కేప్‌టౌన్‌లో భారత స్వరం

-సదస్సులో డా. దగ్గుబాటి పురందేశ్వరి ప్రత్యేక భాగస్వామ్యం

అమ‌రావ‌తి, నేటి పత్రిక ప్రజావార్త :
ప్రపంచవ్యాప్తంగా పార్లమెంటరీ ప్రజాస్వామ్య వ్యవస్థలు ఎదుర్కొంటున్న సవాళ్లు, అవకాశాలపై విస్తృత చర్చకు వేదికగా నిలిచిన 69వ కామన్వెల్త్ పార్లమెంటరీ సదస్సులో భారత పార్లమెంటరీ ప్రతినిధి బృందం చురుకైన పాత్ర పోషించింది. ఈ అంతర్జాతీయ సమావేశంలో భారత ప్రతినిధి బృందంలో లోక్‌సభ సభ్యురాలు డా. దగ్గుబాటి పురందేశ్వరి పాల్గొన్నారు.
ఈ సదస్సు ప్రధాన ఇతివృత్తం “Strengthening International Law and Parliamentary Democracy in a Changing World Order: Commonwealth Leadership”. మారుతున్న ప్రపంచ వ్యవస్థలో అంతర్జాతీయ చట్టం, ప్రజాస్వామ్యం, పార్లమెంటరీ సహకారం, సమగ్ర అభివృద్ధి వంటి అంశాలపై కామన్వెల్త్ దేశాల ప్రజాప్రతినిధులు చర్చించారు.
“ఆక్రమిత కశ్మీర్‌” గురించి పాకిస్తాన్‌ చేసిన వ్యాఖ్యలపై పురందరేశ్వరి గట్టిగా స్పందించారు.
కశ్మీర్‌ భారత్‌లో విలీనం కావడం పూర్తిగా చట్టబద్ధమైన ప్రక్రియని. ఎవరెన్ని మాటలు చెప్పినా, ఎలాంటి వాదనలు చేసినా ఈ వాస్తవాన్ని మార్చలేరని కశ్మీర్‌ నుంచి ఎవరైనా వైదొలగాల్సి ఉంటే, అక్రమంగా ఆ ప్రాంతాన్ని ఆక్రమించిన పాకిస్తానే అక్కడి నుంచి వెళ్లాలని స్పష్టం చేశారు.
భారత ప్రతినిధి బృందంలో డా. పురందేశ్వరికి లభించిన ముఖ్యమైన బాధ్యతల్లో కామన్వెల్త్ పార్లమెంటరీ అసోసియేషన్ (CPA) ఎగ్జిక్యూటివ్ కమిటీ సమావేశంలో పాల్గొనడం ఒకటి. ఈ సమావేశంలో కామన్వెల్త్ పార్లమెంటరీ వ్యవస్థకు సంబంధించిన వివిధ అంశాలపై చర్చ జరుగుతుండగా, డా. పురందేశ్వరి భారతదేశ అభిప్రాయాలు, దృక్పథాలను సమర్థవంతంగా వినిపించారు. భారత పార్లమెంటరీ అనుభవం, ప్రజాస్వామ్య విలువలు, శాసన వ్యవస్థల మధ్య సహకారం వంటి అంశాల్లో భారత దృక్పథానికి ఆమె ప్రాతినిధ్యం వహించారు. ఈ విషయాన్ని భారత పార్లమెంట్‌కు చెందిన అధికారిక సమాచార విడుదల కూడా స్పష్టం చేసింది.
మహిళా పార్లమెంటేరియన్ల సమావేశంలో కీలక భాగస్వామ్యం
69వ సదస్సులో భాగంగా జరిగిన 10వ కామన్వెల్త్ ఉమెన్ పార్లమెంటేరియన్స్ (CWP) కాన్ఫరెన్స్లో కూడా డా. పురందేశ్వరి పాల్గొన్నారు.
మహిళలకు రాజకీయ, శాసన రంగాల్లో సమాన అవకాశాలు కల్పించడం, పార్లమెంటరీ విధానాల్లో లింగ సమానత్వాన్ని ప్రతిబింబించడం, ప్రజాస్వామ్య వ్యవస్థలో మహిళల భాగస్వామ్యాన్ని మరింత విస్తరించడం వంటి అంశాలు ఈ సమావేశాల్లో ప్రధానంగా చర్చకు వచ్చాయి.
