భక్తులకు సేవే దైవసేవ.. ఇంద్రకీలాద్రిపై మానవతా పరిమళం

-మంచినీరు, మజ్జిగ పంపిణీ.. పసిపిల్లలకు వేడి పాలు.. సేవలో భాగస్వాములైన స్వచ్ఛంద సంస్థలు, యువ వాలంటీర్లు

ఇంద్రకీలాద్రి, నేటి పత్రిక ప్రజావార్త:
దసరా శరన్నవరాత్రి ఉత్సవాలతో ఇంద్రకీలాద్రి భక్తి పారవశ్యంలో మునిగితేలుతుండగా, అమ్మవారి దర్శనానికి తరలివస్తున్న భక్తులకు అందుతున్న సేవలు మానవతా విలువలను చాటుతున్నాయి. ఎండ, రద్దీతో ఇబ్బంది పడకుండా భక్తులకు మంచినీరు, మజ్జిగ అందించడంతో పాటు, పసిపిల్లల అవసరాలను దృష్టిలో ఉంచుకుని వేడి పాలు కూడా పంపిణీ చేస్తున్నారు. స్వచ్ఛంద సంస్థలు, NSS యువ వాలంటీర్లు, రెడ్‌క్రాస్ సొసైటీ సేవా కార్యక్రమాల్లో భాగస్వాములవుతూ భక్తులకు అండగా నిలుస్తున్నారు.
దర్శనం కోసం క్యూలైన్లలో వేచి ఉండే భక్తులకు మంచినీరు, మజ్జిగ అందించడం ఉపశమనాన్ని కలిగిస్తోంది. చిన్నారులతో వచ్చే కుటుంబాలకు వేడి పాలు అందించడం ప్రత్యేకంగా ఉపయోగపడుతోంది. సేవాభావంతో ముందుకొస్తున్న వాలంటీర్లు భక్తులకు అవసరమైన సహాయం అందిస్తూ, వృద్ధులు, మహిళలు, చిన్నారుల పట్ల శ్రద్ధ చూపుతున్నారు. అత్యవసర పరిస్థితుల్లో వైద్య సహాయం అందుబాటులో ఉండేలా సంబంధిత వైద్య సిబ్బంది సేవలు అందిస్తున్నారు.
వివిధ కళాశాలలకు చెందిన విద్యార్థినీ విద్యార్థులు కూడా ఈ సేవా కార్యక్రమాల్లో ఉత్సాహంగా పాల్గొంటున్నారు. NSS, యువజన సంఘాలు, కళాశాలల వాలంటీర్లుగా విద్యార్థులు భక్తులకు మంచినీరు, మజ్జిగ, వేడి పాలు పంపిణీ చేయడంతో పాటు క్యూలైన్లలో క్రమశిక్షణ, వృద్ధులు, మహిళలు, చిన్నారులకు అవసరమైన సహాయం అందిస్తున్నారు. విద్యార్థుల్లో సేవాభావం, సామాజిక బాధ్యత, క్రమశిక్షణ వంటి విలువలను పెంపొందించడంలో ఇటువంటి కార్యక్రమాలు కీలకంగా నిలుస్తున్నాయి. సమాజానికి బాధ్యతగల మంచి పౌరులను అందించేందుకు విద్యార్థుల భాగస్వామ్యం ఎంతో అవసరమని నిర్వాహకులు పేర్కొంటున్నారు.

అధికారుల సమన్వయం.. సేవా కార్యక్రమాలకు తోడ్పాటు

ఎన్టీఆర్ జిల్లా కలెక్టర్ డాక్టర్ జి. లక్ష్మీశ పర్యవేక్షణలో జిల్లా యంత్రాంగం ఉత్సవాల నిర్వహణకు సంబంధించిన వివిధ విభాగాలతో సమన్వయం చేస్తోంది. విజయవాడ నగరపాలక సంస్థ కమిషనర్ హెచ్.ఎం. ధ్యానచంద్ర ఆధ్వర్యంలోని నగరపాలక సంస్థ విభాగాల పారిశుద్ధ్యం, పరిసరాల పరిశుభ్రత వంటి అంశాలు భక్తులకు మెరుగైన వాతావరణం కల్పించడంలో కీలకమైనవి.
దేవాదాయ శాఖ మంత్రివర్యుల దిశానిర్దేశంతో ముఖ్య కార్యదర్శి, కమిషనర్ పర్యవేక్షణలో
శ్రీ దుర్గా మల్లేశ్వర స్వామివార్ల దేవస్థానం కార్య నిర్వహణ అధికారి శీనా నాయక్ ఆధ్వర్యంలో ఆలయ సంబంధిత ఏర్పాట్లు, భక్తులకు అవసరమైన సౌకర్యాల నిర్వహణ కొనసాగుతోంది. దేవస్థాన ధర్మకర్తల మండలి చైర్మన్ బొర్రా గాంధీ కూడా ఉత్సవాల నిర్వహణకు సంబంధించిన అంశాల్లో దేవస్థానం తరఫున భాగస్వామ్యం వహిస్తున్నారు.

నగర పోలీస్ కమిషనర్ రాజశేఖరబాబు ఆధ్వర్యంలోని పోలీసు యంత్రాంగం భక్తుల భద్రత, క్యూలైన్ల క్రమబద్ధీకరణ, ట్రాఫిక్ నియంత్రణపై దృష్టి సారిస్తోంది. రద్దీ సమయంలో భక్తులకు ఇబ్బందులు కలగకుండా భద్రతా ఏర్పాట్లతో పాటు అవసరమైన మార్గనిర్దేశం అందించడం పోలీసుల విధుల్లో ముఖ్యమైన భాగంగా కొనసాగుతోంది.