ఎంఎల్సీ ఎన్నికల నేపథ్యంలో పశ్చిమ గోదావరి జిల్లా నర్సాపురంలో అక్రమ మద్యం రాకెట్ భగ్నం

-పశ్చిమ గోదావరి జిల్లా అబ్కారీ, మద్యపానం నియంత్రణ అధికారి డా. కుమరేశన్
-కోళ్ల ఫారంలో దాచిన 4,500 బాటిళ్ల నకిలీ మద్యం స్వాధీనం

భీమవరం, నేటి పత్రిక ప్రజావార్త :
రాబోయే ఎన్నికలను దృష్టిలో ఉంచుకొని, ఎక్సైజ్ అధికారులు అప్రమత్తమై అక్రమ మద్యం రవాణాపై దృష్టి సారించారు. ఈ క్రమంలో, పశ్చిమ గోదావరి జిల్లా నర్సాపురంలో నిర్వహించిన దాడుల్లో భారీ పరిమాణంలో అక్రమ మద్యం స్వాధీనం చేసుకున్నారు. తొలుత ఓ వ్యక్తిని రాయల్ గ్రాండ్ మాల్ట్ విస్కీ (180ml) రెండు బాటిళ్లతో అరెస్టు చేయగా, తదుపరి దర్యాప్తులో నర్సాపురం సమీపంలోని ఒక ఆక్వా ఫారంలో దాచిన 4,500 బాటిళ్లకు పైగా నకిలీ మద్యం స్వాధీనం చేసుకున్నారు.

ఈ దాడిలో ఇద్దరు వ్యక్తులను అదుపులోకి తీసుకున్నారు. నర్సాపురం మండలంలోని కొప్పర్రు గ్రామానికి చెందిన 35 ఏళ్ల గొల్లమండల రాజబాబు, నర్సాపురం పట్టణానికి చెందిన 42 ఏళ్ల బార్రే జయరాజు అక్రమ మద్యం వ్యాపారంలో పాల్గొన్నట్లు నిర్ధారణ అయ్యింది. అధికారులు ఈ మద్యం రాకెట్‌లో రాజకీయ సంబంధాలపై దర్యాప్తు చేస్తున్నారు. ఈ అక్రమ మద్యం సరఫరా వ్యవహారం నర్సాపురం మున్సిపాలిటీ చైర్‌పర్సన్ బార్రే వెంకటరమణకు సంబంధం ఉన్నట్లు అనుమానాలు వ్యక్తమవుతున్నాయి. ఆమె భర్త బార్రే జయరాజు ద్వారా ఎన్నికల సమయంలో భారీగా మద్యం నిల్వ చేసినట్లు సమాచారం. ఎన్నికల కోసం తీసుకువచ్చిన మద్యం నిల్వల్ని ఇప్పుడు అక్రమంగా విక్రయిస్తున్నట్లు తెలుస్తోంది.

పశ్చిమ గోదావరి జిల్లా అబ్కారీ, మద్యపానం నియంత్రణ అధికారి డా. కుమరేశన్ మాట్లాడుతూ, ఎంతటి ప్రతిష్టాత్మక వ్యక్తులైనా చట్టాన్ని ఉల్లంఘిస్తే చర్యలు తప్పవని స్పష్టం చేశారు. ఈ దాడిని నర్సాపురం ఎస్‌హెచ్ఓ రాంబాబు నేతృత్వంలో విజయవంతంగా అమలు చేశారు. సహాయ కమిషనర్ ప్రభు కుమార్, సహాయ మద్యపానం సూపరింటెండెంట్ ప్రసాద్ రెడ్డి ముఖ్య భూమిక వహించారు. ఈ ఆపరేషన్‌ను ఎన్‌ఫోర్స్‌మెంట్ డైరెక్టర్ రాహుల్ దేవ్ శర్మ, ఉప కమిషనర్ శ్రీలత పర్యవేక్షించారు. ఇదే సమయంలో సమీక్ష సమావేశంలో కమిషనర్ నిశాంత్ కుమార్ , రాహుల్ దేవ్ శర్మ ఆదాయ సేకరణ, నేర నియంత్రణ చర్యలను సమీక్షించారు. ఎన్నికల నైతికతను దెబ్బతీసే అక్రమ కార్యకలాపాలను అడ్డుకోవడానికి అధికార యంత్రాంగాన్ని మరింత అప్రమత్తం చేశారు. దాడుల పట్ల సంతృప్తి వ్యక్తం చేసిన ఆబ్కారీ శాఖ ముఖ్య కార్యదర్శి ముఖేష్ కుమార్ మీనా అధికారులను అభినందించారు. ఈ కేసుపై దర్యాప్తు కొనసాగుతుండగా, మరిన్ని అరెస్టులు జరిగే అవకాశముంది.