డా. పురందేశ్వరి ఈ అంతర్జాతీయ వేదికపై “Legislating for All: Gender Mainstreaming in Procedure, Practices and Policy” అనే అంశంపై జరిగిన ప్యానెల్ చర్చలో పాల్గొన్నారు. పార్లమెంటరీ ప్రక్రియలు, విధానాలు, చట్టాల రూపకల్పనలో లింగ సమానత్వ దృక్పథాన్ని ఎలా అంతర్భాగం చేయాలనే అంశం ఈ చర్చకు కేంద్రంగా ఉంది.
“అందరికీ చట్టం” — చర్చకు కేంద్రబిందువు
“Legislating for All” అనే అంశం కేవలం మహిళలకు సంబంధించినది మాత్రమే కాకుండా, శాసన ప్రక్రియలో సమాజంలోని వివిధ వర్గాల అవసరాలను పరిగణనలోకి తీసుకోవాల్సిన అవసరాన్ని ముందుకు తెచ్చింది.
చట్టాల రూపకల్పన నుంచి పార్లమెంటరీ కమిటీల పరిశీలన, సభా చర్చలు, చట్టాల అమలు అనంతర సమీక్ష వరకు ప్రతి దశలో సమానత్వ దృష్టిని అనుసరించడం ఎలా సాధ్యమనే అంశంపై ఈ వర్క్‌షాప్ దృష్టి సారించింది. ఈ చర్చలో డా. పురందేశ్వరి పాల్గొనడం ద్వారా భారత పార్లమెంటరీ అనుభవానికి అంతర్జాతీయ వేదికపై ప్రాతినిధ్యం లభించింది.
కామన్వెల్త్ మహిళా పార్లమెంటేరియన్లలో భారత ప్రాంతీయ ప్రతినిధిగా
డా. పురందేశ్వరి ప్రస్తుతం Commonwealth Women Parliamentarians – India Regionకు ప్రాంతీయ ప్రతినిధిగా ఉన్నారు. CPA అధికారిక వివరాల ప్రకారం ఆమె CWP అంతర్జాతీయ స్టీరింగ్ కమిటీలో భారత ప్రాంతానికి ప్రాతినిధ్యం వహించారు.
అందువల్ల కేప్‌టౌన్ సమావేశాల్లో ఆమె పాల్గొనడం సాధారణ ప్రతినిధి హాజరుకే పరిమితం కాకుండా, కామన్వెల్త్ మహిళా పార్లమెంటేరియన్ల అంతర్జాతీయ వేదికలో భారత దృక్పథాన్ని ప్రతిబింబించే పాత్రగా నిలిచింది.

రాజ్యసభ డిప్యూటీ చైర్మన్ హరివంశ్ నేతృత్వంలోని భారత ప్రతినిధి బృందంలో డా. పురందేశ్వరితో పాటు పలువురు లోక్‌సభ, రాజ్యసభ సభ్యులు, రాజ్యసభ సెక్రటరీ జనరల్ పాల్గొన్నారు. భారత రాష్ట్రాలు, కేంద్రపాలిత ప్రాంతాల శాసనసభలకు చెందిన 32 మంది ప్రిసైడింగ్ అధికారులు, 18 మంది కార్యదర్శులు కూడా ఈ సదస్సులో పాల్గొన్నారు.
భారత ప్రతినిధి బృందం పాల్గొన్న అంశాల్లో సమగ్ర వాణిజ్యం, అసమానతలు, అభివృద్ధి, వికలాంగులకు అందుబాటులో ఉండే పార్లమెంట్లు, మహిళా సమానత్వం, వాతావరణ మార్పులకు అనుగుణంగా చర్యలు, కృత్రిమ మేధస్సు, మానవ హక్కులు, శాంతి వంటి సమకాలీన అంశాలు ఉన్నాయి.
మహిళా సాధికారత నుంచి సమగ్ర ప్రజాస్వామ్యం వరకు
డా. పురందేశ్వరి కేప్‌టౌన్ భాగస్వామ్యంలో ప్రత్యేకంగా కనిపించే అంశం మహిళా సాధికారతను పార్లమెంటరీ చట్ట నిర్మాణంతో అనుసంధానించడం.
పార్లమెంటులో మహిళల ప్రాతినిధ్యం పెరగడం ఒక అంశమైతే, చట్టాల రూపకల్పనలో మహిళల అవసరాలు, సమానత్వం, సామాజిక న్యాయం వంటి అంశాలను ప్రతిబింబించడం మరో ముఖ్యమైన అంశం. “Legislating for All” చర్చ ఈ విస్తృత దృక్పథానికే వేదికగా నిలిచింది.
