ప్రమోటర్ల ఎత్తుగడలకు ఇక చెల్లుచీటి

-కేతనకొండ ప్లాట్ ఓనర్ల మహాజనసభలో కీలక తీర్మానాలు
-రెరా ఆదేశాలు అమలు చేయకపోతే న్యాయపోరాటమే
-825 కుటుంబాలను కాపాడాలని డిమాండ్

విజయవాడ, నేటి పత్రిక ప్రజావార్త :
విజయవాడ సమీపంలోని కేతనకొండ శ్రీహరిపురం ప్రభుత్వ ఉద్యోగుల కోఆపరేటివ్ కాలనీ వ్యవహారంలో ప్లాట్ ఓనర్లు ఇక వేచి చూసే ప్రసక్తే లేదని స్పష్టం చేశారు. జీవితకాల కష్టార్జితాన్ని పెట్టుబడిగా పెట్టి ఇల్లు కట్టుకోవాలన్న ఆశతో ముందుకొచ్చిన ఉద్యోగులు, పదవీ విరమణ చేసిన కుటుంబాలు తమ ప్లాట్ల కోసం సంవత్సరాలుగా ఎదురుచూస్తున్న పరిస్థితిపై ఆదివారం సెప్టెంబర్ 20న విజయవాడ మాకినేని బసవపున్నయ్య విజ్ఞాన కేంద్రంలో పెద్దఎత్తున సమావేశమయ్యారు. ప్లాట్ ఓనర్ల సంక్షేమ సంఘం ఆధ్వర్యంలో జరిగిన అత్యవసర మహాజనసభకు 300 మందికి పైగా సభ్యులు హాజరై, ఇక తమ హక్కుల కోసం సంఘటితంగా పోరాడాలని సమర శంఖం పూరించారు.

సభ్యుల ఆరోపణల ప్రకారం, ఈ వ్యవహారంలో రెరాతో పాటు సహకార శాఖకు సంబంధించిన విచారణలు, ఆదేశాలు, రికార్డులు అనేక ప్రశ్నలను లేవనెత్తుతున్నాయి. అధికారిక రెరా స్టేటస్ రిపోర్టులో ఈ ప్రాజెక్టు 10-12-2022న నమోదై, 03-11-2025 వరకు రిజిస్ట్రేషన్ గడువు ఉన్న ప్రాజెక్టుగా నమోదైంది. అయితే మహాజనసభ నోటీసులో పేర్కొన్న వివరాల ప్రకారం, 168 మంది ప్లాట్ హోల్డర్ల ఫిర్యాదులపై రెరా ఆదేశాలు జారీ చేసి, 05-09-2026లోగా అభివృద్ధి చేసిన ప్లాట్లను స్వాధీనం చేయాలని ఆదేశించినప్పటికీ ఆ ఆదేశాలు అమలు కాలేదని సభ్యులు ఆరోపించారు.
సభ్యుల వాదనలో అత్యంత తీవ్రమైన అంశం అదనపు డెవలప్‌మెంట్ చార్జీలకు సంబంధించినది. గత 40 నెలలుగా ప్లాట్ అగ్రిమెంట్‌కు విరుద్ధంగా గజానికి రూ. 1,200/- (లేదా రూ. 900/-) అదనపు అభివృద్ధి ఖర్చుల పేరుతో వసూలు చేయడం రెరా చట్టానికి పూర్తి విరుద్ధమని మహాసభ స్పష్టం చేసింది. సెప్టెంబర్ 05, 2026 నాటికి అభివృద్ధి చేసిన ప్లాట్లను స్వాధీనం చేయాలని రెరా కోర్టు స్పష్టమైన తీర్పునిచ్చినా, ప్రమోటర్లు ఆ ఆదేశాలను బేఖాతరు చేశారని ఎలుగెత్తి చాటారు.
‘ప్లాట్ కొనుగోలు చేసిన తరువాత కూడా కొత్త పేర్లతో వసూళ్లు కొనసాగితే సభ్యుల నమ్మకానికి అర్థమేంటి?” అన్న ప్రశ్న సమావేశంలో బలంగా వినిపించింది.

