ఇందులో ఉన్నాయని చెప్పారు.

మరోవైపు హెచ్‌ఏఎం కింద రూ.43 కోట్ల పనులు టెండర్‌ దశలో ఉండగా, యూఐడీఎఫ్‌–IV కింద రూ.72 కోట్లు, యూసీఎఫ్‌ ఫేజ్‌–II కింద రూ.23 కోట్ల పనులు పరిపాలనా అనుమతుల దశలో ఉన్నాయని మంత్రి వివరించారు.

ధర్మవరం అభివృద్ధికి రూ.242.28 కోట్ల సమగ్ర ప్రణాళిక

ధర్మవరం పట్టణంలో తాగునీరు, మురుగునీటి పారుదల, రహదారులు, డివైడర్లు, పార్కులు, వీధి దీపాలు, పారిశుద్ధ్యం తదితర కీలక మౌలిక వసతులను అభివృద్ధి చేసేందుకు అమృత్‌ 2.0, స్వచ్ఛ భారత్‌ మిషన్‌ 2.0, హెచ్‌ఏఎం, యూఐడీఎఫ్‌–IV, యూసీఎఫ్‌ ఫేజ్‌–II, రాష్ట్ర ప్రభుత్వ కేటాయింపులు తదితర పథకాల కింద మొత్తం రూ.242.28 కోట్ల మేర పనులు చేపడుతున్నామని మంత్రి తెలిపారు.

ఇందులో ప్రస్తుతం జరుగుతున్న పనులు, టెండర్‌ దశలో ఉన్న పనులు, పరిపాలనా అనుమతుల దశలో ఉన్న పనులు ఉన్నాయని చెప్పారు. అన్ని పనులను సమన్వయంతో ముందుకు తీసుకెళ్లి ప్రజలకు వీలైనంత త్వరగా ప్రయోజనాలు అందేలా చర్యలు తీసుకుంటామని మంత్రి స్పష్టం చేశారు.

ప్రజలకు మెరుగైన మౌలిక వసతులే లక్ష్యం

ముఖ్యమంత్రి నారా చంద్రబాబు నాయుడు నాయకత్వంలో ధర్మవరం పట్టణ అభివృద్ధి పనులను వేగవంతం చేస్తున్నామని మంత్రి సత్యకుమార్‌ యాదవ్‌ తెలిపారు. తన నిరంతర పర్యవేక్షణతో మంజూరైన, పురోగతిలో ఉన్న, టెండర్‌, పరిపాలనా అనుమతుల దశలో ఉన్న పనులను సమన్వయంతో పూర్తి చేసి ప్రజలకు త్వరితగతిన ప్రయోజనాలు అందేలా చర్యలు తీసుకుంటామని చెప్పారు. రహదారులు, డ్రైనేజీ, తాగునీరు, పారిశుద్ధ్యం, పార్కులు, వీధి దీపాలు తదితర సదుపాయాలను మరింత మెరుగుపరుస్తామని మంత్రి పేర్కొన్నారు.