శ్రీ లలితా త్రిపురసుందరీదేవిగా కనకదుర్గమ్మ దివ్యదర్శనం

-బంగారు వర్ణపు చీరలో జగన్మాత.. పులిహోర, పెసర బూరెలు నైవేద్యం

విజయవాడ (ఇంద్రకీలాద్రి), నేటి పత్రిక ప్రజావార్త :
ఇంద్రకీలాద్రిపై కొలువైన శ్రీ కనకదుర్గమ్మవారు శరన్నవరాత్రి ఉత్సవాల్లో ఐదో రోజైన గురువారం శ్రీ లలితా త్రిపురసుందరీదేవి అలంకారంలో భక్తులకు దర్శనమివ్వనున్నారు. పరాశక్తి స్వరూపిణిగా, శ్రీచక్ర అధిష్ఠానశక్తిగా పూజలందుకునే అమ్మవారి దివ్య అలంకారం భక్తులకు ఆధ్యాత్మిక అనుభూతిని అందించనుంది.

బంగారు వర్ణపు చీరలో అమ్మవారి అలంకారం

ఈ రోజు అమ్మవారిని బంగారు వర్ణపు చీరతో అలంకరించనున్నారు. సౌందర్యం, కరుణ, శక్తి, జ్ఞానాల సమ్మేళనంగా భావించే శ్రీ లలితా త్రిపురసుందరీదేవి రూపం విశేష ఆధ్యాత్మిక ప్రాధాన్యాన్ని కలిగి ఉంది. చెరకు విల్లు, పుష్పబాణాలు, పాశాంకుశాలను ధరించిన అమ్మవారు శ్రీ మహాలక్ష్మీదేవి, శ్రీ సరస్వతీదేవి సేవలందించే దివ్య స్వరూపంలో భక్తులకు దర్శనమిస్తారు.

పులిహోర, పెసర బూరెలు నైవేద్యం

శ్రీ లలితా త్రిపురసుందరీదేవికి సంప్రదాయం ప్రకారం పులిహోర, పెసర బూరెలను నైవేద్యంగా సమర్పించనున్నారు. అమ్మవారిని దర్శించుకునే భక్తులు కుటుంబ క్షేమం, ఆరోగ్యం, ఐశ్వర్యం, సుఖశాంతులు కలగాలని ప్రార్థిస్తారు. లలితా సహస్రనామ పారాయణం, కుంకుమార్చన, శ్రీచక్రారాధనలకు ఈ అమ్మవారి ఆరాధనలో విశేష ప్రాధాన్యం ఉంది.

శరన్నవరాత్రి ఉత్సవాల్లో భాగంగా అమ్మవారి దర్శనానికి వచ్చే భక్తులకు సౌకర్యవంతమైన దర్శనం కల్పించేందుకు దేవస్థానం, పోలీసు శాఖ, జిల్లా యంత్రాంగం సమన్వయంతో ఏర్పాట్లు చేపడుతున్నాయి. భక్తులు అధికారుల సూచనలు పాటిస్తూ క్యూలైన్లలో క్రమశిక్షణతో ముందుకు సాగి జగన్మాత అనుగ్రహాన్ని పొందాలని కోరుతున్నారు.

శ్రీమాతా లలితా త్రిపురసుందరీదేవికి జయమంగళాలు!