Prajavartha Online Telugu News
-విజయవాడలో ప్రపంచ ప్రమాణాల దినోత్సవం నిర్వహణ
విజయవాడ, నేటి పత్రిక ప్రజావార్త :
నాణ్యత, భద్రత, విశ్వసనీయత, వినియోగదారుల పరిరక్షణలో ప్రమాణాల ప్రాధాన్యాన్ని చాటుతూ భారతీయ ప్రమాణాల సంస్థ (బీఐఎస్‌) విజయవాడ శాఖ ఆధ్వర్యంలో ప్రపంచ ప్రమాణాల దినోత్సవం-2026ను ఘనంగా నిర్వహించారు. స్కూల్‌ ఆఫ్‌ ప్లానింగ్‌ అండ్‌ ఆర్కిటెక్చర్‌ (ఎస్‌పీఏ), విజయవాడలో జరిగిన ఈ కార్యక్రమంలో పరిశ్రమలు, విద్యాసంస్థలకు చెందిన 450 మందికి పైగా ప్రతినిధులు పాల్గొన్నారు.
బీఐఎస్‌ విజయవాడ డైరెక్టర్‌ ప్రేమ్‌ సజని పట్నాల మాట్లాడుతూ సుస్థిర అభివృద్ధి లక్ష్యాల సాధనకు సంస్థలు, పరిశ్రమలు, ప్రజల మధ్య సమన్వయం అవసరమని తెలిపారు. ఎస్‌పీఏ డైరెక్టర్‌ ప్రొఫెసర్‌ డా. రమేష్‌ శ్రీకొండతో పాటు ప్రొఫెసర్లు అమితాబ్‌ సర్కార్‌, జన్మజయ గుప్తా ప్రమాణాల ప్రాధాన్యాన్ని వివరించారు. అందుబాటు ధరల్లో స్వచ్ఛమైన ఇంధనం, సుస్థిర అభివృద్ధి అంశాలపై నిపుణులు సాంకేతిక ప్రసంగాలు చేశారు.
ఐఐటీ తిరుపతి అసిస్టెంట్‌ ప్రొఫెసర్‌ డా. విఘ్నేష్‌ వి., అల్ట్రాటెక్‌ సిమెంట్‌ ప్రతినిధి శివరాజ్‌ వరదరాజన్‌, పీవీపీ సిద్ధార్థ ఇన్‌స్టిట్యూట్‌ ఆఫ్‌ టెక్నాలజీకి చెందిన డా. వి. జగదీష్‌, ఎస్‌పీఏ అసిస్టెంట్‌ ప్రొఫెసర్‌ డా. ఆర్‌.ఎన్‌.ఎస్‌. మూర్తి తమ రంగాల్లోని అనుభవాలను పంచుకున్నారు. బీఐఎస్‌ స్టాండర్డ్స్‌ క్లబ్‌ విద్యార్థులు సాంస్కృతిక కార్యక్రమాలు నిర్వహించారు. నాణ్యతా ప్రమాణాల అమలులో విశేష కృషి చేసినవారిని సత్కరించారు. ఎస్‌పీఏ విద్యార్థులు రూపొందించిన ప్రాచీన భారతీయ దేవాలయాల త్రిమితీయ నమూనాల ప్రదర్శనను ప్రారంభించారు. రోజువారీ జీవితంలోనూ, దేశ అభివృద్ధిలోనూ నాణ్యతా ప్రమాణాల ప్రాముఖ్యతను ఈ కార్యక్రమం వివరించింది.
