Prajavartha Online Telugu News
-ఆహార భద్రతా నిబంధనలపై అవగాహన.. వ్యాపార నిర్వహణ సులభతరంపై చర్చ
విజయవాడ, నేటి పత్రిక ప్రజావార్త :
ఆహార భద్రతా నిబంధనలు, లైసెన్సింగ్ విధానాలు, తాజా సంస్కరణలపై అవగాహన కల్పించేందుకు విజయవాడలోని ఏపీ ఛాంబర్స్ కార్యాలయంలో ఆహార భద్రతా భాగస్వాముల సమావేశం నిర్వహించారు. భారత ఆహార భద్రత, ప్రమాణాల ప్రాధికార సంస్థ (ఎఫ్‌ఎస్‌ఎస్‌ఏఐ), ఆంధ్రప్రదేశ్ సహకారంతో ఏపీ ఫుడ్ ప్రాసెసింగ్ ఇండస్ట్రీస్ ఫెడరేషన్ (ఏపీఎఫ్‌పీఎస్), ఏపీ ఛాంబర్స్ సంయుక్తంగా ‘రిఫార్మ్స్ ఉత్సవ్–2026’లో భాగంగా ఈ కార్యక్రమాన్ని నిర్వహించాయి.
ఎఫ్‌ఎస్‌ఎస్‌ఏఐ దక్షిణ ప్రాంతీయ కార్యాలయ అసిస్టెంట్ డైరెక్టర్ (టెక్నికల్), ఆంధ్రప్రదేశ్ కేంద్ర నియమిత అధికారి చందనశ్రీ దేవరపల్లి ఆహార భద్రతా నిబంధనలు, లైసెన్సింగ్ ప్రక్రియలు, పరిశ్రమలు ఎదుర్కొంటున్న సమస్యలను వివరించారు. సుమారు 50 మంది ఆహార ఉత్పత్తిదారులు పాల్గొనగా, వారు లేవనెత్తిన సందేహాలకు సమాధానాలిచ్చి నిబంధనల అమలుపై మార్గదర్శకాలు అందించారు.
ఈ కార్యక్రమంలో ఏపీఎఫ్‌పీఎస్ అధ్యక్షుడు వెలగపూడి సాంబశివరావు, ప్రధాన కార్యదర్శి వంశీ వెచ్చ, ఏపీ ఛాంబర్స్ అధ్యక్షుడు, ఏపీఎఫ్‌పీఎస్ గౌరవాధ్యక్షుడు పొట్లూరి భాస్కరరావు, ఏపీ ఛాంబర్స్ ప్రధాన కార్యదర్శి సుబ్బారావు రావూరి తదితరులు పాల్గొన్నారు. పరిశ్రమల ప్రతినిధులు, ఎఫ్‌ఎస్‌ఎస్‌ఏఐ అధికారుల మధ్య ప్రత్యక్ష చర్చలకు ఈ సమావేశం వేదికగా నిలిచింది. ఆహార భద్రతా ప్రమాణాల అమలు, పరిశ్రమలకు మార్గదర్శకత్వం, వ్యాపార నిర్వహణను సులభతరం చేయడమే లక్ష్యంగా ఈ కార్యక్రమాన్ని నిర్వహించారు.