ఇలాంటి అంతర్జాతీయ వేదికపై భారతదేశం తరఫున డా. పురందేశ్వరి పాల్గొని, CPA ఎగ్జిక్యూటివ్ కమిటీతో పాటు మహిళా పార్లమెంటేరియన్ల సమావేశంలోనూ తన పాత్రను నిర్వహించడం భారత పార్లమెంటరీ దౌత్యంలో ఒక ముఖ్యమైన భాగంగా నిలిచింది.
కేప్‌టౌన్ నుంచి వినిపించిన సందేశం
69వ కామన్వెల్త్ పార్లమెంటరీ సదస్సు చర్చలు ఒక విషయాన్ని స్పష్టం చేస్తున్నాయి—ప్రజాస్వామ్యం కేవలం ఎన్నికల ప్రక్రియతో ముగిసిపోదు. ప్రజలందరికీ సమాన ప్రాతినిధ్యం, సమగ్ర చట్టాలు, బాధ్యతాయుతమైన పార్లమెంటరీ వ్యవస్థ, అంతర్జాతీయ సహకారం, మానవ హక్కుల పరిరక్షణ వంటి అంశాలు ప్రజాస్వామ్యాన్ని బలోపేతం చేస్తాయి.
ఈ విస్తృత చర్చలో భారతదేశం తరఫున డా. దగ్గుబాటి పురందేశ్వరి పాల్గొని, ముఖ్యంగా మహిళా సమానత్వం, సమగ్ర శాసన ప్రక్రియ, పార్లమెంటరీ సహకారం వంటి అంశాల్లో భారత దృక్పథాన్ని అంతర్జాతీయ వేదికపై ప్రతిబింబించారు. 1947లో స్వాతంత్ర్యం పొందిన నాటి నుంచే మహిళలకు సమాన ఓటు హక్కు, సమానత్వాన్ని కల్పించిన భారతదేశం నేడు ‘మహిళల అభివృద్ధి’ నుంచి ‘మహిళల నేతృత్వంలోని అభివృద్ధి’ వైపు పయనిస్తోందన్నారు. 73వ, 74వ రాజ్యాంగ సవరణల ద్వారా స్థానిక సంస్థల్లో మహిళలకు ప్రాతినిధ్యం కల్పించడం నుంచి నారీ శక్తి వందన్ అధినియమం ద్వారా పార్లమెంట్, శాసనసభల్లో మహిళల ప్రాతినిధ్యాన్ని పెంపొందించే దిశగా భారత్ చారిత్రాత్మక అడుగులు వేస్తోందన్నారు.
స్వచ్ఛ భారత్, జల్ జీవన్ మిషన్, ఉజ్వల, ముద్రా, స్టాండ్ అప్ ఇండియా, స్వయం సహాయక సంఘాల వంటి కార్యక్రమాల ద్వారా మహిళల ఆరోగ్యం, గౌరవం, విద్య, ఆర్థిక స్వావలంబన మహిళా నాయకత్వాన్ని బలోపేతం చేస్తున్నదని వివరించారు.
మహిళలను కేవలం సంక్షేమ పథకాల లబ్ధిదారులుగా కాకుండా, దేశ నిర్మాణంలో క్రియాశీల భాగస్వాములుగా, నిర్ణయాధికారులుగా, నాయకులుగా తీర్చిదిద్దడమే తమ లక్ష్యమని,
మహిళల భాగస్వామ్యం పెరిగినప్పుడే సమాజం, దేశం మరింత న్యాయబద్ధంగా, సమానంగా, సమృద్ధిగా అభివృద్ధి చెందుతుందని ఈ వేదికపై పురందరేశ్వరి వివరించారు.

కేప్‌టౌన్ వేదికగా సాగిన ఈ సదస్సులో భారత పార్లమెంటరీ స్వరం ప్రపంచ ప్రజాస్వామ్య సంభాషణలో భాగమవుతుండగా, డా. పురందేశ్వరి భాగస్వామ్యం మహిళా పార్లమెంటేరియన్ల అంతర్జాతీయ చర్చల్లో భారత ప్రతినిధిత్వానికి ప్రత్యేక ప్రాధాన్యతను తీసుకొచ్చింది.