రాష్ట్రంలో భారతీయ తయారీ విదేశీ మధ్యం (ఐఎంఎఫ్ఎల్) నిల్వలకు కొరత లేదు

-అందుబాటులో 20 రోజులకు సరిపడా నిల్వలు : అబ్కారీ శాఖ సంచాలకులు నిషాంత్ కుమార్

విజయవాడ, నేటి పత్రిక ప్రజావార్త :
రాష్ట్రంలో భారతీయ తయారీ విదేశీ మధ్యంకు (ఐఎంఎఫ్ఎల్) ఎటువంటి కొరత లేదని అబ్కారీ శాఖ సంచాలకులు నిషాంత్ కుమార్ తెలిపారు. వినియోగానికి అవసరమైన మేరకు నిల్వలు రాష్ట్ర వ్యాప్తంగా అందుబాటులో ఉన్నాయన్నారు. సాధారణంగా 90,000 కేసుల ఐఎంఎఫ్ఎల్, 23,000 కేసుల బీరు రాష్ట్రంలో రోజువారీ సగటు వినియోగంగా ఉందని, ప్రస్తుతం ఉన్న నిల్వలు కనీసం 20 రోజుల వరకు సరిపోతాయని స్పష్టం చేసారు. రాష్ట్ర వ్యాప్తంగా ఉన్న లిక్కర్ డిపోలలో 20 లక్షల కేసుల ఐఎంఎఫ్ఎల్, 5.6 లక్షల కేసుల బీర్ విక్రయానికి అందుబాటులో ఉందని నిషాంత్ కుమార్ వివరించారు. విభిన్న అవుట్ లెట్ ల పరంగా 6.93 లక్షల కేసుల ఐఎంఎఫ్ఎల్ సిద్దంగా ఉందని, పూర్వపు సగటు వినియోగాన్ని పరిగణన లోకి తీసుకుంటే ఈ నిల్వ 9 రోజులు సరిపోతుందని పేర్కొన్నారు. కేవలం వరదల కారణంగా తగిన నిల్వ సామర్ధ్యం లేక విజయవాడ నగరంలోని కొన్ని అవుట్ లెట్లతో మాత్రమే నిల్వలు తగ్గుముఖం పట్టాయని నిషాంత్ కుమార్ వివరించారు. గత సంవత్సరం సెప్టెంబరు నెలలో విక్రయాల విలువ 2487 కోట్లుగా ఉండగా, ఈ సంవత్సరం ఇప్పటికే రూ.1972 కోట్ల మేర విక్రయాలు జరిగాయన్నారు. బుధవారంతో కలిపి రానున్న ఆరురోజుల్లో గత సంవత్సరం ఇదే నెలలో చేసిన విక్రయాల స్దాయికి చేరుకోవటం సుసాధ్యమని తెలిపారు. వైన్ షాపులలో నిల్వలు లేక, వినియోగదారులు బార్లను ఆశ్రయిస్తుండటం వల్ల ప్రభుత్వ అదాయం తగ్గుతుందన్న దానిలో ఎటువంటి వాస్తవం లేదన్నారు. వైన్ షాపు లేదా బార్ లో ఎక్కడ విక్రయం జరిగినా అదాయం ప్రభుత్వానికే చెందుతుందని అబ్కారీ శాఖ సంచాలకులు నిషాంత్ కుమార్ వివరించారు.