విజయకీలాద్రి దివ్యక్షేత్రంలో శ్రీ భూవరాహ జయంతి మహోత్సవాలు

అమరావతి, నేటి పత్రిక ప్రజావార్త :
పరమహంస పరివ్రాజకులు శ్రీశ్రీశ్రీ త్రిదండి చిన్న శ్రీమన్నారాయణ రామానుజ జీయర్ స్వామివారి మంగళాశాసనములతో, విజయకీలాద్రి దివ్యక్షేత్రంలో శ్రీ భూవరాహ జయంతి మహోత్సవాలు అత్యంత వైభవోపేతంగా నిర్వహించబడుతున్నాయి. ఈ పవిత్ర మహోత్సవాలు 24-08-2026 నుండి 26-08-2026 వరకు మూడు రోజుల పాటు వివిధ ఆధ్యాత్మిక కార్యక్రమాలతో భక్తిశ్రద్ధల మధ్య కొనసాగుతున్నాయి.

మహోత్సవాలలో భాగంగా ఈరోజు, 25-08-2026 మంగళవారం, రెండవ రోజు కార్యక్రమాలు అత్యంత భక్తి శ్రద్ధలతో నిర్వహించబడ్డాయి. ఉదయం 09:00 గంటలకు శ్రీ భూవరాహ వ్రతం వైభవంగా నిర్వహించబడింది. వేద పండితుల మంత్రోచ్ఛారణలు, మంగళవాయిద్యాల నడుమ శ్రీ భూవరాహ స్వామివారికి విశేష పూజా కార్యక్రమాలు, వ్రత విధానాలు శాస్త్రోక్తంగా నిర్వహించబడ్డాయి. ఈ సందర్భంగా స్వామివారి దివ్య మంగళ స్వరూపాన్ని దర్శించుకున్న భక్తులు భక్తిపారవశ్యంలో మునిగిపోయారు. శ్రీమహావిష్ణువు వరాహ అవతారాన్ని స్మరించుకుంటూ నిర్వహించిన ఈ విశిష్టమైన శ్రీ భూవరాహ వ్రతం భక్తులకు ఆధ్యాత్మిక ఆనందాన్ని, దైవానుగ్రహాన్ని ప్రసాదించింది. విజయకీలాద్రి దివ్యక్షేత్రం అంతా “జై శ్రీమన్నారాయణ” నామస్మరణతో మార్మోగింది.

ఈ సందర్భంగా పెద్ద సంఖ్యలో భక్తులు పాల్గొని స్వామివారి కృపాకటాక్షాలను పొందారు. భక్తుల సౌకర్యార్థం ఆలయ నిర్వాహకులు ప్రత్యేక ఏర్పాట్లు చేశారు. మహోత్సవాల మిగిలిన కార్యక్రమాలు కూడా ఇదే భక్తిశ్రద్ధలతో కొనసాగనున్నాయి.