మహిళా సాధికారతతోనే సమ్మిళిత వృద్ధి సాధ్యం

-మహిళలు ఆర్థిక స్వావలంబన సాధించాలి – ఆచార్య నాగార్జున విశ్వవిద్యాలయ ఆర్థికశాస్త్ర విభాగాధిపతి డా. కె. మధు బాబు

విజయవాడ, నేటి పత్రిక ప్రజావార్త:
మహిళలు ఆర్థిక స్వావలంబన సాధించి, పారిశ్రామికవేత్తలుగా ఎదిగినప్పుడే సమాజంలో సమ్మిళిత వృద్ధి సాధ్యమవుతుందని ఆచార్య నాగార్జున విశ్వవిద్యాలయం, గుంటూరు ఆర్థికశాస్త్ర విభాగాధిపతి డా. కె. మధు బాబు పేర్కొన్నారు. విజయవాడలోని మారిస్ స్టెల్లా కళాశాల (అటానమస్‌) ఆర్థికశాస్త్ర విభాగం, ఇండియన్ కౌన్సిల్ ఆఫ్ సోషల్ సైన్స్ రీసెర్చ్–సదరన్ రీజినల్ సెంటర్ (ICSSR-SRC), హైదరాబాద్ సంయుక్త ఆధ్వర్యంలో నిర్వహించిన రెండు రోజుల జాతీయ సదస్సు శుక్రవారం ముగిసింది.

‘ప్రపంచ యుగంలో మహిళా సాధికారత, వ్యవస్థాపకత మరియు సమ్మిళిత వృద్ధి: ఆవిష్కరణలు, సవాళ్లు మరియు విధాన దృక్పథాలు’ అనే అంశంపై అక్టోబర్ 15, 16 తేదీల్లో నిర్వహించిన ఈ సదస్సులో మహిళల ఆర్థిక అభివృద్ధి, పారిశ్రామిక రంగంలో వారి భాగస్వామ్యం, స్వయం ఉపాధి అవకాశాలు, సామాజిక ఆర్థిక సవాళ్లు, విధానపరమైన మార్పులపై నిపుణులు చర్చించారు.

మహిళలు లక్ష్యాన్ని నిర్దేశించుకుని ముందుకు సాగాలి
ముగింపు కార్యక్రమానికి ముఖ్య అతిథిగా హాజరైన డా. కె. మధు బాబు మాట్లాడుతూ మహిళల ఆర్థిక పరిస్థితులు మెరుగుపడాలంటే ముందుగా వారు ఒక నిర్దిష్ట లక్ష్యాన్ని ఏర్పరచుకోవాలని సూచించారు. ఆర్థిక స్వావలంబన మహిళల్లో ఆత్మవిశ్వాసాన్ని పెంపొందించడంతో పాటు కుటుంబ, సామాజిక అభివృద్ధిలో కీలక పాత్ర పోషిస్తుందని వివరించారు.

మహిళలను పారిశ్రామికవేత్తలుగా తీర్చిదిద్దేందుకు ప్రభుత్వం ప్రవేశపెడుతున్న వివిధ ప్రోత్సాహక కార్యక్రమాలు, స్టార్టప్ ఇండియా వంటి పథకాలు అవకాశాలను అందిస్తున్నాయని తెలిపారు. బ్యాంకులు కూడా మహిళలకు, స్వయం సహాయక సంఘాలకు రుణాలు, ఇతర ఆర్థిక సేవలను అందుబాటులోకి తీసుకువస్తున్నాయని పేర్కొన్నారు.

మహిళలు చిన్న తరహా పరిశ్రమలు, వ్యాపార యూనిట్లతో తమ ప్రయాణాన్ని ప్రారంభించి, క్రమంగా వాటిని అభివృద్ధి చేసుకుంటూ లాభాలు ఆర్జించవచ్చని చెప్పారు. అందుబాటులో ఉన్న ఆర్థిక సహకారం, ప్రభుత్వ పథకాలు, బ్యాంకింగ్ సేవలను సద్వినియోగం చేసుకుని పారిశ్రామిక రంగంలో తమదైన ముద్ర వేయాలని మహిళలకు పిలుపునిచ్చారు.