ఇక రెరా స్వయంగా ఈ ప్రమోటర్‌ సంస్థ అనేక నిబంధనలను ఉల్లంఘించిందని పేర్కొంటూ 05-06-2026న ఇచ్చిన ఆదేశాల్లో సెక్షన్ 8 కింద చర్యలు తీసుకుంటున్నట్లు తెలిపిందని మహాజనసభ నోటీసు పేర్కొంది. ఆ నిర్ణయాన్ని అమలు చేసి 825 కుటుంబాలను ఆర్థిక సంక్షోభం నుంచి కాపాడాలని రెరాను కోరుతూ సభ ఏకగ్రీవంగా తీర్మానించింది. ఇది ఇక వ్యక్తిగత ఫిర్యాదుల స్థాయిని దాటి, వందల కుటుంబాల భవిష్యత్తుకు సంబంధించిన సామూహిక సమస్యగా మారిందని సభ్యులు స్పష్టం చేశారు.

అత్యంత కీలకంగా, రెరా ఆదేశాలు అమలు కాకపోవడంతో ఎగ్జిక్యూషన్ పిటిషన్ (EP) దాఖలు చేయాలని మహాజనసభ ఏకగ్రీవంగా నిర్ణయించింది. అంటే తీర్పు వచ్చిందా లేదా అన్న దశను దాటి, వచ్చిన ఆదేశాన్ని భూమిపై అమలు చేయించేందుకు చట్టపరమైన తదుపరి అడుగు వేయాలని ప్లాట్ ఓనర్లు నిర్ణయించారు. ‘ఆదేశం కాగితంపై ఉంటే సరిపోదు… మా చేతికి ప్లాట్ రావాలి” అనే భావన సభలో స్పష్టంగా వ్యక్తమైంది.

అదే సమయంలో,రెరా తీర్పులో పేర్కొన్న నష్టపరిహారం అవకాశాన్ని కూడా సభ్యులు వినియోగించుకోవాలని నిర్ణయించారు. సొసైటీ వల్ల తమకు ఆర్థిక నష్టం జరిగిందని భావించే ప్లాట్ హోల్డర్లు రెరా అడ్జుడికేటింగ్ ఆఫీసర్‌ను ఆశ్రయించి ‘ఫారమ్-ఎన్’ ద్వారా పరిహారం కోరవచ్చని తీర్పులో పేర్కొన్నట్లు మహాజనసభ నోటీసు తెలిపింది. ప్రతి అర్హత కలిగిన సభ్యుడు తన హక్కును చట్టబద్ధంగా వినియోగించుకోవాలని సభ ఏకగ్రీవంగా తీర్మానించింది.
ఈ సమావేశం ఒక విషయం మాత్రం స్పష్టం చేసింది—సహకారం అంటే మౌనం కాదు. సహకారం అంటే సభ్యుల హక్కుల కోసం సభ్యులంతా కలసి నిలబడటం. ఒకప్పుడు ఇల్లు కోసం కలిసి ఏర్పడిన సంఘమే ఇప్పుడు తమ హక్కుల కోసం ఐక్యంగా నిలబడాల్సిన పరిస్థితి రావడం బాధాకరమని పలువురు సభ్యులు పేర్కొన్నారు.
ఇప్పుడు అసలు ప్రశ్న రెరా ఆదేశం ఉందా లేదా అన్నది కాదు. ఆ ఆదేశం అమలవుతుందా లేదా? అన్నదే. రెరా చట్టం వినియోగదారుల ప్రయోజనాలను రక్షించేందుకు, రియల్ ఎస్టేట్ రంగంలో పారదర్శకతను తీసుకురావడానికి ఏర్పడింది. ఎపి రెరా కూడా ప్రాజెక్టుల వివరాలను ప్రజలకు అందుబాటులో ఉంచడం, చట్టబద్ధమైన బాధ్యతల అమలును పర్యవేక్షించడం వంటి బాధ్యతలను కలిగి ఉంది. అందువల్ల ఆదేశాలు వెలువడిన తర్వాత వాటి అమలులో ఆలస్యం ఉంటే దానికి పరిష్కారం చూపాల్సిన బాధ్యత కూడా వ్యవస్థపైనే ఉంటుంది.

