కాశీ విశ్వేశ్వరుని సేవలో మల్లాది విష్ణు

విజయవాడ, నేటి పత్రిక ప్రజావార్త :
కార్తీక మాసంలో భాగంగా సోమవారం గవర్నర్ పేటలోని అన్నపూర్ణ సమేత శ్రీ కాశీ విశ్వేశ్వర స్వామి దేవస్థానం భక్తులతో కిటకిటలాడింది. వేకువజామున 3 గంటల నుంచి భక్తులు పెద్దసంఖ్యలో తరలివచ్చి భక్తి శ్రద్ధలతో స్వామి వారిని దర్శించుకున్నారు. ఈ సందర్భంగా వైసీపీ సెంట్రల్ నియోజకవర్గ సమన్వయకర్త, మాజీ ఎమ్మెల్యే మల్లాది విష్ణు ముక్కంటికి ప్రత్యేక పూజలు నిర్వహించారు. కైలాసనాథునికి సుగంధ‌ద్రవ్యాలతో అభిషేకం చేశారు. కార్తీక సోమవారం పర్వదినాన కాశీ విశ్వేశ్వర స్వామి వారిని దర్శించుకోవడం సంతోషంగా ఉందని ఈ సందర్భంగా మల్లాది విష్ణు వెల్లడించారు. ఓంకార స్వరూపుడైన శంకరుని ధ్యానిస్తే కష్టాలన్నీ తొలగిపోయి.. సకల శుభాలు కలుగుతాయన్నారు. ఆ శివయ్య చల్లని చూపు నియోజకవర్గ ప్రజలపైన, వైఎస్ జగన్మోహన్ రెడ్డిపైన ఎల్లవేళలా ఉండాలని కాంక్షించారు. అనంతరం స్వామి వారి తీర్థప్రసాదాలు స్వీకరించారు.