మహిళా సాధికారతపై పరిశోధనలు అవసరం
మారిస్ స్టెల్లా కళాశాల ప్రిన్సిపాల్ డా. సిస్టర్ ఇన్యసమ్మ గాదె మాట్లాడుతూ మహిళా వ్యవస్థాపకత, సాధికారత అంశాలు ప్రస్తుత సమాజంలో విస్తృతంగా చర్చించాల్సిన అవసరం ఉందన్నారు. మహిళల అభివృద్ధికి ఎదురవుతున్న సవాళ్లను గుర్తించి, వాటికి పరిష్కార మార్గాలను అన్వేషించడంలో ఇటువంటి జాతీయ సదస్సులు దోహదపడతాయని పేర్కొన్నారు.

మహిళల పురోగతికి మరిన్ని నూతన ఆవిష్కరణలు, నాణ్యమైన విద్య, పరిశోధనలు అవసరమని తెలిపారు. సామాజిక, ఆర్థిక రంగాల్లో మహిళలకు సమాన అవకాశాలు కల్పించడంతో పాటు వారి నైపుణ్యాలను ప్రోత్సహించే విధానాలు రూపొందించాలని అభిప్రాయపడ్డారు. ఈ సదస్సును నిర్వహించిన కళాశాల ఆర్థికశాస్త్ర విభాగాన్ని ఆమె అభినందించారు.

దేశవ్యాప్తంగా పరిశోధకుల భాగస్వామ్యం
సదస్సు కన్వీనర్ డా. ఎన్. సత్యవేదం కార్యక్రమ లక్ష్యాలను వివరించారు. మహిళా సాధికారత, వ్యవస్థాపకత, సమ్మిళిత వృద్ధికి సంబంధించిన వివిధ అంశాలపై పరిశోధనాత్మక చర్చలు జరగడం సదస్సు ప్రధాన ఉద్దేశమని తెలిపారు. పరిశోధనా పత్రాలు సమర్పించిన అధ్యాపకులు, పరిశోధకులకు కృతజ్ఞతలు తెలియజేశారు.

ఆర్గనైజింగ్ సెక్రటరీ డా. స్వరూప్ కుమార్ రెండు రోజుల సదస్సు నివేదికను సమర్పించారు. దేశంలోని వివిధ ప్రాంతాలకు చెందిన విశ్వవిద్యాలయాల నుంచి పాల్గొన్న అధ్యాపకులు, పరిశోధకులు 60కి పైగా పరిశోధనా అంశాలపై తమ అభిప్రాయాలు, సూచనలు, సలహాలను వెల్లడించినట్లు తెలిపారు. మహిళల సాధికారత, సామాజిక-ఆర్థిక అభివృద్ధి, పారిశ్రామిక అవకాశాలు, విధానపరమైన సవాళ్లు వంటి అంశాలపై చర్చలు జరిగాయని వివరించారు.

పాల్గొన్న అధ్యాపకులకు ధ్రువపత్రాల ప్రదానం
సదస్సు ముగింపు సందర్భంగా ముఖ్య అతిథి డా. కె. మధు బాబు పాల్గొన్న అధ్యాపకులు, పరిశోధకులకు ధ్రువపత్రాలను అందజేశారు. రెండు రోజుల పాటు జరిగిన చర్చలు, పరిశోధనా పత్రాల సమర్పణలు మహిళా సాధికారతపై అవగాహన పెంపొందించడంతో పాటు భవిష్యత్ పరిశోధనలకు దిశానిర్దేశం చేశాయని నిర్వాహకులు పేర్కొన్నారు.

ఈ కార్యక్రమంలో విశ్రాంత అధ్యాపకురాలు డా. వై. ఇందిరా కుమారి, సబ్ లెఫ్టినెంట్ స్వప్న, బి. మానస, ఇతర అధ్యాపకులు, పరిశోధకులు, విద్యార్థులు పాల్గొన్నారు.