కేతనకొండ వ్యవహారం ఇప్పుడు ఒక కీలక మలుపులోకి ప్రవేశించింది. ఒకవైపు ప్లాట్ ఓనర్లు చట్టపరమైన పోరాటానికి సిద్ధమవుతున్నారు. అన్యాయాన్ని ఎదిరించే సహకార స్ఫూర్తితో, మోసపూరిత శక్తుల కుట్రలను తిప్పికొట్టేందుకు ఉద్యోగులంతా ఒక్కతాటిపై నిలిచారు
మరోవైపు రెరా ఆదేశాల అమలు, సెక్షన్ 8 కింద చర్యల తదుపరి దశ, నష్టపరిహారం కోసం సభ్యుల హక్కులు—ఈ మూడు అంశాలు ముందుకు వచ్చాయి. 300 మందికి పైగా సభ్యులు సమావేశమై ఏకగ్రీవ తీర్మానాలు చేయడం ద్వారా ‘ఇక ఒక్కొక్కరుగా కాదు… అందరం కలిసి’ అనే స్పష్టమైన సందేశాన్ని ఇచ్చారు. తమ హక్కుల సాధన కోసం ఇక వెనకడుగు వేసేది లేదని తేల్చిచెప్పారు!

ఇది కేవలం ప్లాట్ల కోసం పోరాటం కాదు. సహకార సంఘం పేరుతో ఏర్పడిన వ్యవస్థలో సభ్యుడి డబ్బు, సభ్యుడి హక్కు, సభ్యుడి భవిష్యత్తు చివరి వరకు రక్షించబడాలనే పోరాటం. పదవీ విరమణ చేసిన ఉద్యోగి జీవితకాల పొదుపు ఒక సంఖ్య కాదు. అతని కుటుంబ భవిష్యత్తు. ఆ భవిష్యత్తును కాపాడటంలో రెరా, సహకార శాఖ, సంబంధిత అధికారులు తమ చట్టబద్ధ బాధ్యతను సమర్థంగా నిర్వర్తించాలన్నదే ప్లాట్ ఓనర్ల డిమాండ్.
కేతనకొండలో పూరించిన ఈ సమర శంఖం ఇప్పుడు ఒక ప్రశ్నను అధికార వ్యవస్థ ముందుంచుతోంది. రెరా ఆదేశం అమలు చేయడానికి ఇంకా ఎంతకాలం? 825 కుటుంబాలు తమ ప్లాట్ల కోసం ఇంకా ఎంతకాలం ఎదురు చూడాలి? సభ్యులు తమ తీర్మానాలతో తదుపరి చట్టపరమైన పోరాటానికి సిద్ధమయ్యారు. ఇక వారి మాట ఒక్కటే—’మా కష్టార్జితం మా హక్కు. మా ప్లాట్ మా చేతికి వచ్చే వరకు పోరాటం ఆగదు. ‘‘మేమే ప్రభుత్వం’ అంటూ బెదిరింపులకు పాల్పడే అక్రమార్కుల ఆటకట్టించే వరకు, తమకు రావాల్సిన ప్లాట్లను లేదా వడ్డీతో కూడిన నష్టపరిహారాన్ని సాధించుకునే వరకు పోరాటం ఆగదని ఈ మహాసభ ద్వారా బాధితులు స్పష్టమైన హెచ్చరిక జారీ చేశారు.